Studentë të huaj në Shqipërinë e viteve 80

 

Një reportazh mbi historinë e disa studentëve nga Kongo

Panorama, “Raporti për Enverin në 84: Studentët e huaj mbajnë qëndrim armiqësor”, 20 Prill,2015.

http://www.panorama.com.al/raporti-per-enverin-ne-84-studentet-e-huaj-mbajne-qendrim-armiqesor/

 

Të ardhur në Shqipëri në mesin e viteve ’60, falë “ndjeshmërisë” të regjimit të Tiranës për fëmijët e patriotëve kongolezë, siç i quante ky i fundit radikalët e majtë rrëzuar nga froni me grusht shteti, ata u bënë të njohur për policinë sekrete, por jo vetëm, në fillimin e viteve ’80. Kur autoritetet shqiptare ndiheshin krenarë për investimin e bërë për mirërritjen dhe arsimimin e tyre, sjellja e djemve dhe vajzave me ngjyrë, tashmë studentë të Fakultetit të Mjekësisë, më i privilegjuari ky për kohën në Shqipëri, shkonte në të kundërtën e pritshmërisë së tyre. Sinjalet e para të konfliktit me ta u shënuan gjatë aksionit politik kundër shfaqjeve të huaja që u zhvillua në frymën e vendimeve të Plenumit të IV të KQ.

Universiteti Politeknik Tirane

Grupi i studentëve kongolezë, asokohe adoleshentë, ndryshe nga bashkëmoshatarët e tyre shqiptarë, e vlerësonte të pakuptimtë, madje absurde kërkesën e Partisë-shtet për të standardizuar mënyrën e jetesës, shijet dhe dëshirat e rinisë. Megjithatë, reagimi i të huajave që nuk e dallonin dot të keqen e “shfaqjeve të huaja”, u shfaq dukshëm me kalimin e viteve, kur po përfundonin studimet universitare.

Kontakti me familjet dhe miqtë jashtë shtetit, takimet me të huajt në Tiranë, ndjekja e stacioneve perëndimore për ta ishte një dritare më shumë për ta parë botën jo vetëm nëpërmjet frëngjisë së Tiranës. Kjo e bënte grupin e tyre sa të veçantë, aq edhe problematik për regjimin. Lirshmëria në sjellje e veshje, shijet për muzikë e letërsi të huaj, këto falë edhe gjuhëve që zotëronin, veç të tjerave kishte zgjuar tek ata ndjenjën e revoltës për mos t’iu bindur rreshtit për mënyrën e sjelljes dhe të menduarit. Pikërisht këtu nisi të shfaqej dukshëm konflikti i tyre me shtetin e diktaturës dhe aparatin e tij represiv.

Që këtej, grupi i tyre që stononte me pjesën tjetër jo vetëm nga ngjyra u shpall kontingjent special dhe bë objekt vëzhgimi i policisë sekrete. Dosja sekrete e Sigurimit të Shtetit për “grupin e fëmijëve të patriotëve kongolezë”, përmban me dhjetëra raporte të rrjetit agjenturor, me të dhëna e fakte që “vërtetojnë” opozicionin e tyre me vijën e Partisë dhe veprimtarinë armiqësore ndaj vendit tonë.

Pjesa më e madhe e kësaj lënde misterioze, siç konfirmohet nga dokumentet, është siguruar nga përgjimet e të rinjve gjatë takimeve me diplomatë të huaj në hotel “Dajti” dhe nga studimi i fshehtë i korrespodencës së tyre me familjarë e miq jashtë shtetit. Në morinë e relacioneve zyrtare me karakter sekret të dosjes në fjalë, “Panorama” publikon sot një raport të autoriteteve të Ministrisë së Brendshme për Enver Hoxhën të datës 12 tetor 1984, ku përveç problematikës serioze që ka shkaktuar sjellja e studentëve kongolezë, kreu i regjimit informohet për mënyrën si po procedohet për ndëshkimin e tyre.

