Kostoja e mbylljes se nje shkolle private

 

Home / Ekonomi / Kostoja e mbylljes së universiteteve në Shqipëri

http://zathur.net/kostoja-e-mbylljes-se-universiteteve-ne-shqiperi/

 

Kostoja e mbylljes së universiteteve në Shqipëri

Institucionet e arsimit të lartë në vitet e fundit kanë arritur përmasa të rëndësishme për numrin e studentëve të regjistruar, por edhe për vlerat monetare të qarkulluara.

Heqja e licencës dhe mbyllja e aktivitetit për disa nga shkollat e larta private do të ketë një efekt të konsiderueshëm edhe në këtë drejtim dhe do t’ju kushtojë këtyre subjekteve miliona euro.

Ndër shkollat e larta që u mbyllën nga Qeveria për mosplotësim të kritereve ligjore, më i madhi është Universiteti “Kristal”. Sipas deklarimit tatimor të subjektit, për vitin 2013 ai realizoi te hyra prej 496 milionë lekësh, ose rreth 3.5 milionë euro. Ndonëse kjo vlerë është e konsiderueshme, viti 2013 padyshim nuk ka qënë më i mbari për “Kristal”, pas goditjes nga skandali i diplomave të dhëna për individë që nuk kishin ndjekur studimet.

Të ardhurat e Kristal gjatë vitit 2013 pësuan një rënie me 17% krahasuar me vitin 2012. Për më tepër, në dy vitet e fundit financiarë “Kristal” ka deklaruar aktivitet me humbje, që në vitin 2013 kishte vlerën e afro 73 milionë lekëve, ndërsa në vitin 2012 humbja kishte qënë edhe më e madhe, 92 milionë lekë.

Sipas bilancit, arsyeja kryesore e humbjeve kanë qënë interesat e paguara për kreditë bankare dhe që në vitin 2013, ishin afro 80 milionë lekë. Kjo sjell në vëmendje një problem tjetër të lidhur me mbylljen e universiteteve dhe që janë kreditë e pashlyera në banka. Nëse paratë e humbura nga “Kristal” në një pjesë të madhe do të shpërndahen në universitetet e tjera, pas transferimit të studentëve, mbyllja e aktivitetit të universitetit do të sjellë pamundësinë e shlyerjes së kredive bankare.

Në fund të vitit 2013, vetëm universiteti “Kristal” kishte detyrime ndaj bankave, në formën e kredive afatshkurtra dhe afatgjata, për një vlerë totale 786 milionë lekë ose 5.6 milionë euro, të shpërndara në katër banka tregtare.

Rrjedhimisht, kjo situatë do të sjellë probleme edhe për bankat kreditore, duke krijuar kredi të këqija. Nëse këto shkolla të larta nuk plotësonin kriteret ligjore, papërgjegjshmëria e institucioneve në kontrollin dhe mbikëqyrjen e tyre ka dëmtuar edhe bankat. Ndonëse kanë kredituar institucione të licencuar ligjërisht, tani bankat duhet të përballen me pasojat e mbylljes së papritur të tyre.

http://zathur.net/kostoja-e-mbylljes-se-universiteteve-ne-shqiperi/

Read More

Raporte të KLSH-ës për UBT dhe UPT

 

Raporte auditimi të KLSH në institucionet e arsimit të lartë dhe kërkimit shkencor në vend për 2014

1. Auditimi i ushtruar ne Institutin e Shendetit Publik (Universiteti Mjekesor)

2. Auditim i ushtruar ne Universitetin Politeknik te Tiranes

3. Auditim i ushtruar ne Universitetin Bujqesor te Tiranes

4. Auditim i ushtruar ne Shkollen e Larte te Magjistratures (nuk eshte publikuar nga KLSH)

 

Nga Bardhi Sejdarasi, Java, 11.09.2014

Pronarët e rinj të Universiteteve të “vjetër”

 

Përdorimi i parave publike pa kriter dhe gjetjet e Kontrollit të Lartë të Shtetit; sa është dëmi që i bëhet arkës së shtetit, pse nuk penalizohen shkaktarët e dëmit? A është selektiv Bujar Leskaj në denoncimin e shkeljeve financiare të universiteteve? Çfarë fshihet pas raporteve të kontrollit ekonomik dhe financiar dhe pse “nuk iu hyn gjemb në këmbë” vjedhësve të parave publike. Janë plot 2,8 miliardë lekë të “vjedhur” vetëm në dy universitete, Universitetin Politeknik dhe Universitetin Bujqësor, Tiranë. Por kjo është vetëm “maja e ajzbergut”!

Në muajin Maj të këtij viti, në një investigim të bërë publik në mediat shqiptare u detyrova t’i bëj një “set” pyetjesh, Doktorit të Shkencave Ekonomike, z. Bujar Leskaj, aktualisht me detyrën e Kryetarit të Kontrollit të Lartë të Shtetit. Pyetjet ishin konkrete dhe në dijeninë time institucioni që drejton z. Leskaj ishte duke hetuar për çështjet që e pyesja. Për ata që nuk e kanë kujtesën e fiksuar në atë që po shkruaj, po i sjell “copy-paste” pyetjet për z. Leskaj: 

1. A ka informacion z. Leskaj për dëmin që ka shkaktuar z. Jorgaq Kaçani, rektor i UPT në katin përdhes të BSHUPT? (kujtojmë se janë mbi 45 mijë tituj librash që i mungojnë inventarit të kësaj biblioteke- kontrolli i KLSH është bërë këtë pranverë!);

2. A ka informacion z. Lestkaj se, duke shkelur në mënyrë të përsëritur (prej vitit 2011) vendimet e Këshillit të Administrimit të UPT, z. Kaçani ka emëruar punonjës e ka ndarë tituj si ofiqe personale apo ndere, në kundërshtim me vendimet e Këshillit Administrativ, duke dëmtuar financiarisht arkën e shtetit dhe të institucionit (çdo titull i dhënë ka koston 10 mijë lekë/muaj më shumë në pagë!)

3. A ka identifikuar z.Leskaj ndonjë shkresë si psh. atë të drejtores së burimeve njerëzore, e cila paguhet sikur ka mbaruar doktoraturën, ndërsa doktoraturën nuk e ka mbaruar akoma. Ose më drejtpërdrejt; a e kanë parë inspektorët e Leskajt se vetëm dekania e Fakultetit të Teknologjisë së Informacionit (FTI) nuk e ka respektuar një urdhër për të paguar të gjithë kandidatdoktorantët me pagën e atij që mbaron doktoraturën?! 

4. …

Nuk po i  rendis pyetjet e tjera, sepse nuk kanë lidhje me çështjen. Sidomos tani kur ka dalë dhe është bërë publik Buletini nr 1 dhe Buletini Nr 2 i KLSH që bën fjalë për veprimtarinë e KLSH për periudhën Janar-Qershor 2014. (Në fakt askush nuk e kupton se si të dy buletinet përfshijnë të dhëna të ngjashme, pra Buletini Nr 2 nuk i përket tremujorit të dytë, por 6-mujorit të parë?! Por të mos i japim rëndësi kësaj. Në raportin zyrtar, me të drejtë pritej që të kishte një përgjigje lidhur me shkeljet e evidentuara.

Z. Leskaj shkon më tej me hetimin e tij ekonomik e financiar. Të dhënat janë befasuese: bëhet fjalë për më shumë se 2,8 miliardë lekë që janë shpërdoruar në vetëm dy institucione të arsimit të lartë (IAL), pra në UPT dhe Universitetin Bujqësor të Tiranës .

Kontrolli i Lartë i Shtetit ka kontrolluar në fushën e prokurimeve, ku vetëm në Universitetin Bujqësor janë gjetur më shumë se 35 milionë lekë shkelje, apo në fushën e shpenzimeve operative ku, në të dy universitetet që iu referohemi, janë gjetur po ashtu me shumë se 37 milionë lekë shkelje financiare. Shkelje të tjera të disiplinës financiare janë evidentuar edhe në shpërblimin pa të drejtë të punonjësve nga rektoratet, mosllogaritjen dhe mosderdhjen e kontributeve të taksës së punës, mosmbajtjen e TVSH-së për oponencën, pagesa pedagogësh pa miratim të MAS etj, etj.

Unë nuk mund të pranoj se vetëm këto janë “shkeljet” që gjen në këto universitete. Por gjithsesi ato janë shkeljet zyrtare, që tashmë janë raportuar nga Kontrolli i Lartë i Shtetit dhe duhen pranuar si të tilla. Ajo që më bën përshtypje është qëndrimi penalizues i KLSH ndaj njërit IAL në raport me tjetrin. Psh, dëmet financiare të raportuara nga auditët e KLSH për Universitetin Bujqësor janë 1.775.000 plus 1.417.000 plus 5.421.000 plus 2.310.000 lekë, që do të thotë gjithsej 10.923.000 lekë. Ndërsa për Universitetin Politeknik të Tiranës vetëm zëri “shkelje të disiplinës financiare me ndikim negativ në performancën e subjekteve të audituara” është 11.471.000 lekë. Ose po t’i mbledhim të gjitha “dëmet” e UPT del se janë 11.471.000 plus 2.031.000 baras 13.502.000. Pra shumë më tepër se sa dëmi i Universitetit Bujqësor. Por vini re! KLSH bën katër kallzime penale për Universitetin Bujqësor (për dëmin prej 2.794.000 lekë) dhe ZERO kallzim penal për UPT. Nuk e gjen  shpjegimin e kësaj as në buletinin 49 faqesh të z. Leskaj! 

NË FUSHËN E SHPËRBLIMEVE:

Universitetin Bujqësor, Tiranë, në vlerën 1 417 000 lekë, si shpërblim i padrejtë nga administrata e Rektoratit të UBT për punonjësit e vet në dy raste (641 000 lekë në vitin 2012 dhe 776 000 lekë në vitin 2013), në kundërshtim me VKM nr. 418, datë 27.06.2012.

NË ZËRIN “TË TJERA”, SHKELJE TË DISIPLINËS FINANCIARE:

Universitetit Bujqësor, Tiranë, në vlerën prej 5 421 000 lekë, nga mosllogaritja dhe mosderdhja e kontributit të sigurimeve shoqërore deri në kufirin e lejuar për 88 punonjës të punësuar në dy vende pune (si diferencë e ndalesës së kryer pranë qendrës së parë të punës dhe kufirit maksimal).

SHKELJE TË DISIPLINËS FINANCIARE ME NDIKIM NEGATIV NË PERFOMANCËN  E SUBJEKTEVE TË AUDITUARA

•  Universitetin Politeknik, Tiranë, në vlerën 11 471 000 lekë, nga të cilat 4 922 000  lekë si pagesa pa miratim të MASH për pedagogë të brendshëm që japin mësim në ciklin e ulët, si dhe 6 549 000 lekë nga mosaplikimi i 20% tvsh për shpërblimet e dhëna për shërbimin e oponencës konform ligjit nr. 7928, dt 27.04.1995 “Për TVSH”, i ndryshuar.

•  Universitetin Bujqësor, Tiranë, në vlerën 2 310 000 lekë, si humbje financiare nga aktiviteti i prodhimit te mjaltit.

•  Gjatë kësaj periudhe, nga ana e KLSH-së janë bërë kallëzime penale, për drejtues të rangut të mesëm dhe të lartë nga të cilët në: Universitetin Bujqësor, Tiranë (dy) kallëzime penale

“Afendikonjtë”/pronarët e parave publike dhe kut-i i kallzimit të z.Leskajt

Nuk do të merrem më shumë me atë që thotë KLSH. Unë them se ka shumë më tepër shkelje në UPT, të cilat, me qëllim apo jo (nuk vë dorën në zjarr) audituesit e Leskajt nuk i kanë parë. Nuk mund të mos vihet re se si është “dorovitur”  çdokush që nuk i ka merituar paratë publike në UPT, ashtu sikundër nuk mund të mos kontrollohen financimet e buxhetit për kandidatdoktorantët apo për shtesën e ndërtesës së UPT apo edhe humbjet që ka sjellë titullari i këtij institucioni nga mosveprimi lidhur me “humbjen” e mbi 45 mijë titujve të librave në katin përdhes të BSHUPT, që janë kalbur që prej vitit 2008. Mjafton të lexosh për këtë edhe procesverbalin e mbajtur nga z. Edmond Stojku, Drejtor Ekzekutiv i Inspektoratit Sanitar Shtetëror, kur në datën 30.06.2014 ka dërguar inspektorët e tij dhe ka lënë detyra konkrete aty ku audituesit e KLSH-së nuk kishin “parë gjë”. Dosja e BSHUPT do të publikohet e plotë, lidhur me këtë dëm financiar të shkaktuar, për të cilin nuk ka ende përgjegjës.

Por ajo që është më e rëndë, është pikërisht qëndrimi ndaj titullarëve të këtyre institucioneve publike të arsimit të lartë, që mund të bëjnë çfarë e si të duan me vlerat monetare në administrim. Po jo gjatë, besoj!

 

MAS apo KLSH?