AFRIM IMAJ

RAPORTI PËR ENVERIN
Mbi grupin e fëmijëve të patriotëve kongolezë në Shqipëri. Në grupin e studentëve kongolezë që janë strehuar në Shqipëri gjatë periudhës së studimeve universitare, lindën disa probleme shqetësuese: Marrëdhënie e lidhje me diplomatë të ambasadave të huaja në Tiranë, qëndrime e veprime armiqësore ndaj vendit tonë, shthurje në jetën shoqërore deri në imoralitetet, mosfrekuentim i studimeve etj.

Një nga shkaqet për krijimin e kësaj situate, ka qenë puna e pamjaftueshme që bëhej me ta nga institucionet tona të ngarkuara me edukimin e tyre, sidomos për periudhën kur ata kaluan nga shkollat 8-vjeçare në të mesmet dhe në mënyrë të veçantë në shkollat e larta të vendit. Si pasojë e gjendjes së krijuar, në muajin tetor të vitit 1982, organet tona shtetërore, me gjithë paralajmërimet e bëra, u detyruan që të marrin disa masa administrative e ligjore: Pesë veta u përjashtuan nga universiteti për rezultate shumë të dobëta në mësime, mungesa të pajustifikuara në mësime, ngelje në klasë dhe sjellje të pahijshme moralo-shoqërore dhe qëndrime armiqësore ndaj vendit tonë: Maria Zhose, Liliana Katasa, Koleta Jumbu, Zhak Jumbu, Elisabeta Mukeketa dhe Vital Pakasa. Dy prej tyre, Vital Pakasa dhe Zhak Jumbu u arrestuan për veprimtari armiqësore. Ndërkohë në qytetin e Beratit u arrestua Zhan Matie, për çështje ordinere.

Dokumenti i Ministrisë së Brendshme për Enver Hoxhën mbi qendrimin dhe sjelljet e studentëve të huaj në Shqipëri në fillim të viteve ‘80

Në këto kushte doli nevojë urgjente për të siguruar pasaporta kongoleze, mbasi shumica e tyre, meqenëse në Shqipëri kishin ardhur si fëmijë, nuk dispononin asnjë dokument. Nëpërmjet Ministrisë së Jashtme dhe Ambasadës tonë në Bukuresht, u bënë tratativa me Ambasadën Kongoleze në Rumani, për të pajisur me pasaporta gjithë fëmijët kongolezë që ishin strehuar në Shqipëri. Mbas sigurimit të këtij dokumenti, u morën masa për të nisur nga Shqipëria për në Kongo-Brazavil, në radhë të parë tre kongolezët që ishin arrestuar dhe dënuar nga organet e drejtësisë. Në të njëjtën kohë u morën masat e nevojshme për largimin e studentëve të përjashtuar nga Universiteti dhe që ngulën këmbë për t’u larguar nga vendi ynë. Mbasi u morën të gjitha masat u larguan nga Shqipëria:

1-Vital Vital Pakasa, lindur në Kongo-Kinshasa, më 15 qershor 1957, ardhur në Shqipëri në dhjetor 1966. Pas përfundimit të arsimit 8-vjeçar e të mesëm, ndoqi Fakultetin e Mjekësisë. Ka qenë student me rezultate të dobëta. Ka mbajtur qëndrim armiqësor ndaj vendit tonë. Në tetor të vitit 1982, u arrestua dhe u dënua nga organet gjyqësore. Në dhjetor 1982 u largua për në Kongo- Brazavil.

2-Zhak Gabriel Jumbu, lindur në Kongo-Leopolovil, më 16 gusht 1959, ka ardhur në Shqipëri më 27 dhjetor 1965. Mbasi mbaroi mësimet në 8- vjeçare e të mesme, u fut në Fakultetin e Inxhinierisë. Ka qenë student i çrregullt dhe me qëndrim armiqësor ndaj vendit tonë. U përjashtua nga Universiteti dhe në tetor të vitit 1982, u arrestua për agjitacion e propagandë. U largua nga Shqipëria më 26 prill 1983 për në Paris.

3-Marie Zhumbula Zhose, lindur në Kongo-Leopolovil, më 16 gusht 1958, ka ardhur në Shqipëri në dhjetor 1965. Pasi mbaroi shkollën e mesme u dërgua në Fakultetin e Mjekësisë. Nuk ka qenë studente e rregullt, në vitin e katërt nuk dha asnjë provim. Qëndrimi i saj nuk ka qenë aspak korrekt, si nga ana morale ashtu dhe politike. Në tetor 1982 u përjashtua nga Universiteti. Më 9 mars 1983 u largua nga Shqipëria për në Kongo-Brazavil.