Nisur nga informacionet e shumta për shkelje të natyrave të ndryshme, kreu i MAS, znj. Lindita Nikolla, reagoi shumë shpejt. Ajo nuk priti asnjë analizë të bërë nga KLSH. Grupet e auditit të MAS punuan paralel me KLSH. 

Nga informacionet e para jozyrtare që vijnë nga auditimi i universiteteve publike gjykoj se janë evidentuar një numër i konsiderueshëm shkeljesh ligjore dhe ekonomiko-financiare, të cilat ua kalojnë “gjetjeve” të institucioneve të arsimit të lartë privat (IAL) 18 prej të cilave u penalizuan me heqje të licensës. Ndërsa janë ku e kun ë raport me shkeljet që ka gjetur Kontrolli i Lartë i Shtetit. Sigurisht, ky kontroll i plotë ligjor dhe institucional i Ministrisë së Arsimit dhe Sporteve, ende nuk është “zbardhur” tërësisht, ndërsa vijon penalizimi i shkeljeve të vërejtura për Urdhrit Nr 106, datë 28.03.2014 “Për kryerjen e kontrollit për zbatimin e ligjshmërisë në institucionet publike dhe jopublike të arsimit të lartë”, urdhër, që për hir të së vërtetës, duhet pranuar se i “shkallmoi” tërësisht disa nga institucionet joperformante të arsimit të lartë, që vetëm emrin kishin të tillë. Në ditët që vijnë do të kemi mundësi të shohim edhe anën tjetër të “medaljes” atë që kanë shfaqur para këtij kontrolli të thellë të MAS, pikërisht IAL-të publike.

Pas tyre, raporti i paplotë dhe dukshëm i njëanshëm i Bujar Leskajt do të duket si një nga investigimet më të dobëta ekonomike-financiare të realizuara ndonjëherë nga Kontrolli i Lartë i Shtetit që nga krijimi i tij…

Read More

Kryeministria propozon mbylljen e disa institucioneve private

Ministria e Arsimit publikoi disa të dhëna nga raporti i vlerësimit të ligjshmërisë së institucioneve. Por ka shumë paqartësi në lidhje me ecurinë e procesit të vlerësimit dhe akreditimit.

1. Është e paqartë nëse vlerësimi i ligjshmërisë i paraprin vleresimit dhe akreditimit nga agjencia britanike që ka deklaruar qeveria.

2. Nuk është deklaruar nëse kjo agjenci është pajtuar konform rregullave të prokurimit publik të shërbimeve. Gjithashtu edhe mandati i kësaj agjencie është i paqartë nëse vlerësimin e zbatimit të ligjit e kryen grupi i kontrollit.

3. Agjencia Britanike – British Accreditation Council - është një agjenci që nuk është anëtare e ENQA – European Association for Quality Assurance in Higher Education. Ligji i arsimit të arsimit të lartë në RSH njeh vetëm agjenci anëtare të ENQA. Anëtare nga Britania e Madhe është QAA – Quality Assurance Agency for Higher Education. Kjo nismë duket e nxituar sepse nuk u shoqërua me ndryshimet përkatëse ligjore të propozuara në reformë.

4. Agjencia Britanike e Akreditimit nuk akrediton për cilësi si agjencitë ndërkombëtare të akreditimit por për Ministrinë e Brendshme të Britanisë së Madhe, ku shqyrton pajtueshmërinë për institucionet arsimore dy-vjeçare që mirëpresin studentë të huaj. Institucionet e arsimit të lartë privat në vend do të kundërshtojnë veprimtarinë e kësaj organizate në Shqipëri, për më tepër kur në vend operojnë autorite ligjore përgjegjëse si Inspektoriati i Lartë i Arsimit dhe Agjencia Publike e Akreditimit.  Për këtë mandati i agjencisë britanike është i paqartë pasi përgjegjës  për akreditimin është agjencia shqiptare APAAL.

5. Në Kosovë Agjencia Britanike propozoi mbylljen e të gjitha institucioneve përveç njërit (nga 40), por dy vite më pas në Kosovë vazhdojnë të ekzistojnë mbi 30 institucione, sepse qeveria e Kosovës injoroi raportin e ekspertëve britanike (tre ekspertë). Gjithashtu raporti i britanikëve ishte problematik pasi nuk realizoi akreditimin, por vlerësoi zbatimin e ligjit në Kosovë, mbi të cilin hartoi rekomandimet. Kjo punë u realizua tashmë nga qeveria Rama dhe mandati i britanikëve duket më kot se kurrë.

6. Kërkesat për heqjen e licencës dhe pezullimin duhet të dalin me Vendim Qeverie – nuk ka ende një vendim qeverie. Nëse ky raport nuk shoqërohet me vendimet e qeverisë menjëherë, atëherë lë dyshime se është për trysni dhe qëllime korruptive për të shtrembëruar mekanizmat e konkurrencës në prag të fazës së regjistrimeve.

7. Nisma e qeverisë është për tu përgëzuar për mbylljen e institucioneve të arsimit të lartë që kanë rezultuar problematike qoftë në raport me studentët dhe shërbimin, por edhe në raport me shtetin dhe zbatimin e ligjit: si Vitrina, Kristal, Medicom dhe Albanian University. Në 2012 Kristal fitoi gjyqin ndaj qeverisë. Ka mundësi që edhe nëse qeveria shpall dhe ekzekuton vendimet, të humbin nëpër sistemin korruptiv të gjykatave. Cilat do të jenë masat e qeverisë ndaj lumit të padive?

8. Ndër masat e marra vihet re se është kërkuar heqje licence për një grup institucionesh të arsimit të lartë profesional, si kolegjet e New Generation, të cilat ofrojnë programe 2-vjeçare jo-akademike e pajisin tregun me persona të kualifikuar dhe në përputhje me planet e qeverisë për të nxitur arsimimin profesional.

9. Cilat janë masat që do të marrë qeveria për të penguar manipulimin e regjistrave nga shkollat që propozohen për tu mbyllur (duke qenë se tani kanë shtysa për të shitur diploma)? A janë sekuestruar regjistrat themeltarë? A është populluar baza e të dhënave elektronike e AKP-së me të dhënat reale?
 

Pjesë nga përmbledhja e raportit të publikuar nga MAS.

1. Kontrolli dhe vlerësimi i ligjshmërisë u realizua ne katër faza (dokumentacioni, përpunimi, inspektimi në vend dhe përballja e raportimi final).

2. Numri i institucioneve të vlerësuara ishte 59.

3. Gjetjet kryesore në arsimin privat

-  Mbi 90% e IAL-ve private nuk kanë staf të mjaftueshëm efektiv;

- Më shumë se 2/3 e IAL-ve nuk arrijnë të mbulojnë ngarkesën mësimore akademike me staf të brendshëm, sipas standardeve të kërkuara ligjore;

- Mbi 90% e IAL-ve private nuk kanë akte të tyre rregullatore të brendshme për mirë funksionimin e tyre, të miratuara nga organet kolegjiale;

- 88% e Institucioneve të arsimit të lartë kanë parregullsi ose paplotësi të regjistrave themeltarë, të progresit akademik apo të diplomimit të studentëve;

- 85% e Institucioneve të arsimit të lartë nuk zbatojnë rregullat ligjore për administrimin dhe ruajtjen e dokumentacionit zyrtar të institucionit;

- 80% e Institucioneve të arsimit të lartë kanë parregullsi në marrëdhëniet kontraktuale me stafin akademik/studentët;

- Rreth 2/3 e Institucioneve të arsimit të lartë bëjnë reklamim/marketing të pandershëm, përhapje  informacioni të rremë për publikun dhe studentët;

- Në më shumë se 60% të Institucioneve të arsimit të lartë jopublik nuk funksionojnë organet kolegjiale, sipas legjislacionit ne fuqi.

- 56% e Institucioneve të arsimit të lartë jopublik nuk ofrojnë garanci financiare për vazhdimin e studimeve, as për studentët që kanë aktualisht në sistem.

- Më shumë se gjysma e institucioneve të arsimit të lartë jopublik nuk plotëson standardet minimale të infrastrukturës dhe sigurisë së studentëve.

- Më shumë se gjysma e institucioneve të arsimit të lartë jopublik, që kanë ofruar të drejtën për ofrimin e programeve të ciklit të tretë, nuk kanë kapacitet akademik ose nuk plotësojnë standardet për të ofruar këto programe. (janë vetëm pese nstitucione që ofrojnë programe doktorature: Albanian University, UET, New York, Polis dhe Epoka)

4. Gjetjet për arsimin publik

- Asnjë nga Institucionet Publike të Arsimit të Lartë (përveç 1 IAL-je) nuk i janë nënshtruar detyrimit ligjor për vlerësimin e cilësisë dhe akreditimin;

- Me pak përjashtime, thuajse të gjitha IAL-të kanë mangësi të rëndësishme dhe parregullsi në dokumentacionin zyrtar, të personelit akademik dhe të studentëve;

- Rreth 2/3 e IAL-ve nuk plotësojnë standardet e të gjitha njësive bazë në përbërje të tyre në lidhje me numrin dhe shkallën e kualifikimit të stafit akademik;

- Rreth ½ e IAL-ve nuk plotësojnë standardet e të gjithë njësive kryesore në përbërje të tyre;

- Me shumë se ½ e IAL nuk plotësojnë standardet minimale për treguesit staf akademik/student dhe staf efektiv/staf i ftuar;

- në rreth 70% të IAL-ve organet kolegjale funksionojnë dhe/ose marrin vendime në kundërshtim me aktet ligjore e nënligjore, madje dhe me vetë rregulloret e tyre;

- Në shumicën dërrmuese të IAL-ve autoritetet drejtuese të zgjedhura marrin kompetenca dhe vendimmarrje/miratime në kundërshtim të hapur me ligjin, aktet nënligjore dhe vetë aktet e miratuara të institucionit (statut, rregullore);

- Më shumë se ½ e IAL-ve nuk respektojne parimet, kriteret dhe procedurat për rekrutimin e stafit akademik efektiv dhe të ftuar, si dhe atë adminsitrativ;

- Thuasje 100% e IAL-ve nuk respektojnë kriteret përzgjedhëse për pranimet e studenteve në ciklin e dytë, Master profesional dhe rreth 70% as ato për pranimet në Master Shkencor;

- Më shumë se ½ e IAL-ve nuk kanë kapacitetet e duhura akademike dhe shkallën e kualifikimit për të ofruar programet e studimit Master Shkencor dhe Doktoratë;

- Rreth 2/3 e IAL-ve shkelin ose nuk respektojnë kriteret dhe procedurat e pranimit në programet e studimit të doktoratës;

- Më shume se ½ e IAL-ve nuk respektojnë kriteret dhe procedurat për promovimin për grada dhe tituj akademike;

- Rreth ¾ e IAL-ve nuk plotësojnë as standardet minimale të infrastrukturës, mjediseve dhe kritereve të sigurisë për stafin dhe studentët.

5. Masat e ndërmarra:

- Mbyllje të institucionit, pezullim të veprimtarisë ose vazhdimin e veprimtarisë me kushte për institucionet private

- Riorganizim institucional, mbyllje të filialeve apo institucionit mëmë, mbyllje të programeve të studimit, reduktim i kuotave studentore për institucionet publike

- Masa ndëshkimore dhe padi penale për kundravatjet ligjore të evidentuara, si edhe kontrolle të koordinuara me autoritetet mbikëqyrëse të tatimeve, inspektimit të pasurisë dhe inspektoriatit të punës.
________________________________________________________________________
 

MASAT KONKRETE

 

A. Institucionet e arsimit të lartë privat

I. Rekomandime për përmirësimin e kritereve

"Shkolla e Lartë Private Mesdhetare e Shqipërisë"

Akademia e studimeve të aplikuara "Reald"

IPAL "Shkolla e Lartë "Nehemia"

SHLP "Tirana Business University"

SHLUJ "Luarasi"

SHLUJ "Marubi"

SHLUJ "Universiteti "Marin Barleti"

SHLUJ "Universiteti i New Yorkut, Tiranë"

SHPAL "Universiteti Metropolitan Tirana"

Universiteti "Epoka"

Universiteti "Polis"

Universiteti Europian i Tiranës

Universiteti katolik "Zoja e Këshillit të Mirë"

II. Pezullim i veprimtarisë

Akademia Profesionale  e Biznesit

IPAL "ISSAT"

Kolegji Profesional "Ivoclar Vivadent &Partners"

Kolegji Profesional privat "New Generation"

ShLAP "Pavarësia" Vlorë

SHLP "Hëna e plotë" (Bedër)

SHLP "Logos"

SHLUJ "Justicia"

ShLUJ "Sevasti dhe Parashqevi Qiriazi"

SHLUP "Instituti Kanadez i Teknologjisë"

SHLUP "Wisdom University"

Universiteti "Aldent"

Universiteti privat "Albanian University"

III. Heqje license

Akademia e Studimeve te Aplikuara, Durrës

Akademia Pedagogjike, Tiranë

IALP "Shkolla e Lartë "Nëna Mbretëreshë Geraldinë"

IALP "Shkolla e Lartë Amerikane e Tiranës"

IP "Shkolla e Lartë Ndërkombëtare e Tiranës"

IPAL "Kolegji profesional i sporteve, Fier"

IPAL "Shkolla e Lartë "Illyria"

Kolegj profesional "Argent", Shkodër

Kolegjet Profesionale, private "Medicom"

Shkolla e Lartë Private e Edukimit

SHLP "Universiteti Elite"

SHLP "Universiteti Planetar i Tiranës"

SHLUJ "Justiniani I"

SHLUJ "Medikadent"

SHLUJ "Universiteti Kristal"

SHLUP "Vitrina"

SHPAL "Gjon Buzuku", Shkodër

Akademia e Ndertimit, Tiranë

 

 

B. Masat në IAL publike

 

I. Propozim për mbyllje të IAL-ve

1. Akademia e Arteve Shkodër
2. Propozim për mbyllje të Filialeve
3. Filiali Kukës, UT
4. Filiali Sarandë, UT
5. Filiali Peshkopi, UAMD
6. Filiali Pogradec, UK
7. Filiali Lushnje, UBT
8. Filiali Gjirokastër, UBT

II. Reduktim i kuotave

1. Reduktim i kuotave për disa programe studimi
2. Pezullim i pranimeve në ciklin e parë të studimeve

III. Riorganizim institucional

- Universitetet e Gjirokastres, Durrësit, Vlorës, Mjeksisë, Shkodrës, Tiranës etj. 

Pjesë nga fjalimet e autoriteteve

I. Pjesë nga fjalimi i ministres znj. Lindita Nikolla

U kam hedhur këto ditë një sy mbishkrimeve të arkivit në MAS. Është i mbushur plot me dosje si këto, që kanë nga një emër institucioni të inspektuar. Kanë edhe tituj, të tillë si akreditim apo rankim të IAl-ve. Kuptova se pse, kur filluam procesin, shumë mendonin se po përsërisnim sjelljen e vjetër. Ca shkresa e CD për t’u depozituar në MAS dhe kaq. Gjithmonë janë bërë inspektime aty-këtu, por asgjë nuk ka ndodhur, na thonin me të drejtë.

Në këto dosje pasqyrohet puna e 59 grupeve me mesatarisht 5 specialistë, nga më të mirët, më të përkushtuarit nga MAS, IShA dhe APAAL. Janë 5000 orë pune për të studiuar informacionin e sjellë nga vetë IAL-të në shkresa e CD, janë 2000 orë të tjera pune për të inspektuar në vend IAL-të, janë 4000 faqe raporte dhe informime me institucionet për gjetjet.

Me kërkesën dhe ndjeshmërinë e posaçme të Kryeministrit Edi Rama, kam kërkuar në takime që raportimet nga grupet të përçojnë frymën e pozitivitetit; jo zellin për të renditur dukuri negative në raporte, por çmuarjen arsyeshëm të situatës për të dalluar qartë hendekun midis interpretimit të ligjit aktual me problemet që ka dhe shkeljes qartas të tij.

Sigurisht, ne nuk sajuam kritere të reja. Nuk janë as standardet që do të verifikojë Agjencia Britanike e Akreditimit që lidhen me cilësinë, por janë kriteret e ligjit dhe VKM-të që gjetëm për IAL-të, janë kriteret që duhet të mbajnë në këmbë Institucionet e AL-së si një parakusht për funksionimin e tyre.

Agjencia Britanike vjen për të verifikuar cilësinë e programeve dhe kurrikulave dhe jo për të gjetur se si studentët transferohen nga privati te publiku jashtë çdo kriteri, se si pranohen studentët me dëftesa false të shkollës mesme, se si shiten diplomat, se si madje mund të marrësh diplomë edhe pa mbaruar as shkollën e mesme, se si sot në Shqipërinë kandidate për në BE në IAL-të private ka studentë që paguajnë tarifat e studimit në klering me lopë, dru, zhavorr, oriz etj. Po, kemi gjetur dokumente pagesash me klering.

Kemi gjetur institucione që licencohen për të zhvilluar mësimin në gjuhën shqipe dhe diplomojnë jo një e dy, por me qindra të huaj.

Më lejoni të falënderoj ato institucione që, edhe pse në këtë tollovi vlerash, ia kanë dalë të orientohen kah ligji. Mirënjohje pedagogëve, drejtuesve të atyre institucioneve publike për standardet e pashkelura! Keni treguar se pasioni për dijen dhe profesionalizmi mbeten aty, edhe kur lodhja nuk shpërblehet.

Është për të njëjtin standard e njëjta masë! Para organeve të drejtësisë të gjithë ata që kanë abuzuar dhe kanë futur sektorin në një qorrsokak të tillë. Sepse nuk mund të lejojmë që 70,5% e IAL-ve kanë probleme me kriteret ligjore dhe 18 institucione nuk plotësojnë as kriteret më minimale të ligjit.

E kemi të qartë planin e punës për përballimin e situatës. Grupi i administrimit të kësaj situate do të verifikojë emër për emër dosjen e çdo studenti që paraqitet për ndihmë, duke ndjekur sistemimin e tij në bazë të vërtetësisë së dokumenteve dhe krediteve të marra. Procedurat dhe afatet do të prezantohen në faqen e MAS-it.

2. Pjesë nga fjalimi i kryeministrit z. Edi Rama

Pamja që ndoqëm nuk lë vend për asnjë kënaqësi, por ngjall vetëm trishtim dhe revoltë. Trishtim, për aq mijëra dhe mijëra familje që kanë investuar gjithë kursimet e sakrificave të tyre, për t’u dhënë fëmijëve një diplomë dhe në fakt, i kanë derdhur paratë në shumë skema piramidale, tërësisht mashtruese, sikundër nxjerr në pah në mënyrë therëse, kontrolli i nisur shumë muaj më parë dhe i realizuar brenda kornizës ligjore, me vullnet, profesionalizëm dhe integritetet të plotë.

Kemi arritur të kemi sot numrin më të madh të universiteteve për frymë në Europë, 8 herë më shumë se Britania e Madhe. 20 universitete për 1 milionë banorë. Kemi arritur një kulm tjetër, me 1432 programe të ndryshme mësimore, a thua se vendi ynë i ka mundësitë t’i përgatisë të rejat dhe të rinjtë për 1432 profesione dhe nënprofesione të ndryshme. Kemi arritur një tjetër rekord, europian nuk diskutohet, rajonal padyshim, por, mbase, edhe botëror, me 50 programe studimore në universitetet tona publike, ku nota mesatare e të gjithë të regjistruarve është nën 5.5.

Kemi arritur që në kaq pak vite të gjenerojmë 32 mijë diploma nga sistemi universitar privat. 32 mijë! Gjysmën e të cilave i ka dhënë një universitet i vetëm, 16 mijë. Kemi arritur të japim 900 diploma për të huaj, ndërkohë që s’japim asnjë leksion në gjuhë të huaj. Kemi arritur që të kemi pedagogë që vetëm një vit përpara rekrutimit kanë marrë diplomën në bachelor. Për shembull, në Universitetin publik të Elbasanit, 16 vetë janë punësuar si pedagogë në infermieri, me një bachelor në një universitet privat. Merreni me mend se çfarë infermierësh e infermieresh dalin nën kujdesin e këtyre 16 personave!

Kemi arritur të japim diploma në natyrë, për shërbime të ndryshme, lyerje, shpëlarje, punime hidraulike, punime zdrukthëtarie, të shpërblyera jo me para, por me diploma nga pronarët e universiteteve në fjalë. Kemi arritur që të fusim pagesën në natyrë për t’u shkolluar, lopë, dele, oriz, fasule, zhavorr, dru zjarri. Ka studentë që e kanë paguar studimin me dru zjarri. Natyrisht, të prera pa leje nëpër pyje. Kemi arritur që të kemi regjistra themeltarë universitetesh, ku shkruhet “10 diploma i ka tërhequr shefi”.

E, të gjitha këto kanë ndodhur për një arsye sa banale, aq edhe të pabesë; Që qeveria e mëparshme të blinte qetësi dhe të mos përballej me papunësinë e të rinjve. Të blinte qetësi me paratë e prindërve, duke i yshtur të gjithë të paguajnë gjithçka kanë, për të shkuar fëmijët e tyre në universitet dhe për t’i ushqyer fëmijët, me iluzionin se po bëhen inxhinierë, se po bëhen doktorë në infermieri, se po bëhen ekonomistë, juristë e kështu me radhë. Ndërkohë që, për numrin e viteve që ky iluzion ushqehej, qeveria nuk kishte nevojë që të vriste mendjen dhe të gjendej përballë kërkesës legjitime për punësim të të rejave dhe të rinjve. Dhe, kemi arritur praktikisht, ta transformojnë Shqipërinë në një vend që prodhon vetëm nivel të lartë arsimor dhe nuk prodhon nivel profesional arsimor. Kjo qetësi është blerë pabesisht, duke futur duart në xhepat e familjeve shqiptare dhe duke bërë që dhjetëra mijëra familje ta investojnë kursimin e tyre, për të mbajtur qeverinë rehat.

Ashtu siç jemi zotuar, ne nuk do të kemi një ndarje artificiale, të dëmshme, siç ka ndodhur për vite të tëra, mes universiteteve të shtetit dhe universiteteve të privatit. Ashtu siç jemi zotuar, kontrollit të ligjshmërisë dhe kontrollit të cilësisë do t’i nënshtrohen të gjithë njësoj. Ndërkohë që, me ligjin e ri të Arsimit të Lartë, ne do të kemi praktikisht universitete publike të financuar nga shteti apo nga privatët, por që në renditjen e përgjithshme do të konsiderohen tërësisht të barabartë, në kushtet e konkurrencës dhe do të shkojnë përpara sipas meritës dhe jo disa të nënës e disa të njerkës.

E, kështu, ky kontroll bie plotësisht ndesh me një filozofi skandaloze të së kaluarës dhe e vendos këtë element si gur themeli. Konkurrencë dhe meritë për të gjithë, në mënyrë të barabartë. Ky kontroll mbyll një numër të konsiderueshëm universitetesh dhe programesh, qoftë në shtet dhe qoftë në privat, sot, pezullon një numër të konsiderueshëm programesh, qoftë në shtet dhe qoftë në privat, sot, dhe po ashtu, i njeh legjitimitetin dhe mbështetjen e mëtejshme një numri tjetër, të konsiderueshëm, universitetesh, qoftë në shtet dhe qoftë në privat sot, që i plotësojnë kushtet e ligjshmërisë.

Read More

Rektori i Universitetit të Korçës nën hetim

 

Gazeta Telegraf, 21.07.2014

Burime nga Prokuroria e rrethit Korçë bëjnë me dije se z. Gjergji Mero, rektori i Univesitetit “Fan S. Noli” të Korçës është paditur nga strukturat e Krimit Ekonomik, pranë Drejtorisë së Policisë së Shtetit të atij qarku. Mbi të rëndon akuza për vjedhje, shpërdorime dhe abuzime me detyrën, si dhe për korrupsion aktiv e pasiv.

Nga kancelaria e kësaj Prokurorie mësohet se hetimi i çështjes në fjalë i është ngarkuar prokurores D. Theodhori, e cila është edhe pedagoge e jashtme në këtë Universitet.

Read More

Dëshmi nga akademikë të punësuar në sektorin privat

 

Gazeta Dita, 9 qershor, 2014

 

Jam kthyer në Shqipëri me 28 euro në kuletë të mbetura nga bursa e muajit të fundit, pa bagazhe të pasurish, me të vetmin pishman të mbetur pas: tre kutitë me libra në shtëpinë e mikut tim lindor në perëndim. Kisha shpresë, gëzim, një PhD të mbaruar jashtë, dy prindër pensionistë që më donin afër dhe siç thashë, 28 euro në kuletë.

Tri javë më vonë më takuan me një personazh që nuk e njihja, i interesuar për prurjet e perëndimit, që premtonte punë të vërtetë akademike, mësimdhënie dhe kërkim shkencor, ofronte rrogë të mirë dhe impresionohej shumë kur ti përdorje emra shkollash anglo-saxone, sidomos kur i thoje në anglisht. Më tha “mos u prenoto” në tjetër vend, shprehje që më tingëlloi e çuditshme, por unë bëra siç tha ai, nuk “u prenotova” në tjetër vend.

Akti 1, SOS-Plagjatura

Si “e prenotuar” tashmë zyrtarisht për institucionin universitaro-kërkimoro-perëndimor të tij, veprimi im i parë prej akademiku ka qenë konstatimi i plagjiarizmit në një temë diplome që m`u ofrua për vlerësim. Plagjiarizmi sipas rregullores së institucionit ku tashmë punoja vlerësohej me 0 pikë dhe rezultonte në përjashtimin e studentit. Unë kreva të parën dhe të dytën sigurisht ua lashë në dorë njësive përkatëse në institucion. Pa dalë ende nga sekretaria ku kisha dorëzuar vlerësimin tim, ndjeva  pështjellimin që formohej rreth emrit tim. Unë, ajo e ardhura që andej, e kisha dorën të shtrënguar, isha e sertë, mendjemadhe, dhe mbi të gjitha kisha bërë të pabërën: në një ditë kohë të lënë për vlerësimin e temës së diplomës, unë e kisha lexuar atë!!