4-Liliana Antuan Katasa lindur më 24 dhjetor 1960. Në Shqipëri ka ardhur më 27 dhjetor 1965. Pasi ndoqi mësimet në 8-vjeçare dhe në shkollën e mesme u fut në Fakultetin e Mjekësisë për stomatologji. Për rezultate shumë të dobëta në mësime, për sjellje e qëndrime moralo-politike aspak korrekte, në tetor të vitit 1982 u përjashtua nga Universiteti. Më 9 mars të vitit 1983 u largua nga Shqipëria për në Kongo- Brazavil.

5-Elisabeta Mukeketa lindur në Kongo-Kinshasa, më 8 gusht 1959. Ardhur në Shqipëri më 3 dhjetor 1966. Mbas përfundimit të mësimeve në 8-vjeçare dhe të mesme u fut në Fakultetin e Mjekësisë. Përsëriti dy herë vitin e parë. Në vitin 1982 u përjashtua nga Universiteti. Më 11 maj 1983 u largua nga Shqipëria për në Kongo-Brazavil.

6-Zhan Matie, lindur në Kongo-Bravazil në vitin 1960, ka ardhur në Shqipëri në dhjetor 1965. Ka bërë shkollën 8- vjeçare e të mesme. U fut në punë në zdrukthëtarinë e Beratit. Për çështje ordinere është arrestuar dhe dënuar nga organet e drejtësisë. Në vitin 1982 përfitoi nga amnistia. Më 9 mars 1983 u largua për në Kongo-Brazavil.

7-Koleta Gabriel Jumku, lindur në Kongo-Brazavil, më 29 mars 1961. Në Shqipëri ka ardhur më 27 dhjetor 1965. Pasi mbaroi shkollën 8-vjeçare e të mesme, u fut në Fakultetin e Mjekësisë. Nuk ka qenë studente e mirë. Ndërroi degën e u fut në stomatologji, ku përsëri ngeli një vit, sepse nuk u paraqit në provime. Qëndrimi dhe sjelljet e saj moralo-politike nuk kanë qenë aspak korrekte. Në gusht të vitit 1983 u largua nga Shqipëria për në Gjermaninë Perëndimore, ku banon dhe nëna e saj Katerina Jumbu.

8-Maria Gabriel Jumbu, lindi në Kongo-Brazavil, më 8 tetor 1958. Ka ardhur në Shqipëri në vitin 1967. Pasi mbaroi shkollën 8-vjeçare dhe të mesme u fut në Fakultetin e Mjekësisë. Ka qenë studente e rregullt dhe e mirë në mësime. Po kështu, qëndrimi i saj shoqëror e politik ka qenë i mirë. U diplomua në vitin 1982. Me kërkesën e saj dhe të nënës së vet, Katerina Jumbu u largua nga Shqipëria në RFGJ, në gusht të vitit 1983.

9-Fani Grigor Kazadi, lindur në Ugandë, më 29 gusht 1961. Ka ardhur në Shqipëri në vitin 1967. Ndoqi mësimet në shkollën 8-vjeçare e të mesme dhe pas tyre u fut në Fakultetin e Mjekësisë për stomatologji. Nuk ka qenë studente e mirë. Qëndrimi dhe sjelljet e saj aspak korrekte. Me gjithë problemet dhe shqetësimet e krijuara, duke marrë parasysh se në Shqipëri ata jetuan një kohë të gjatë, u morën masa për përcjelljen e tyre në aeroport. Përveç biletës së udhëtimit deri në destinacionin përkatës, u dha si dietë udhëtimi në lekë valutë për një kohë relativisht të mjaftueshme (150 dollar) deri sa të lidheshin me pjesëtarët e tjerë të familjes, apo për të blerë ndonjë gjë të domosdoshme gjatë rrugës. Kanë mbetur katër veta që ndjekin studimet e larta në Universitet, dhe njëri që ka mbaruar Fakultetin e Mjekësisë që punon në spitalin nr.1 të Tiranës.