Të nesërmen e veprimit tim të parë prej akademiku, më pyetën nëse i qëndroja procesverbalit që kisha firmosur për temën plagjiaturë apo kisha dëshirë ta ndryshoja. Sigurisht që i qëndroja, kisha argumentuar qëndrimin tim në 4 faqe vlerësim, me të cilin vetë kolegët e mi të rinj në komisionin e diplomave, ishin tallur ndërsa rrufisnin makiaton e porositur nga bari poshtë në sallën lart.

Veprimi im i dytë si akademik ishte të jepja mësim. E mbaj mend si sot leksionin e parë, fytyrat e studentëve të ulur në fillim dhe të atyre nga fundi, që nuk prisnin një femër relativisht të shkurtër të mbante pa pushuar një leksion relativisht të gjatë.

Akti 2- Tatëpjeta

Veprimi im i tretë si akademik ka qenë të sugjeroja një grup potencial temash doktorature, duke qenë se institucioni universitaro-kërkimoro-perëndimor ku unë punoja tashmë, ishte bërë djepi i studimeve doktorale. Edhe pse isha mësuar që një kandidat potencial doktorature sugjeron vetë temën e tij, duke qenë se ka parakusht të paktën njohjen e disiplinës ku dëshiron të kryejë kërkim shkencor, sugjerova rreth pesë tema në profilin tim.

Këtu filloi e tatëpjeta! Temat e mia ishin të pakta në numër, unë duhej të sugjeroja një nën-disiplinë, brenda një disipline, që bashkuar me nën-disiplinat e tjera brenda disiplinave, të krijonin një drejtim. Unë duhet të shkruaja për boshte, akse, drejtëza, grupe boshtesh, tufa boshtesh, stiva boshtesh, në mënyrë të tillë që për çdonjërin prej numrit modest, elitar, të 300 prurjeve të reja për vitin e parë doktoral, të kishim vendin përkatës në bosht, aks, drejtëz, grup boshti, tufë boshti, stivë boshti…Këtu, mbase dëshira ime për të evituar gjeometrinë, aftësia e limituar e njohjes spaciale, kombinuar me presionin që gjithçka të bëhej gjeometrikisht dhe ligjërisht në rregull brenda afateve rekord, unë fillova të shpërqendrohem.

Një “akademik” i shpërqendruar nuk shërben për shumë, sidomos kur për të është e rëndësishme të përditësohet për të rejat e fundit në fushën e tij, por nuk gjen kohën e nevojshme për shkak të mbledhjeve të vona për boshtet, akset, tufat e stivat doktorale, sidomos kur numri i atyre që duhet të akomodohen, rritet me çdo arkëtim të bërë poshtë, të pasuar me një takim urgjent europiano-shkencor të bërë lart,

Akti 3- Rrumbullakosje

Veprimi im i katërt si akademik ishte të pyesja çdo të thotë pranim me kusht në një cikël pasues studimesh. Pyetja m’u shkoqit shumë shpejt: pranim me kusht në master është pranimi i atij/ asaj që nuk ka mbaruar ende bachelorin, me kushtin që një ditë ai (sigurisht) do ta mbarojë bachelorin dhe do të ketë avancuar në të njëjtën kohë dhe në master. I njëjti rregull vlen për doktoraturat. Tek këto të fundit, rregulli aplikohet mutatis mutandis jo vetëm në lidhje me studimet e mëparshme, por edhe për kritere të tjera pranuese, si p.sh. mesatarja apo gjuha e huaj. Pra, edhe nëse nuk përmbushen kriteret paraprakisht, ato prezumohen se do të përmbushen gjatë studimeve dhe çdo dyshim shkon në favor të të dyshuarit.

Veprimi im i pestë si akademik ishte të luaja pak me një urdhër për rrumbullakosje pikësh. Kisha vendosur një vlerësim jo kalues, i cili nëse do të rrumbullakosej do të shndërrohej në kalues, por kjo nënkupton sigurisht rrumbullakosjen në vlerën pasuese më të lartë. Vetëm se urdhri që më ish dhënë me firmën e atij që “prenotonte” akademikë, nuk specifikonte se çfarë rrumbullakosje duhej kryer, kështu që duke injoruar “common sensin” e institucionit perëndimoro-shkencoro-kërkimoro-doktoral ku punoja, unë e kryeva rrumbullakosjen, por në vlerën paraprijëse më të afërt! Pak dija që rrumbullakosje të tilla drejt së vërtetës së hidhur, do të bëheshin një ditë makthi i institucionit ku unë punoja!

Akti 4- Vari teneqen

Veprimi im i gjashtë si akademik ishte të korrigjoja provime, tashmë provimet formuese të doktoraturës: Fjalë e madhe, peshë e madhe, shaka e madhe! Urdhri i parë që morëm të gjithë ne të prenotuarit si akademikë, ishte që pyetjet e këtij provimi të madh të ishin brenda librave të pakët që dispononim realisht dhe jo brenda atyre që kishim deklaruar si tituj liderë për çdo drejtim, tufë boshti, apo rrënjë aksesh të doktoraturës. Problemi ishte që pavarësisht se institucioni kishte premtuar se titujt do të bliheshin, nga lart na vinte mesazhi se ata nuk ishin blerë, edhe pse nga poshtë kishte zëra se numri i atyre që ishin arkëtuar kalonte disa herë numrin e librave që duheshin blerë.  Urdhri i dytë i lidhur me veprimin tim të gjashtë prej akademiku, ishte që për të gjithë ata që nuk kishin kaluar provimin e madh të doktoraturës, t’u jepnim mundësinë të bënin një esse, me temë të lirë, që mund të varionte nga ciklet e udhëtimeve të shpendëve migruese, deri tek neo-liberalizimi i arsimit të lartë në Shqipëri. Vlerësimi i essesë më pas do të mblidhej me pikët e provimit, por të gjithë ne akademikët e prenotuar, kishim një problem të përbashkët: nuk na kishin thënë me sa pikë do të vlerësohej ky punim origjinal i kandidatëve doktoralë.

Këtu erdhi veprimi im i shtatë si akademik. artikulimi i pyetjes se përse duhej të dilte një rregull i tillë, se përse potencialisht dikush mund të merrte notën 12, në një provim që maksimalisht vlerësohet me 10 dhe përse duhej domsodoshmërisht të jepej një mundësi e trembëdhjetë për ata që nuk kishin njohuri kaluese. Përgjigja që mora ishte mishërim i njërës prej teorive më përparimtare në procesin mësimdhënës e mësimnxënës: Ne nuk kemi rregulla të qarta sepse i gjithë sistemi operon sipas parimit “learning by doing”, thënë shqip, ne mësojmë duke i bërë gjërat, ose thënë akoma më shqip “vari teneqen”! Prej veprimit tim të shtatë si akademik erdhi ai momenti që psikologët e quajnë “breakthrough”, ai casti ku muret që të kanë penguar të kuptosh, shëmben tërësisht. Prej veprimit tim të shtatë si akademik unë kuptova qartazi çdo të thoshte “prenotimi im”, atë frazën që më ish dukur e cuditshme dikur, tani e ndjeva të më rëndojë me gjithë qartësinë e saj mbi kokë. Qëllimi i institucionit ku unë isha “akademikja e prenotuar”, ishte larg nga të ofruarit e dijes, larg debatimit të ideve shkencore apo kryerjes së kërkimeve origjinale, qëllimi i tij ishte të përjetësonte brenda mureve të tij, krijesën që arkëtonte pa pushim nga cikli i parë i studimeve deri në infinit. Qëllimi i vërtetë i atij vendi ishte të fshihte numrin e vërtetë të klientëve, të shtonte radhët e tabelave ku ata listoheshin, dhe mbi të gjitha t`i vizatonte e reklamonte bukur konturet e këtyre tabelave: me ngjyrë të bardhë, transparente, të padukshme, numrat shtesë që nuk duhej kurrsesi të ishin, me ngjyrë blu, të fortë, të thellë, ata që mund të deklaroheshin. Qëllimi i institucionit po shndërrohej në institucionalizim të qëllimit dhe këtu, pashmangshmërisht, erdhi edhe veprimi im i tetë dhe i fundit prej akademiku: Dorëheqja!

Kam ikur prej andej pa bagazhe të pasurish, me dy rroga të kursyera e 28 euro në kuletë, me të vetmin pishman të mbetur pas: harresën e pafalshme që u kisha bërë tre kutive me libra në shtëpinë e mikut tim lindor në perëndim!

*P.S. Këtë shënim e kam pjesë të ditarit tim personal. Vendosa t’ua dërgoj pasi lexova në gazetën tuaj, artikullin: “Kur ta bën Çili inventarin… “. Kërkoj anonimat nëse vendosni ta botoni, sepse nuk dua të duket si betejë personale, ndaj me kast nuk kam pasqyruar në shënim dhe emrin e universitetit.

Read More

Universiteti i Sporteve – Akuza për keqmenaxhim

Gazeta Shqip, 23.05.2014
Një grup pedagogësh të Universitetit të Sporteve, kanë kërkuar kryerjen e një auditi të dytë, këtë herë administrativ, për punën e rektorit të pezulluar Vesel Rizvanolli. Sipas tyre, nuk bëhet më fjalë për shkelje financiare, por për abuzime të mëdha me dhënie diplomash false dhe pranime doktoraturash plagjiature. Sipas pedagogëve, edhe pse rektori është pezulluar, bashkëpunëtorët e tij, të evidentuar edhe nga auditi i Ministrisë së Arsimit, vijojnë punën dhe shkeljet.
Ndërkohë, ish-rektori Rizvanolli hedh poshtë akuzat e kolegëve për diplomat false, ndërsa deklaron se do të ndjekë rrugën ligjore për të kundërshtuar auditin dhe vendimin për pezullim. Ky vendim u mor ditët e para të këtij muaji nga ministrja e Arsimit, Lindita Nikolla, bazuar mbi shkeljet e rënda gjatë ushtrimit të detyrës, që gjeti auditi i brendshëm i këtij institucioni.

 Gazeta Sporti Shqiptar, Gjergji Vysha, 17.05.2014, 

Nga Gjergj Vyshka
Universiteti i Sporteve në Tiranë që nga 6 maji ka mbetur pa rektor, ndërsa Ministria e Arsimit dhe e Sportit ka pezulluar nga detyra Prof.Dr Vejsel Rizvanollin. Vendimi që është marrë një javë më parë nga kjo ministri është efekt i kontrollit audit, i cili ka monitoruar të gjithë veprimtarinë e këtij institucioni për periudhën janar 2012-nëntor 2013. Pezullimi nga detyra i rektorit Rizvanolli është bërë “Për shkak të shkeljeve të rënda të ligjit dhe akteve nënligjore në fuqi gjatë ushtrimit të detyrës”. Më konkretisht, auditi i brendshëm i Ministrisë së Arsimit ka zbuluar se 7 punonjës nuk janë emëruar sipas rregullores, pasi në procedurën e konkursit nuk është vendosur kriteri i diplomës, ndërsa tre pedagogë janë paguar për “Doktor Shkencash”, edhe pse nuk e mbanin atë gradë.
Po ashtu, rektori Rizvanolli ka shkarkuar pa procedurë dekanin Mehmet Spahiu dhe zëvendësdekanin Ferdinand Mara. Madje, sipas audititit të Ministrisë së Arsimit, edhe vetë zgjedhja e tij në prill të 2013-ës, për të dytën herë, në krye të Universitetit të Sporteve është i pavlefshëm pasi e gjithë procedura e zgjedhjeve në këtë universitet është realizuar nga komisione të paligjshme, që kishin marrë “ok-un” e vetëm 4 anëtarëve të senatit nga 9 anëtarë që ka senati. Aktualisht universiteti i Sporteve po drejtohet nga zv.rektori Juel Jarani deri në zgjedhjet e reja në këtë universitet.
- See more at: http://www.sportishqiptar.com.al/newsite/2014/05/17/ministria-e-arsimit-dhe-sportit-pezullon-rektorin-e-ust-se/#sthash.u7bNWTbU.dpuf

 
Universiteti i Sporteve në Tiranë që nga 6 maji ka mbetur pa rektor, ndërsa Ministria e Arsimit dhe e Sportit ka pezulluar nga detyra Prof.Dr Vejsel Rizvanollin. Vendimi që është marrë një javë më parë nga kjo ministri është efekt i kontrollit audit, i cili ka monitoruar të gjithë veprimtarinë e këtij institucioni për periudhën janar 2012-nëntor 2013. Pezullimi nga detyra i rektorit Rizvanolli është bërë “Për shkak të shkeljeve të rënda të ligjit dhe akteve nënligjore në fuqi gjatë ushtrimit të detyrës”. Më konkretisht, auditi i brendshëm i Ministrisë së Arsimit ka zbuluar se 7 punonjës nuk janë emëruar sipas rregullores, pasi në procedurën e konkursit nuk është vendosur kriteri i diplomës, ndërsa tre pedagogë janë paguar për “Doktor Shkencash”, edhe pse nuk e mbanin atë gradë.

Po ashtu, rektori Rizvanolli ka shkarkuar pa procedurë dekanin Mehmet Spahiu dhe zëvendësdekanin Ferdinand Mara. Madje, sipas audititit të Ministrisë së Arsimit, edhe vetë zgjedhja e tij në prill të 2013-ës, për të dytën herë, në krye të Universitetit të Sporteve është i pavlefshëm pasi e gjithë procedura e zgjedhjeve në këtë universitet është realizuar nga komisione të paligjshme, që kishin marrë “ok-un” e vetëm 4 anëtarëve të senatit nga 9 anëtarë që ka senati. Aktualisht universiteti i Sporteve po drejtohet nga zv.rektori Juel Jarani deri në zgjedhjet e reja në këtë universitet.

Read More

Akuza për Keqmenaxhim në Universitetin Politeknik të Tiranës

 


Bardhi Sejdarasi
6 maj 2014, Shqiptarja.com
(Shkrimi është modifikuar për të hequr pjesët jorelevante të ngarkuara me “hartizma” dhe akuza jothelbësore)
…

Akuza Nr. 1: Kolonat

1. …  Sekretari i Përgjithshëm i Ministrisë së Arsimit, në datën 17 Prill 2014, nëpërmjet një letre me nr 3/234/1, i kërkon “akademikut” informacion të plotë lidhur me disa shqetësime të depozituara në Ministrinë e Arsimit dhe Sportit. …
2. Në vitin 1995, me Urdhrin nr 10, datë 1/6/1995, Biblioteka Shkencore Universitare kaloi në pronësi të Universitetit Politeknik të Tiranës (BSHUPT). Deri në vitin 2005, tre të kartërtat e godinës ishin pjesë e BSHUPT. Një marrëveshje mes ish-rektorit të UPT, Përparim Hoxha dhe ish-rektorit të Universitetit të Tiranës (UT), Shezai Rokaj i siguron katin e dytë të BSHUPT Rektoratit të UT.
Nuk gjendet askund, asnjë gjë e shkruar për këtë tjetërsim prone, as marrëveshja si e tillë.
Të dy rektorët e mësipërm kanë qenë në detyrë, kur në hapësirën mes BSHUPT dhe Muzeumit Arkeologjik (tani Instituti Albanalogjik) u ndërtuan “Kolonat”, një fast-food, që ka një histori të çuditshme pagesash për kontrata qeradhënie që nuk është e lehtë t’i gjesh.
2. Në vitin 2007, në muajin korrik,…  kërkesa për  Bar-Kafe ( e ngjashme me atë të bërë në krahun tjetër, pra tek Instituti Albanologjik) nënshkrohet nga Prof. Përparim Hoxha, mbante nr 408/1 prot dhe datën 04/06/2007 dhe i dërgohej Arben Palit, drejtor i BSHUPT.
3. Kryetari i Bashkisë, Rama, ishte i ndjeshëm ndaj kësaj kusarie dhe e bllokoi menjëherë. Z. Edi Rama ishte kryetar i Bashkisë së Tiranës, një SMS e ka detyruar të dërgojë Inspektoratin Urbanistik Vendor të bllokojë punimet brenda BSHUPT. 
Mbrapa saj (kafese) ishte një deputet dhe eksponent i PD, gjithashtu edhe ministër. Por “ruspa” e Bashkisë e bllokoi ndërtimin, ndërsa për “kthimin në identitet” të punimeve ilegale të ish-ministrit të PD, pagesa u firmos nga paratë publike të UPT, firmosur tashmë nga “akademik” Jorgaq Kaçani.

4. Ky është dëmi më i vogël i shkaktuar nga papërgjeshmëria e një drejtuesi të institucionit publik.
Ndërtimi i fast-food “Kolonat”, solli shkatërimin e plotë të fondit të librit të bibliotekës. Bllokimi i dritareve të ajrimit dhe ventilimit e nxori jashtë përdorimit katin e poshtëm të bibliotekës, 2.5 herë më e madhe se sipërfaqja e katit të parë! As rektori Përparim Hoxha, as drejtorët e biblotekës nga viti 2005 deri në 2008 nuk e shpëtuan dot kalbjen dhe mykjen e mijëra librave në këtë fond. Në 3 Mars 2008 Drejtoria e Shëndetit Publik merr një kërkesë të drejtorisë së BSHUPT, për të inspektuar mjedisin, sepse në të punonin një numër i konsiderueshëm punonjësish, shëndeti i t ë cilëve rrezikohej seriozisht.
5. Ministri i Shëndetësisë i kohës reagon. Ai ngarkon Drejtorinë e Shëndetit Publik dhe Inspektoratin Sanitar Shtetëror të verifikojnë shqetësimin e drejtorisë së BSHUPT. Në procesverbalin me nr 43, dt 10/09/2008, të firmosur nga Dr. Vili Sinjari dhe I. Prifti, mbështetur në ligjin nr 7643, dt. 02.12.1992 “Për Inspektoratin Sanitar Shtetëror” (nenet 14, 17) dhe ligjeve nr. 9636, dt. 06.11.2006 dhe nr. 9518, dt. 18/04/2006, u vendos: “Ky ambient është i papërshtatshëm, ndikon në shëndetin e punonjësve dhe përbën rrezik për ta” si dhe u rekomandua: “Të hiqet i gjithë fondi i librit i mykur, të riparohet i gjithë ambjenti, të hapen dritaret, të vendoset sistemi i ajrimit, të rregullohen kanalizimet”.
Ky dokument i Ministrisë së Shëndetësisë, iu dërgua “akademik” Kaçanit me shkresën nr. 105 prot, datë 19.09.2008, shkresë në të cilën i shpjegohen rekomandimet e MSH dhe -citoj- i: “kërkohet ndërhyrje e shpejtë për të shpëtuar çfarë mundemi nga fondi i rëndësishëm i librit”  si dhe i propozohet- citoj- “ngritja e një komisioni të përbashkët të bibliotekës dhe administratës së UPT për të parë konkretisht gjendjen dhe për të përcaktuar disa masa për përmirësimin e gjendjes si dhe për të përgatitur një projekt për një ndërhyrje rehabilituese të shpejtë”.

6. Në datën 06/02/2009 me shkresën nr 31 prot, “akademik” Kaçanit i dërgohet “Informacion mbi gjendjen e rënduar të mjediseve të fondit të librit”, ku i shpjegohet se “sipërfaqja 2,5 herë më e madhe se sa hapësira aktuale e BSHUPT, (që shtrihet në kufijtë: Lindje-Sheshi Italia, Perëndim- Sheshi “Nënë Tereza”, Veri- Muzeu Arkeologjik (fondi shtrihet gjatë gjithë hapësirës mbi të cilën ngrihet fast-food “Kolonat”, Jug-Rruga e Sheratonit), ndodhet në një gjendje të rënduar”. “Akademikut” nuk ia ndjen akoma! Sinjalizohet përsëri se “është dëmtuar çatia, si rezultat i punimeve të kryera nga subjekti “Kolonat”, duke sjellë sipërfaqe të suvasë të rrëzuara dhe futje të lagështirës nga ujrat e bardha dhe të zeza të lokalit”.

Vihet në dijeni nga drejtuesi i institucionit se “në pjesën e dritareve të ajrimit është bërë bllokimi i tyre me material të ngurta, që kanë sjellë jo vetëm mungesën e ventilimit natyral, por janë bërë shkas edhe për depërtimin e ujrave të shiut”. I thuhet se “në veriperëndim të godinës, hedhja e mbeturinave të ngurta ka kufizuar mundësinë e ventilimit dhe ka rritur sasinë e lagështirës”. “Akademikut” nuk ia ndjen edhe njëherë tjetër.

7. Pak vite më vonë, kur mjediset e katit përdhes u shkatërruan plotësisht, ka pasur një tentativë për të ndërtuar një parkim të nëndheshëm në sheshin “Italia”, i bllokuar jo thjesht sepse askush nuk investoi, (edhe pse vendimi u zbardh “sa hap e mbyll sytë”), por sepse inxhinierët projektues mësuan se kati përdhes i BSHUPT kishte një udhë nëntokësore, të projektuar nga italianët (Projekti mban shënimin Vizatimi nr. 17, Romë, 09/12/1939- Arkivi Bosio- i azhornuar në Tiranë më 26/04/1940), e cila do të përdorej për të lidhur sheshin e sotëm “Nënë Tereza” me dhomat e larjes së futbollistëve në Stadiumin “Qemal Stafa”. (Nuk mund ta konfirmoj dot këtë, sepse ka qenë e pamundur të hysh në nënkatin e BSHUPT!)

8. Ministrja Lindita Nikolla, pas letrave të pafundme në adresë të saj,  nxjerr Urdhrin nr. 106, dt. 28.03.2014 dhe ia dërgon ‘akademikut” me nr. 2176 prot.,  ku i kërkon t’i përgjigjet në mënyrë shkresore,  sidomos pikave 1, 3, 8, 15, 18, 26, 32 dhe 35!
9. A ka lidhje kjo me lënien në mëshirë të fatit të katit përdhes të BSHUPT? A kanë gisht dy rektorët e fundit në ndonjë aferë korruptive? Kjo është një çështje e prokurorisë, tashmë dhe jo e artikullshkruesit!

Reagimi nga Kontrolli i Lartë i Shtetit

10. Leskaj thuhet që ka njohje të vjetër me “akademik” Kaçanin! Punë e tyre! Njohja është një gjë, puna e shtetit është një gjë tjetër. Kontrolli i Lartë i Shtetit nuk ka gjetur “asgjë” në shkelje të ligjit dhe akteve nënligjore në Universitetin Politeknik. Raporti i kontrollit nuk është bërë publik, por disa pyetje duhen shtruar edhe për kryekontrollorin:

1. A ka informacion vlonjati Leskaj për dëmin që ka shkaktuar vlonjati Kaçani në katin përdhes të BSHUPT? (kujtojmë se janë mbi 45 mijë tituj librash që i mungojnë inventarit të kësaj biblioteke- kontrolli i KLSH është bërë këtë pranverë!);
2. A ka informacion z. Leskaj se, duke shkelur në mënyrë të përsëritur (prej vitit 2011) vendimet e Këshillit të Administrimit të UPT, z. Kaçani ka emëruar punonjës e ka ndarë tituj si ofiqe personale apo ndere, në kundërshtim me vendimet e Këshillit Administrativ, duke dëmtuar financiarisht arkën e shtetit dhe të institucionit (çdo titull i dhënë ka koston 10 mijë lekë/muaj më shumë në pagë!)
3. A ka identifikuar Leskaj ndonjë shkresë si psh. atë të drejtores së burimeve njerëzore, e cila paguhet sikur ka mbaruar doktoraturën, ndërsa doktoraturën nuk e ka mbaruar akoma. Ose më drejtpërdrejt; a e kanë parë inspektorët e Leskajt se vetëm dekania e Fakultetit të Teknologjisë së Informacionit (FTI) nuk e ka respektuar një urdhër kaçanian për të paguar të gjithë kandidatdoktorantët me pagën e atij që mbaron doktoraturën?! Mbase edhe këtu ka vend për të parë përdorimin e parave publike që vijnë nga taksapaguesit shqiptarë apo nga kuotat e studentëve!
4. A ka dijeni KLSH dhe madje edhe ministrija Nikolla se, gruaja e vlonjatit Kaçani punon në Institutin e Gjeoshkencave, që varet nga “akademiku” Kaçani, se Neritan Shkodrani, shef katedre në Fakultetin e Inxhinierisë së Ndërtimit, ka gruan drejtore të BSHUPT dhe vëllanë, Migen Shkodrani, drejtor të prokurimeve, institucione që varen drejpërdrejt nga “akademik” Kaçani?
5. A ka dijeni KLSH dhe znj. Nikolla që, Përparim Deçolli, profesor i FIM dhe i ngarkuar për Qendrën e Sigurimit të Brendshëm të Cilësisë së Rektoratit, ka vajzën specialiste të statistikave në UPT, kur ajo thjesht ka mbaruar për psikologji!?
6. A i ka gjetur z.Leskaj dhe inspektorët e tij “letrat” e punonjëses N.Suparaku, sekretare e Dekanes së FIE, që punon në të njëjtin dekanat me burrin e vet?!
7. A e di z. Leskaj dhe inspektorët e tij se kancelarja e inxhinierisë së Gjeologji-Minierave është transferuar nga kancelare e këtij fakulteti, në postin e kancelares së Inxhinierisë së Ndërtimit me arsyen kaçaniane “se i biri i kancelares duhet të ishte pedagog te fakulteti i Gjeologji-Minierave”?!

 

Akuza Nr. 2: Shtesa e UPT

Shumë njerëz e kujtojnë se si Artanët, Lame dhe Shkreli, pak para zgjedhjeve të qershorit, dolën në media, pikërisht prapa kurrizit të Korpusit Qendror të UPT, duke kundërshtuar projektin për shtesën e UPT në dëm të Parkut Kombëtar të Tiranës.
1. U mor vendimi për shtesën e UPT, u përzgjodh kompania dhe filloi punimet. Kjo ishte dhe është e vetmja kompani që fiton tendera në UPT.