1-Urbain Zhuasan Massena, lindur në Kongo-Kinshasa, më 25 dhjetor 1956. Ka ardhur në Shqipëri më 1 dhjetor 1966. Mbasi përfundoi arsimin 8-vjeçar dhe të mesëm, ndoqi studimet në Fakultetin e Mjekësisë. Tani është mjek në spitalin nr.1 Tiranë. Nuk ka qëndrim të mirë moralo-politik. Ka patur të dhëna për veprimtari armiqësore. Ka kërkuar të qëndrojë në Shqipëri dhe të martohet me një vajzë shqiptare.

2-Zhozef Zhose Makanga lindur më 7 maj 1958. Në Shqipëri ka ardhur në vitin 1966. Pasi përfundoi arsimin 8- vjeçar dhe të mesëm u fut në Fakultetin e Mjekësisë. Në përgjithësi ka qenë student i mirë. Ndjek vitin e katërt.

3-Tumba Emanuel Irozhe, lindur në 17 maj 1961, ka ardhur në Shqipëri në vitin 1967. Pasi përfundoi arsimin 8- vjeçar dhe të mesëm u fut në Fakultetin e Mjekësisë.

4-Klodiana Gabriel Jumbu, lindur më 1962, në Kongo- Brazavil. Në Shqipëri ka ardhur në vitin 1967. Pasi përfundoi arsimin 8-vjeçar dhe të mesëm u fut në Fakultetin e Mjekësisë. Vazhdon vitin e tretë.

5-Rhozher Kainda, lindur në vitin 1962. Ka ardhur në Shqipëri në vitin 1966. Ka bërë shkollën 8-vjeçare dhe të mesme. Ka filluar studimet në Fakultetin e Mjekësisë. Pas ngjarjeve të tetorit të vitit të kaluar, gjendja në grupin e studentëve kongolezë është qetësuar dhe nuk ka ndonjë problem shqetësues.

Për mjekun kongolez që ka kërkuar të jetojë në Shqipëri, lidhur me kërkesën e bërë nga ai pranë organeve shtetërore për t’u martuar me një vajzë shqiptare, do të veprohet sipas rregullave shtetërore, por mendojmë se krijimi i kësaj lidhje bashkëshortore do të krijonte probleme në të ardhmen, sepse me largimin e kongolezëve të tjerë edhe ai mund të kërkojë të largohet në vendin e vet ose në ndonjë vend ku janë dy vëllezërit e tij: Në Francë apo Çekosllovaki. Përveç kësaj, organet përkatëse kanë të dhëna për aktivitet armiqësor.

Koci Zengo
Tiranë, 12 tetor 1984

Interviste e Urban Zhuasan

Panorama, 24 Prill 2015  (http://www.panorama.com.al/ish-studenti-djemte-i-arrestuan-vajzat-i-debuan/)

Urbain Zhuasan Massena, është i vetmi nga ish-studentët afrikanë që ka mbetur në Shqipëri. I diplomuar në Universitetin e Tiranës për Mjekësi, prej vitesh vazhdon të punojë në qendrën shëndetësore të Vorës, ku ndjehet si në shtëpinë e vet. Ai ka qenë pjesë e grupit të studentëve të huaj që u penalizuan nga regjimi në fillim të viteve ’80, për sjellje e qëndrime liberale. Nga përballja me autoritetet, doktor Beni, siç i flasin të njohurit, ka fiksuar në kujtesë grupin e arrestuar për veprimtari armiqësore dhe pjesën e vajzave që u përjashtuan nga Fakulteti dhe u larguan nga Shqipëria si “persona non grata”…

Çfarë kujtoni nga çastet e arrestimit të shokëve tuaj?
Ka qenë diçka e papritur dhe e pabesueshme arrestimi i tyre. Mënyra si i prangosën Vital Pakasën dhe Zhak Jumbun në fillim të vitit 1982, u përjetua me shqetësim të madh jo vetëm nga grupi ynë, por edhe pjesa e studentëve shqiptarë. Me ta njihesha prej kohësh. Ishim rritur e shkolluar bashkë. Aty për aty, arrestimi i tyre na dukej një aventurë e pakuptimtë. Sidoqoftë, ky akt e tronditi fort komunitetin tonë…