2.  Kompania nuk kishte përvojën e duhur në punime të tilla. Gjatë procesit u punua pa një projekt të qartë, nga gërmimet u lëviz nga vendi një nga faqet anësore të godinës ekzistuese, duke e dëmtuar seriozisht konstruksionin ekzistues.
3. Kush foli për këtë u “kërcënua” deri edhe me vendin e punës. Kush nuk foli dhe firmosi, u bë… ”zëvendësrektor”! Sot, në katin e parë të Korpusit Qendror mund t’i gjesh ende “zgavrat” e gabimit fatal të kompanisë.
4. Por gabimi më fatal është urdhri i “akademikut” për të ngritur një grup pune që të firmoste se nuk ka “asgjë” për t’u shqetësuar! Në këtë grup bënin pjesë vartësit e Kaçanit, por edhe drejtuesi i punimve, inxh. A. Sevrani! Si ka mundësi, edhe të drejtosh punimet, të bësh “zarar” dhe të firmosësh se “nuk ke bërë zarar?”. Edhe këtu mbase më shumë gjëra i duhen bërë të njohura prokurorisë sesa media-s! Por sidomos z. Bujar Leskaj!
5. Ministrja Lindita Nikolla e ka tashmë një dosje të plotë të të gjithë asaj që ka ndodhur dhe është përgjegjësi e saj nëse nuk vë para përgjegjësisë autorët.  Ajo do të ndodhet, afër apo vonë në kohë, përballë ndonjë katastrofe kur t’i gjejë studentët nën inerte, sepse  riparimi i bërë “natën” nuk do të mund ta shpëtojë godinën ekzistuese nga gafa e “meremetimit” të zgavrës së hapur nga gabimi inxhinierik dhe mungesa fatale e përvojës!

Read More

Prokurimet në UPT

 

Autoriteti i Konkurrëncës, i ka vendosur gjobë një subjekti privat të sigurisë për mashtrim në lidhje me procedurat e prokurimit të shërbimit nga Universiteti Politeknik. Më poshtë pjesë nga vendimi (http://www.caa.gov.al/uploads/decisions/vendimi_240_i_gjobave.pdf)

Në tenderin e zhvilluar nga Autoriteti Kontraktor Universiteti Politeknik, datë 28/07/2011, me fond limit 9,950,304 lekë; marrin pjesë “Toni Security” me vlerën 9,937,200 lekë; “Eurgjici Security” me vlerën 9,946,560; “Eurogjici Security 1” me vlerë 9,949,992; si dhe Therepeli (i skualifikuar) me vlerë 8.330.088 lekë dhe fiton Toni security me 99.87% te fondit limit mbështetur nga “Eurogjici Security” me 99.96% te Fondit Limit dhe Eurogjici Security 1 me 100% të Fondit limit. Sipas këtyre vlerave të paraqitjes së ofertave rezulton se ndërmarrjet nën hetim kanë zbatuar skemën e ofertës së mbuluar, duke paraqitur një ofertë më të lartë për të mbuluar ndërmarrjen fituese “Toni Security”.

Edhe në këtë rast, gjatë shqyrtimit të dokumenteve të dorëzuara nga ofertuesit në këtë tender është vënë re se ka shenja te ngjashme si: Formulari i Deklarimit të Ofertës tek te tre konkurrentet “Eurogjici Security”- “Toni Security”-“Eurogjici Security 1”: ka te njejtin lloj shkrimi, te njejten date, te njejten fjalë me bold; Formulari i Cmimit të Ofertës: “Eurogjici Security”- “Toni Security”- “Eurogjici Security 1”: Tek të tre konkurrentët është i njëjti lloj shkrimi, i njejti bold, i njejti gabim tek fitimi i shoqerise, preventivat e llogaritjes kane te njejtin lloj shkrimi, thonjëzat e përdorura në përshkrimin e emrit janë të vendosura mbrapsht për të tre ndërmarrjet, si dhe tek përshkrimi i kontratës ka thonjëza vetëm mbyllëse për të treja;

Ekstrakti i Regjistrimit në QKR: Toni Security - Eurogjici Security 1”: Data e leshimit eshte e njejta per te dy konkurentet - 31.03.2011; Vertetimi i leshuar nga Zyra e përmbarimit Tiranë: Eurogjici Security- Eurogjici Security 1: Data e leshimit eshte e njejta per te dy konkurentet 04.04.2011 dhe me numer te prot. të njepasnjëshëm 1752-1753; Vertetimi i leshuar nga Drejtoria Rajonale Tatimore Tirane për xhiron vjetore: “Eurogjici Security”, “Eurogjici Security 1”: Data e leshimit eshte e njejta per te dy konkurentet 25.03.2011; Vërtetimi i leshuar nga Instituti i sigurimeve shoqërore për kontributet e sigurimeve shoqërore dhe shëndetësore i Eurogjici Security dhe Eurogjici Security 1: Data e leshimit eshte e njejta per te dy konkurentet 26.01.2011; “Toni Security“ - “Eurogjici Security 1”: Janë paraqitur të njëjtat foto të punonjësve të shërbimit; 2 (dy) Fatura tatimore shitje me nr. te njepasnjeshem 25 dhe 26, date 25.01.2011, njera e “Toni Security“ dhe tjetra e “Eurogjici Security 1” ne ane te te cilave blejnë të njëjtat materiale nderlidhje nga firma Union shpk; Kontratë qeraje me numër të njëpasnjëshëm 290, 291, të datës Janë paraqitur të njëjtat foto të punonjësve të shërbimit; 2 (dy) Fatura tatimore shitje me nr. te njepasnjeshem 25 dhe 26, date 25.01.2011, njera e “Toni Security“ dhe tjetra e “Eurogjici Security 1” ne ane te te cilave blejnë të njëjtat materiale nderlidhje nga firma Union shpk; Kontratë qeraje me numër të njëpasnjëshëm 290, 291, të datës 21.03.2011, midis “Toni Security, “Eurogjici Security 1” me “Eurogjici Security” me objekt të njëjtë “Dhënie me qera ambjenti për zyrë”; Deklaratë e grupit të gatshëm Toni Security, Eurogjici Security 1, Eurogjici Security shpk me përmbajtje te njëjte dhe titull te njëjtë;. …

Read More

Tatimet godasin arsimin privat

 

Dokumente:

1. Lista e subjekteve të amnistuara nga detyrimet tatimore dhe gjobat (Gazeta Panorama)
2. Vendim i gjykatës së Apelit për rastin Vitrina paditur nga ish-rektori Lulzim Hana.
3. Procesverbal i Komisionit të Medias Dhe Edukimit në Parlament, datë 28 Maj 2012

Në 2012-13 Drejtoria e Tatimeve u vendosi gjoba disa subjekteve të arsimit privat për mos-deklarim të të ardhurave dhe pagesat për kontributet sociale për personelin akademik e të shërbimit.
Këto gjoba iu falën disa subjekteve me amnistinë e radhës se qeverisë së radhës (shih listën e subjekteve të amnistuara nga Gazeta Panorama) por shume pak shkollave të larta private (shih p.sh. shkollës së lartë “Universiteti Amerikan” dhe Turgut Ozal Education.)

Shkollat e larta private kanë  probleme me pagesat e pedagogëve dhe zbatimin e kuadrit ligjor. Vitrina p.sh. është hedhur në gjyq nga ish-rektori i shkollës, z. Lulzim Hana, për mospagim, ndërprerje të kontratës (shih vendimin e gjykatës së Apelit). Siç dëshmon gjyqi, marrëveshja ndërmjet rektorit dhe administratorit ishte informale përsa i përket masës së pagesës (deklaruar 250 000 lekë/muaj dhe jepej 2500 euro/muaj).

Sipas Deputetes Enkelejda Shkreli: “Kur shikon referencat tatimore, një pjesë e mirë e AL-ve private, për shkak të numrit të pakët të studentëve që kanë, nuk arrijnë dot ta mbyllin bilancin, të paktën kështu deklarojnë. Deklarimet te tatimet për këto shoqëri janë krejt të ndryshme nga realiteti. Sigurimet shoqërore të rektorëve dhe dekanëve janë baras me ato të punonjësve sanitarë.” (Procesverbal i Komisionit të Medias Dhe Edukimit në Parlament, datë 28 Maj 2012).
Më poshtë paraqitet rasti i shkollës së lartë Ndërkombëtare të Tiranës në konfliktin me tatimet.

Gazeta Rilindja Demokratike, 26.04.2014

Policia rrethon Universitetin, mbi 400 studentë pa mësim

Rreth 400 studentë të Universitetit Ndërkombëtar të Tiranës nuk u lejuan dje nga policia që të futen në ambjentet e tij për të zhvilluar mësim. Forcat e policisë të Komisariatit Nr.1 dhe forcat tatimore rrethuan godinën e Universitetit Ndërkombëtar të Tiranës pranë zonës së njohur si Vilat gjermane, duke mos lejuar studentët dhe stafin akademik të zhvillojnë orët e mësimit.
Inspektorët e Hetimit Tatimor bënë të ditur se, bllokimi i Universitetit Ndërkombëtar të Tiranës është bërë për arsye se nuk është shlyer një detyrim prej 40 milionë lekësh. Dhjetëra forca policore kanë rrethuar universitetin dhe nuk lejuan asnjë student që të futej në ambientet e marrjes së dijes. Studentët protestuan, duke hedhur parulla të ndryshme si: “Duam mësim”, “Shtet policor”, etj.

Drejtuesit e Universitetit bënë të ditur se, detyrimet financiare janë paguar në masën që parashikon ligji dhe për këtë kishte një marrëveshje me Drejtorinë Rajonale të Tatimeve të Tiranës, e cila nuk e respektoi marrëveshjen për negocimin e borxhit (interesa dhe gjoba), duke bllokuar godinën dhe ndërprerë mësimin.
“Në mënyrë të çuditshme jemi njohur me një borxh, sikur shoqëria që financon universitetin ka një borxh ndaj shtetit, rreth 40 milionë lekë të reja. Ne dje kemi paguar në mënyrë të plotë vlerën e detyrimit tatimor.
Në vend që të negociojmë dhe të paguajmë, sipas ligjit tatimor, pjesën tjetër me këste, ku afati i kësaj pagese është deri në dhjetor të vitit 2015, Drejtoria Rajonale e Tatimeve të Tiranës së bashku me drejtoreshën e Përgjithshme të Tatimeve, zonjën Briseida Shehaj, vendosën të sekuestrojnë pasuritë e luajtshme të Universitetit, të cilat nuk kalojnë 10 për qind të borxhit që pretendojnë. Dua të theksoj se, detyrimi që pretendojnë Tatimet nuk është i mbështetur me të ardhurat reale të UNT-së”, deklaroi Presidenti i UNT-së Vladimir Mulaj.

Më tej, Mulaj theksoi se DPT e shkeli ligjin tatimor Nr.9920 në mënyrë të hapur, shkeli ligjin e Arsimit të Lartë, shkel Kushtetutën dhe një serë ligjesh të tjera. “Objekti i punës së DPT-së është vjelja e tatimeve dhe mbushja e buxhetit të shtetit me para, por pa shkelur parimin e shenjtë në ekonominë e tregut partner me biznesin. Në këtë rast DPT-ja nuk e trajton UNT-në si partner, por me dhunë kërkon ta mbysë. Me këtë rast, po përmend shprehjen e Çurçillit ku thotë që, Qeveria nuk duhet ta trajtojë biznesin si një lopë që vetëm duhet ta mjelë, por duhet trajtuar si një kalë që mezi tërheq karrocën e ngarkuar”, përfundoi Mulaj.
Rektori i Universitetit Ndërkombëtar të Tiranës, Agron Lamaj, është shprehur se vlera e detyrimit tatimor është shlyer në mënyrë të plotë, ndërsa theksoi se pas kësaj, normalisht duhej të negociohej për pagezën tjetër siç e ka ligji tatimor. “Me mua nuk ka pasur asnjë komunikim. S’kemi dijeni për këtë punë, vetëm kur gjetëm sot derën e mbyllur. Organi tatimor në mënyrë të njënashme ka ndërprerë negociatat”, deklaroi për mediat Rektori Lamaj.

“Nuk mundet kurrsesi policia, tatimorët, çdo lloj organi tjetër të venë dorë në institucione që kanë karakter akademik. Autoritetet respektive të mos ngatërrojnë aspektet tatimore-fiskale me funksionimin e pandërprerë akademik të institucioneve universitare”, u shpreh Lisen Bashkurti, zëvendësrektor i UNT-së.
Drejtuesit e Univesitetit dhe studentët deklaruan se, protesta do të vazhdojë deri në zgjidhjen përfundimtare të situatës, pasi bllokimi i godinës është bërë në kundërshtim me ligjin.

Read More

Politizimi

Politika në universitete publike.

(publikuar tek Peizazhe.com, nga autori)

Rektori i Universitetit të Prishtinës dha dorëheqje nën trysninë e revoltave studentore. Në hapësirën shqiptare është hera e parë që studentët të revoltohen ndaj politizimit të drejtuesve në institucionet e arsimit dhe pasojave që kanë sjellë ndërhyrjet mbi cilësinë.

Zakonisht në Shqipëri problemi ka qenë mobilizimi i studentëve për qëllimet politike të dy partive kryesore, derisa të dyja partitë ranë dakord ta depolitizojnë universitetin me ndërhyrjet në ligjin e arsimit të lartë (2007). Në ligj u ndalua angazhimi politik i Këshillave Studentorë (Neni 55) dhe morri fund tradita e pas-dhjetorit të viteve ’90 ku studentët mobilizoheshin në greva urie me porosi të dy kampeve.

Por ndërhyrja e pushtetit politik u përqëndrua në drejtimin e universiteteve publike. Nëse do të bënim një shkrepje të momentit për situatën aktuale në Shqipëri vërejmë se në 14 institucione publike (shih tabelën), vetëm në katër prej tyre nuk mund të evidentohet ndërhyrja politike në zgjedhjen e rektorit apo drejtuesit.

Rektorët janë figura të rëndësishme publike dhe për partitë politike mishërojnë një kapital social që gjeneron vota të konsiderueshme. Por ndërhyrjet politike në zgjedhjen e rektorëve kufizojnë autoritetin dhe kapacitetet e drejtuesve për të drejtuar në mënyrë efikase dhe konform ligjit. Ndërhyrja e politikës krijon varësira, të cilat kushtëzojnë ndjeshëm funksionimin e rektoratit në procedurat e rekrutimit dhe të promovimit të akademikëve (ndikimet joformale në vendimmarrje). Gjithashtu, ndërrimet e pushtetit qëndror politik mund të ndëshkojnë rektorin dhe rrjedhimisht universitetin, duke ja përcjellur koston studentëve.

Nga ana tjetër universiteteve u përshtatet një rektor që ka marrëdhënie positive me qeverinë e që mundëson rritjen e fondeve për investime kapitale (rritjen e hapësirave fizike të universitetit), në burime njerëzore (rritjen e numrit të pedagogëve). Personeli akademik gjendet në një pozicion më të volitshëm nëse ka një rektor të favorizuar nga politika (p.sh. në një qytet bastion të një partie apo të kontestueshëm).

Sidoqoftë, në tërësi ky ndikim nuk ka rezultuar pozitiv, sidomos kur sapo u ndërrua pushteti, disa rektorë, kandidatë për deputetë të PD-së, janë përballur me akuza nga mediat dhe policia.

Më poshtë paraqiten disa prej akuzave ndaj drejtuesve aktualë:

1. U-Elbasanit: Ndjekje penale ndaj Prof. Dr. Liman Varoshit për favorizim të një subjekti në procedurat e prokurimit të shërbimeve jo-akademike.

2. U- Tiranës : Akuza ndaj rektorit Prof. Dr. Dhori Kule nga gazeta Panorama për abuzime me financat e universitetit bazuar mbi raportet e Kontrollit të Lartë të Shtetit. Profesor Hysamedin Feraj akuzon Dhori Kulen për tejkalim kompetencash dhe paaftësi për drejtimin e institucionit, duke vërejtur se shkak për këtë janë edhe lidhjet e tij politike.

3. U - Gjirokastrës: Rektori Prof. Dr. Gëzim Sala është nën hetim për “shpërdorim detyre” dhe “falsfikim dokumentash”, por kjo çështje u pushua më vonë nga prokuroria.

4. U – Vlore: Rektorit Prof. Asoc. Albert Qarri i digjen dy makinat.

5. U- Sporteve: I vidhet zyra, shkak luftërat e brendshme pasi zgjedhja e tij si rektor ishte perceptuar si e paligjshme.

6. U-Arteve: Rektori akuzohet për parregullsi në procedurat e rekrutimit.

7. Akademia e Shkencave: Akuza nga anëtarët Jorgaq Kacani, Dëfrim Shkupi etj. se ish-Kryeministri Berisha ka ndërhyrë në zgjedhjen e tij si kryetar.

8. Në vitin 2012 u ndryshua ligji i arsimit të lartë me nismë të LSI për të lejuar rektorët aktualë të kandidonin një mandate të dytë. Përfituan nga ky ndryshim universitetet e Tiranës, Gjirokastrës, Korçës dhe Elbasanit.

 

 

Universiteti	Rektori/Kryetari	Partia	Funksioni partiak
USH	Artan Haxhi	PD	Kryetar i Bashkisë Shkodër 2003
U-Tiranë	Dhori Kule	PD	Anëtar i Këshillit Kombëtar / Kandidat per Deputet
U-Elbasan	Liman Varoshi	PD	Kandidat për deputet 2013
U – Gjirokastër	Gezim Sala	X	-
U-Durrës	Mit’hat Mema	X	-
U-Vlorë	Albert Qarri	X (LSI?)	-
U-Korçë	Gjergji Mero	PD	Kandidat Kryetar Bashkie – 2013
U-Politeknik	Jorgaq Kacani	X	-
U-Arteve	Petrit Malaj	PS	Anëtar i Asamblesë
U-Mjeksisë	Jera Kruja	PD	Kandidate për deputete
U – Bujqësi	Fatos Harizaj	X	-
U – Sporteve	Vesel Rizvanolli	PD	Anëtar i Këshillit Bashkiak – 2011
Qendra e Studimeve Albanologjike	Ardian Marashi	?	-
Akademia e Shkencave	Myzafer Korkuti	X (PD?)	-

Read More

UT-konflikt-media

 Universiteti i Tiranës fiton betejën

Dokumente: Grumbull artikujsh të cituar

5 Dhjetor, 2013, Shqiptarja.com
Sipas Gazetës Shqiptarja.com “Ministri Arben Ahmetaj ka anuluar kontratën e lidhur në gusht të këtij viti nga qeveria Berisha në ikje, me të cilën i jepej një universiteti privat konvikti i Gjuhëve të Huaja në kryeqytet, duke ja hequr atë Universitetit të Tiranës.”

Dhori Kule, Rektori i UT në sulm frontal nga institucionet private

(nga Peshkupauje, 10 Korrik 2012, shkruar nga arsimi.info/bulkthi)
 
Kur rektori i Universitetit të Tiranës këmbënguli të merrte godinën e ish-konviktit të shkollës së mesme të gjuhëve të huaja, e cila i ishte premtuar për qira shkollës së lartë private “Universitetit Luarasi” nëpërmjet një procedure të dyshimtë tenderimi, ndaj rektorit filloi një sulm mediatik.
Shkolla e lartë private “Luarasi” është në pronësi të Focus Group (pronar të gazetës “Panorama“, portalit “BalkanWeb” dhe kanalit televiziv “News24”). Edhe biznesi i arsimit në Shqipëri ndjek gjurmët historike të sipërmarrësve shqiptarë, ku cdo biznes duhet të ketë median e tij për të mbrojtur dhe nxitur investimet. Universiteti Europian i Tiranës ka gazetën “MAPO”, shkolla e lartë private “Kristal” ka televizionin “Planetar”, Albanian University= UTV, “Vitrina” ka nxjerrë një pacavure rrugëve falas “77” etj.

Më poshtë paraqitet konflikti ndërmjet Dhori Kules dhe mediave.

1. Kule, i rrahur me sulmet e tërthorta ndaj qeverisë, jo gjithmonë për interes personal, por kryesisht po, nisi një konflikt me Focus Group duke u prishur pazarin, sic raporton gazeta Shqiptarja.com.
“Universiteti i Tiranës i ka dërguar një shkresë zyrtare kryeministrit Berisha, që t'i kalojë nën administrim godinën e konviktit të Gjuhëve të Huaja. Senati vendosi t'i drejtohet kreut të qeverisë, pasi vetë bashkia u ka dhënë një përgjigje negative për këtë kërkesë, ndërkohë që ka nisur procedurat për t'ia dhënë me qira universitetit privat "Luarasi".”

2. Focus Group u hodh në sulm duke akuzuar Kulen se kishte mashtruar pedagogët e fakultetit të gjuhës angleze, të cilët do të transferoheshin. Ky ishte faktikisht një konflikt i hershëm i rektoratit me dekanatin e fakultetit, ku edhe Ministria e Arsimit dhe Shkencës nuk ishte shprehur:

Gazeta Panorama: “Rektori i Universitetit të Tiranës Dhori Kule, mashtron publikisht lidhur me propozimin e tij, për të shkurtuar 28 pedagogë të Fakultetit të Gjuhës Anglezë dhe transferimin e tyre pranë 7 Fakulteteve të tjera me qëllim shkatërrimin e Fakultetit të Gjuhëve të Huaja. Ndërsa, Kule deklaron se në këtë Fakultet do të shtohen pedagogët, dekania Klodeta Dibra ka në duar të saj vendimin për shkurtimin e stafit.”

3. Dhori Kule u bë më pas edhe shënjestër e sulmeve të opozitës, të cilët gjatë zgjedhjeve të rektoratit kishin synuar vendin e rektorit nëpërmjet Mimoza Hafizit.

“Largimi i 28 pedagogëve nga Departamenti i Gjuhës Angleze përbën shkelje të ligjit për arsimin e lartë. Dje, në Komisionin e Medias dhe Edukimit, vendimi i propozuar nga rektori Dhori Kule është shoqëruar me akuza të forta nga deputetët e opozitës.”

4. Pas problematikave me maturën shtetërore Dhori Kule hap një front tjetër sulmi dhe lëshon një batare ndaj Ministrisë së Arsimit dhe Shkencës duke iu përgjigjur kështu elektoratit të tij. Ai kërkon që provimet e pranimit të studentëve të kryhen pranë universiteteve. Matura shtetërore është vendosur në 2006 për të organizuar pranimin e studentëve në programet përkatëse të studimit. Më parë sistemi i shpërndarjes organizohej nga universitetet që kryenin provime hyrëse sipas profilit. Procesi karakterizohej nga korrupsioni i pamatë, shitje tezash dhe kërkesa deri në 20 000 $ për pranim në Fakultetin e Mjekësisë.

“Matura Shtetërore ka dështuar plotësisht ndaj nevojiten modele si ato të universiteteve evropiane. Ky është qëndrimi i shkollave të larta publike, veçanërisht pas skandalit të daljes së tezes së provimeve me zgjedhje. Kreu i Universitetit të Tiranës, Dhori Kule, duke përjashtuar rikthimin e konkurseve, i kërkon Ministrit të Arsimit aplikimin e modeleve të reja për pranimet në universitete. Sipas Kules provimet e Maturës duhet të jenë si vite më parë, kusht për të marrë shkollën e mesme, raporton Vizion Plus.”

5. Dhori Kule sulmohet më pas edhe nga Ndricim Kulla në gazetën “Panorama”.
“Atëherë kemi gjithë të drejtën të pyesim: po cilat janë vallë kredencialet akademike të zotit Kule? Mos vallë koniunkturat?! Profili i tij në vite ravijëzon një rektor më se partiak, në një kohë që rektori i Universitetit të Tiranës duhej të ishe një njeri i depolitizuar dhe me një aktivitet të qartë akademik. Historia e tij është pothuajse partiake, ish-anëtar i Partisë së Punës, drejtues i lartë i Partisë Social-Demokrate dhe tani pjesëmarrës në strukturat e larta të PD-së. Pra, nga një parti në tjetrën në kërkim të postit, dhe jo të ngjitjes dhe kultivimit akademik.”

6. Dhori Kule sulmohet edhe për administrimin e financave të universitetit. Këtë radhë publikohet një raport i Kontrollit të Lartë të Shtetit për keqmenaxhim të fondeve të universitetit, për të cilin Kule shprehet se nuk është në dijeni. Në fakt UT nuk ka bërë asnjëherë transparente përdorimin e të ardhurave nga studentët, për të cilat është i detyruar me ligj. Grupimet e studentëve nuk i kërkojnë ose nuk i dëgjon kush në pretendimet e tyre. Gjithsesi me poshtë sulmi nga "Gazeta Jone"

“Bëhen komente në emër të një raporti të Kontrollit të Lartë të Shtetit. Unë nuk kam parë asnjë prononcim deri tani që ky institucion të jetë shprehur, për ndonjë lloj qëndrimi, për ndonjë lloj akuze. Kontrollet nuk janë kontrollet për rektorin, raporti i KLSH-së nuk bën fajtor Dhori Kulen për asgjë dhe këto janë vetëm shpifje”,- u shpreh sot rektori Kule.

Gazeta me tej pretendon se: ”Në këtë dokument zyrtar të KLSH-së të hartuar nga përfaqësuesit e autorizuar të Kontrollit të Lartë të Shtetit, zbulohen abuzimet e Universitetit të Tiranës të përfaqësuar nga Dhori Kule, me tenderat [… ,] abuzimet me shitjen e karburantit, […] vjedhjen e fondeve me blerjet e makinave të përdorura, ku vetëm një makinë e përdorur është blerë me shumën reth 30 mijë euro.”