Cila ishte akuza që u komunikuan kur i arrestuan Vital Pakasën dhe Zhak Jumbun?
Në fillim qarkulluan zëra se i arrestuan për agjitacion e propagandë, se kishin folur kundër sistemit dhe vijës së Partisë. Gjatë procesit gjyqësor i akuzuan për veprimtari armiqësore kundër Republikës së Shqipërisë. Kjo e bënte më të rëndë pozitën e tyre…

Ju e keni ndjekur gjyqin e tyre?
Unë nuk kam qenë i pranishëm, por ma kanë treguar shokët që e ndoqën gjyqin në sallë. Aty i akuzuan se ishin lidhur me agjenturat e huaja dhe bënin spiunazh. Ishte kjo një përballje sa brutale aq dhe absurde. Në fund, pavarësisht se ata nuk pranuan asgjë, u dënuan, madje me shumë vite burg…

Ku e bënë dënimin?
Me sa më kujtohet, qëndruan rreth tre muaj në burg në Tiranë në kushte izolimi dhe pas tre muajsh, autoritetet lajmëruan familjarët e tyre dhe i riatdhesuan. Pra, ikën me familjarët… Kontakti me familjarët pas lajmërimit nga zyrtarët e Tiranës, prodhoi një histori tjetër disi të çuditshme. Ata, të mbërritur nga larg, të tronditur e të shqetësuar për njoftimin e papritur, u befasuan kur u njohën me akuzat vulgare për fëmijët e tyre. Madje, ndonjëri prej tyre, si nëna e Zhakut, edhe rebeloi para autoriteteve shqiptare, duke u kujtuar faktin se përgjegjësit kryesor për sjelljet e tyre ishin ato, pasi u ishte besuar kujdesi për edukimin e tyre qysh në fëmini.

Bashkë me grupin e dënuar që u largua për në Kongo, ka qënë edhe një tjetër që u përjashtua nga Universiteti dhe u shpall non grada…
Po, po, ishte dhe një grup tjetër me vajza që u shpëtoi prangave, por jo përjashtimit nga Universiteti dhe largimit me detyrim, madje duke u shpallur të padëshirueshëm për të jetuar në Shqipëri. Në këtë liste bënte pjesë Maria Zhose, Liliana Katasa, Koleta Jumbu dhe Elisabeta Mukeketa. Dëbimi i tyre, kryesisht lidhej me arsyetimin pa arsye se kishin manifestuar shfaqje të huaja liberale dhe kishin qëndrim jo të mirë moralo-politik…

Çfarë stononte në sjelljet tuaja që u bëtë objekt i goditjes së sigurimit të shtetit?
Në fakt ne kishim të njëtjën përditshmëri me pjesën e studentëve vendas. Jetonim në të njëtin konvikt, studionim në të njëtat auditore,shëtisnim e loznim bashkë në çdo kohë. I vetmi përjashtim, i vetmi privilegj, që kishim ne të huajt, nëse mund ta quajmë kështu, ishte e drejta për të frekuentuar hotel “Dajtin” dhe kontaktet me diplomatët e akredituar në Tiranë. Këtu fillonte pikërisht ajo që na vinte në shënjestrën e njerëzve të sigurimit. I gjithë ky aktivitet, siç e kemi mësuar më vonë, përgjohej e rregjistrohej fshehtas dhe mbi lëndën e zbardhur në zyrat e policisë sekrete, konkludohej mbi rrezikshmërinë që paraqisnim ne për regjimin. Po nuk na konfliktonte vetëm kjo. Diçka më vulgare ishte “alergjia” e zyrtarëve me veshjet tona. Asokohe shumkush prej nesh kishte vendosur kontaktet me famijarët dhe miqt e vet. Prej tyre herë pas here merrnim rroba e paisje të ndryshme, të cilat në Tiranë nuk egzistonin. Ndodhte rëndom që një palë atlete “Adidas”, apo pantallona “Blue Jeans”, një mangnetofon “Filips” apo një radio “Luxburg”, të rregjistronte mbarëts të shfaqjeve të huaja borgjezorevizioniste. Pak a shumë këto “privilegje”, u bënë boshti i goditjes së papritur…
Afrim Imaj

Read More

1991_Kastriot Islami

Minister Arsimi ne vitin 1991 

Kastriot Islami (lindur në Tiranë më 18 gusht 1952) është politikan shqiptar, deputet i Partisë Demokratike në Kuvendin e Shqipërisë.