7. Mero Baze merr nje tjeter kthese ne kete diskutim dhe e sheh kete konflikt ndermjet Kules dhe Focus Group si nje lufte ndermjet Klan dhe Focus Group, apo me gjere, ndermjet Klan dhe cdo sipermarresi konkurrent ne plackitjen e te mires publike ku qeveria eshte e pafuqishme te krijoje balanca ne orekset e tyre.

Mero Baze: Anulimi i vendimit në kushte të tjera duhej përshëndetur, por në këto rrethana është një lajm tjetër i keq i pafuqisë që ka qeveria për të kundërshtuar tashmë orekset e klientëve të saj në biznes. Historia është e thjeshtë. Kundër këtij vendimi, i cili po bëhej realitet, u ngrit grupi mediatik Klan, biles më saktë sponsori në hije i këtij grupi, biznesmeni Samir Mane, i cili nuk e pranonte dot që përveç tij dhe bizneseve të tij, Berisha të fuste në oborr dhe një klient tjetër. Profili i Hysenbelliut në raport me grupin Klan, pas të cilit qëndron Mane, natyrisht që është më larg Berishës.

8. Dhori pergjigjet se ky eshte nje sulm nga Irfan Hysenbelliu dhe se raporti i KLSH-es nuk e ben ate pergjegjes direkt. Ai kerkon nga Kontrolli i Larte i Shtetit te mbaj qendrim ne lidhje me akuzat e leshuara ne media ndaj personit te tij. Eshte interesante se ku jane gjetur keto raporte te KLSH-s kur dihet se ato nuk publikohen, por mbahen te kycyra si nga KLSH-ja qe i perdor per shantazh dhe zhvatje parash, edhe nga institucionet e prekura.

Dhori: ”I gjithë problemi është i një biznesmeni Irfan Hysenbelliu. Unë i kam thënë gjatë takimit me të që kjo godinë ishte kërkuar prej nesh, pasi më herët më kishin thënë që ka pak nxënës dhe e kam bërë një kërkesë verbale në Bashki. Unë e kam marrë vesh nga media që po ndodh procesi i privatizimit, më pas i bëmë një kërkesë Kryeministrit që godinën ta marrë UT.”

9. Panorama permbledh burimet e te ardhurave te Dhori Kules duke e gjetur ate ne 7 borde, prej te cilave ai perfiton thuajse tre-fishin e rroges se vete si rektor. Nuk ngrihet asnje aludim ndaj ngarkeses se tij mesimore (me thuajse 800 000 leke ne vit, dicka tek 150 ore mesimore - ku jane?), por hidhen dyshime mbi aftesite e tij dhe kohen per t'u angazhuar me detyrat e percaktuara ne borde. Gjithashtu Panorama boton edhe deklarimin e pasurise se rektorit dhe te gjithe listen e pasurive te patundshme (asnjehere ndodhur kjo gje me pare, as me politikane!).

Panorama: Dhori Kule duhet të hyjë në rekordet “Guiness” të aftësive. Gazeta zbardh sot deklaratat e pasurisë së rektorit të Universitetit të Tiranës dhe zbulon se Kule, krahas pagës si rektor dhe pedagog, paguhet nga paratë e qytetarëve shqiptarë si anëtar në shtatë borde. Nuk janë pak. Vetëm në deklaratën e vitit 2012, nga pagesat e bordeve Kule ka marrë 1 840 430 lekë, ose rreth 18 mijë USD.
Pas goditjes nga Kryeministri, i cili qëndroi dukshëm pas pretendimeve te Irfan Hysenbelliut per marrjen e konviktit, Kule ka treguar pavarësi në vendimmarrje në mbledhjen e Këshillit Bashkiak të Bashkisë së Tiranës.

Read More

Universiteti-Korçës

Akuza për nepotizëm në Universitetin e Korçës

GazetaTelegraf, 12 Shkurt 2014

… universiteti “Fan S. Noli” është kthyer me kohë në një organizëm kompleks nepotik, ku nëpërkëmben: dinjiteti njerëzor, liria dhe të drejtat themelore, ndershmëria dhe profesionaliteti. …

…  …. media shtetërore në Korçë…është në kompromis të heshtur mbasi vetë drejtori i filialit të RTSH-së Korçë, zoti Roland Karanxha është jo vetëm pedagog i jashtëm në U.K. por dhe “kunati i shokut Xhemal”, sot alias i rektorit i këtij universitetit z. Gjergji Mero.

…

…. ky shkrim do të trajtojë vetëm problemin e nepotizmit në këtë universitet. Ndërsa për diplomat e marra në Bllogojegrad të Bullgarisë dhe në përgjithësi për gradat shkencore të blera dhe për sistemin e shitjes së provimeve e për shumë çështje të tjera të korrupsionit të lartë dhe shpërdorimit të detyrës, do t’i trajtoj me fakte dhe argumente në artikujt pasardhës.

Pema nepotike e Universitetit “Fan S. Noli”

… Interesant është fakti i bashkëjetesës së të dy krahëve politikë brenda universitetit. Duket që torta që kanë përpara (universiteti) është e bollshme që ata jo vetëm të ngopen, por as të mos kenë arsye të hungërijnë me njëri-tjetrin.

Rektori (ish- Kryetar i Këshillit Bashkiak, Korçë dhe anëtar i përjetshëm i këtij këshilli) – Gjergji Mero në cilësinë e rektorit punëson në Fakultetin e Bujqësisë, bashkëshorten e tij Tatjana Mero si pedagoge në këtë universitet.

Rektori, Gjergji Mero – i afërt me dekanin e Fakultetit Ekonomik Fredi Çuçllari. Dekani i Fakultetit Ekonomik (kuadër i PD)– Fredi Çuçllari i afërt i rektorit i punësuar me gjithë të shoqen në të njëjtin fakultet.

Është momenti që të verifikohen me detaje diplomat e këtyre, datat e provimeve ku i kanë dhënë , kur kanë shkuar ,ku kanë fjetur, a i kanë deklaruar këto shpenzime në deklaratë personale që kanë dorëzuar në ILDKP-ë. Koço Nasto dhe bashkëshortja e tij Mira Nasto të katapultuar nga forumet e PD e jo për ndonjë meritë shkencore vegjetojnë në pemën nepotike të këtij universiteti

- ashtu si Robert Damo (ish- kryetar i bashkisë, i propozuar nga PD) dhe shoqja e tij e auditorit Irma Damo.

Është momenti që të gjithë pedagogët të testohen për dëshmitë e gjuhëve të huaja dhe në çfarë gjuhe e kanë dhënë provimin. Të bëhet ky testim nga MAS dhe pastaj do shikoni që s’do ketë nevojë për koment.

Fakulteti i Edukimit dhe Filologjisë

Dekani – Ali (Kërçeli) Jashari, Doktor Profesor (i ardhur në arsimin korçar nga qarqet e majta) .. ofron si pedagoge të bijën e tij, që e pasuron edhe më tepër pemën nepotike të këtij universiteti. Jo vetëm kaq, por dekani Ali i gjeti një folezë në këtë “pemë” dhe në zyrën e tij si sekretare bijës së pedagogut të Fakultetit të Bujqësisë E. Spahiu, e cila njëkohësisht është me pagesë. Besoj se edhe zoti Kërçeli (dekani) duhet të jetë i ndërgjegjshëm që ka bërë shkelje….Padyshim ashtu si rektori Mero, dekani i Ekonomikut Çuçllari edhe Ali dekani as u shkon ndër mend se kanë kryer shkelje, sepse kanë patur parasysh në këto emërime rregulloren e etikës së këtij universiteti shtetëror (nëse mund ta quajmë të tillë).

Erion Nexhipi (anëtar i Këshillit Bashkiak nga PS), ndodhet në pemën nepotike të këtij universiteti me të shoqen dhe e vetmja “shkencë” që bën është botimi i buletinit dhe materialeve të tjera të këtij universiteti.

Kështu Anila Manxhe, pedagoge në Fakultetin e Edukimit dhe Filologjisë i ka tashmë shpatullat e ngrohta dhe duhet të vërtetojë lidhjet e sajë me Benita Manxhe (vetëm 22 vjeç) si zv.rektore dhe anëtare e senatit (si e tillë duhet patjetër të kesh doktoraturën) kur pedagogë të spikatur dhe me stazh nuk e gëzojnë këtë status dhe kur neni 13, pika 3 e statutit të U. ”Fan S. Noli” përcakton se: “Anëtarët e Senatit Akademik, të zgjedhur nga personeli akademik duhet të kenë të paktën gradën shkencore “Doktor”. Po rregullorja etike e këtij universiteti në faqen e pasme të saj, duket që bëka dhe përjashtime.

… ky universitet mund të thirret edhe privat paçka se paguajnë taksapaguesit shqiptarë.

Për të mos folur për korrupsionin e lartë që është një nga burimet e ushqimit dhe mbajtjes në këmbë të kësaj peme, le të shohim se ç’thotë vetë statuti dhe rregullorja e etikës e UK për rregullat e punësimit dhe për nepotizmin.

Në nenin 47 “Procedura e punësimit” të statutit të UK “Fan Noli” shkruhet:

1. 1. Marrja në punë e personelit në U.K. kryhet me konkurrim publik.
2. 2. …Për vendet e lira në fakultete, dekani përkatës përgatit kriteret e përgjithshme dhe të veçanta, të cilat ia njofton Rektoratit.
3. 3. Dekani i fakultetit përkatës ngre komision ad hoc të konkursit publik për vlerësimin e kandidaturave për punësimin e personelit akademik…
4. 4. Për emërimin e personelit akademik, dekani i fakulteti përkatës i paraqet rektorit kandidatin e renditur i pari në klasifikimin e bërë nga komisioni ad hoc i konkursit publik. Rektori lidh kontratë pune me kandidatin e përzgjedhur.

Tani, për rastin kur dekani i fakultetit të Edukimit dhe Filologjisë punëson të bijën në fakultetin ku drejton vetë zoti Ali Jashari dok. prof. dhe Rektori z. Gjergji Mero punëson të shoqen, le të shohim se ç’thotë “rregullorja e etikës e UK “Fan Noli””.

Neni 8 – Konflikti i interesit

Ka konflikt interesi kur interesi privat i një anëtari të universitetit, me përjashtim të studentit, bie në kundërshtim realisht apo pontecialisht me interesin, jo vetëm ekonomik, të universitetit…

Neni 9 – Nepotizmi

UK dënon nepotizmin dhe favorizimin, të cilët bien në kundërshtim me dinjitetin njerëzor, me vlerësimin e meritave individuale, profesionalitetin dhe lirinë akademike, me drejtësinë, paanësinë dhe transparencën dhe u kërkon pedagogëve dhe çdo anëtari tjetër të universitetit të përmbahet nga të tilla zakone dhe t’i referojë Këshillit të Etikës rastet e dyshimta.

Kemi të bëjmë me nepotizëm apo favorizëm, kur një pedagog apo një pjesëtar i personelit administrativ, direkt ose indirekt, përdor autoritetin e tij apo aftësinë bindëse për të dhënë përfitime, për të favorizuar detyra apo emërtime, për të influencuar mbi përfundimet e konkurseve apo në procedurat e përzgjedhjes që kanë të bëjnë, në veçanti, por jo ekskluzivisht, me fazën fillestare të formimit në karrierën universitare apo në dhënien përparësi të fëmijëve, familjarëve apo personave që bashkëjetojnë me ta.

Siç shihet edhe nga statuti edhe nga rregullorja e etikës, shkelësit e këtyre të fundit janë vetë drejtuesit kryesorë të universitetit. Vetë rektori firmos kontratë për të shoqen e vet. Njëkohësisht po ky rektor firmos dhe kontratën e të bijës së dekanit. Së fundi ish drejtorit të bujqësisë, nënkryetarit të PD zoti Maho, i firmoset kontrata e punësimit në Universiteti po nga Rektori Mero.

… Nëse zoti Rama dhe qeveria e tij e ka seriozisht që t’i shkojnë deri në fund kësaj “emergjence kombëtare” në arsimin e lartë, duhet t’i çmontojnë atij suportin politik bipartiak, ku mbështetet pema nepotike dhe t’ua kthejnë pemën e shëndoshë shkencore rinisë studentore, që aspiron për dije dhe nivel përpara se të ngjajë ajo që ngjau në Universitetin e Prishtinës.

Edhe njëherë qeveria duhet të kursejë ngjarje të tilla duke bërë auditin në këtë universitet dhe shkelësit e rregullores dhe statutit e shpërdoruesit t’i çojë në prokurori. Sfida nuk është e lehtë sepse drejtuesit e këtij universiteti janë të pleksur me qindra fije me të dy krahët e politikës, si dhe me drejtësinë e korruptuar.

Pra korrupsioni, që po i merr frymën shoqërisë shqiptare, është në nivelet e larta dhe paralel. Vështirë të besohet se ai do të shembet duke zënë poshtë ata që përfitojnë prej tij, me një të rënë të sëpatës dardhare siç është edhe kjo reformë e ndërmarrë në arsim me të drejtë nga Kryeministri i vendit zoti Edi Rama.

Read More