Edukimi

Universiteti i Tiranës, Fakulteti i Shkencave të Natyrës, Dega Fizikë Speciale. Doktoratë në fushën e Fizikës Atomike e Molekulare, Universiteti i Parisit XI, 1981-1985. Studime post-doktorate, Universiteti i Giessenit, Gjermani.

Doktor i Shkencave, Profesor.

Veprimtaria profesionale

Profesioni: Fizikan

Punonjës kërkimor-shkencor në Fakultetin e Shkencave të Natyrës; Zëvendësdekan i Fakultetit të Shkencave të Natyrës; Zëvendëskryetar i Këshillit Shkencor; Anëtar i Komitetit Ekzekutiv të Unionit Ballkanik të Fizikës; anëtar i Editorial Board of Journal "Fisica Balkanica".

Veprimtaria politike

Kastriot Islami ishte një nga veprimtarët e parë të transformimit të Partisë së Punës së Shqipërisë në Partinë Socialiste të Shqipërisë në vitin 1991 edhe pse nuk ishte anëtar i saj. Ai u bë anëtar i Partisë Socialiste në vitin 1996.

Mbas ardhjes së Edi Ramës në krye të Partisë Socialiste, Islami ishte kritik i mënyrës së drejtimit të partisë. Ai ishte kundër metodave radikale të drejtimit të partisë, siç ishte bojkotimi për një kohë të gjatë i Parlamentit, grevës së urisë, protestave të dhunëshme etj., si dhe kundër fuqizimit të autoritetit të kryetarit të partisë.

Në dhjetor të vitit 2011 Edi Rama i propozoi kryesisë së Partisë Socialiste përjashtimin e Kastriot Islamit nga Grupi parlamentar i Partisë Socialiste me arësyen se nuk mori pjesë në seancën parlamentare ku do të votohej për kryetarin e Kontrollit të Shtetit. Ky propozim u kritikua nga deputetët Ben Blushi e Arben Malaj. Blushi kërkoi që të paktën, deputeti Islami të dëgjohet për arsyet që e detyruan të mungonte në seancë, duke e cilësuar të nxituar pozicionimin e kreut socialist Rama. Ai theksoi gjithashtu se nuk mund të vendoset në kryesi dhe nga kryetari përjashtimi i deputetit, por kjo duhet kaluar në grupin parlamentar. Malaj e konsideroi metodën e përjashtimit të dëmshme për Partinë Socialiste.

Funksionet drejtuese

1996-2013: anëtar i PS-së; 1996-1999: anëtar i Kryesisë së PS-së; 1996-2005: anëtar i KPD të PS-së; 1996-1997: Kryetar i Departamentit të Medias dhe Informacionit në PS; 1991-1992: Kryetar i Kuvendit të Shqipërisë; 1992-1998: Kryetar/anëtar i Komisionit për Hartimin e Projektushtetutës; 1998-2001: anëtar i Komisionit të Ligjeve dhe Çështjeve Kushtetuese; 2001-2002: Sekretar i Komisionit Parlamentar të Politikës së Jashtme; 1991: Ministër i Arsimit; 1997-1998: Ministër i Shtetit; 1998: Zëvendëskryeministër; 2002-2004: Ministër i Financave; 2004-2005: Ministër i Punëve të Jashtme; 1999: Koordinator për Krizën e Kosovës.

Read More

1987-1990 Skënder Gjinushi

 

Arsimi

Gjinushi kreu Universitetin e Tiranës, Fakulteti i Shkencave të Natyrës, dega Matematikë 5-vjeçare. Doktoraturë në Universitetin "Pierre et Marie Curie", Paris (Francë). Doktor i Shkencave, Universiteti i Tiranës. Mban titullin Profesor Doktor në Matematikë.

Veprimtaria profesionale

Gjatë viteve 1973 - 1987: pedagog në Fakultetin e Shkencave të Natyrës;

Gjatë viteve 1987 - 1990: Ministër i Arsimit;

Që nga viti 1986: Profesor;

Që nga viti 1989: anëtar i Akademisë së Shkencave.

Veprimtaria politike

Gjatë viteve 1987 - 1991: Ministër i Arsimit; shkurt 1991: jep dorëheqjen;

Në vitin 1991 dhe në vazhdim: Kryetar i Partisë Socialdemokrate të Shqipërisë, anëtare e I.S; deputet në Legjislaturat XI, XIII, XV e XVI;

Gjatë viteve 1997 - 2001: Kryetar i Kuvendit të Republikës së Shqipërisë;

Që nga korriku i vitit 2002 e gjer në shtator të vitit 2005: Zëvendëskryeministër dhe Ministër i Punës dhe Çështjeve Sociale.

Publikime

Ka botuar dhjetëra artikuj shkencorë, 12 tekste e monografi, 3 doktorata

 

Burime: http://sq.wikipedia.org/wiki/Sk%C3%ABnder_Gjinushi

Read More

1996-97_Besnik Gjongecaj

 

Dr. Besnik Gjongecaj

Ministër i Arsimit të Lartë dhe Kërkimit Shkencor 11.7.1996-12.3.1997

Ndërkohë Prof. Edmond Lulja ishte Ministër i Arsimit dhe Sporteve

Departamenti i Agromjedisit dhe Ekologjisë, Fakulteti i Bujqësisë dhe Mjedisit, Universiteti Bujqësor i Tiranës

Read More

1946 Sejfulla_Malëshova

 

Linndi në Maleshove të Këlcyrës në 2 mars 1900 dhe vdiq në Fier në 9 qershor 1971.

Arsimin fillor e kreu në vendlindje, kurse studimet e mesme i kreu në Itali në kolegjin e Shën Dhimitrit në Korone, atje ku dikur kishte studiuar edhe De Rada. Këtu së bashku me mikun e tij Odhise Paskalin botoi revistën Studenti Shqiptar, në të cilën botoi edhe vjershat e tij te para. Me pas kur do te studioje mjekësi në Romë do të botoje poemën e tij të parë me pseudonimin Kostandini në vitin 1923.

Në 1924 kthehet në Shqipëri dhe emërohet për gjashtë muaj sekretar i kabinetit të kryeministrit Fan Noli. Pas dështimit të Revolucionit të qershorit do të emigrojë.

Në vitin 1926 do të fillojë studimet në universitetin Lemonosov të Moskës për filozofi, studime që do ti përfundoje në vitin 1930. Për tre vjet do të punojë në një uzinë në Kaukaz.

Në vitin 1933 rehabilitohet dhe emërohet pedagog dhe dekan i fakultetit të filozofisë në universitetin Lemonosov.

Në vitin 1934 pranohet në Komintern dhe me këtë detyre vjen në vitin 1941 në Shqipëri dhe behet pjese e Këshillit të përgjithshëm nacional-çlirimtar.

Nga tetori 1944 deri në shkurt 1946 ai është anëtar në Byronë Politike të Partisë Komuniste Shqiptare që ishte organi më i lartë ekzekutiv i saj. (Duro, 2012)

Profesor S. Malëshova ishte i pari intelektual në Shqipëri që parashtroi në përputhje me kushtet e vendit, një projekt konkret për krijimin e një instituti pedagogjik. Më 19 nëntor 1946, ai do t’i paraqiste qeverisë një promemorje, me anën e së cilës argumentonte në mënyrë shteruese nevojën e ngritjes së kësaj hallke mësimore. Në historiografinë shqiptare të periudhës komuniste ky fakt është anashkaluar me qëllim të pastër politik. Pasi jo vetëm tekstet akademike, por edhe ato monografike nuk japin asnjë vlerësim, duke mos e përmendur fare rolin e S. Malëshovës. Pavarësisht se ky institut nuk i gëzonte të gjitha atributet e një shkalle të lartë në kuptimin filozofik të saj, në përgjithësi ai plotësonte disa nga kriteret kryesore, duke i shërbyer zbutjes së kërkesave emergjente që shtronte shkolla për kuadro mësimdhënës. (Duro, 2012, fq. 26).

Në vitin 1945 zgjidhet kryetar i Lidhjes së Shkrimtarëve dhe Artistëve të Shqipërisë (LSHA), kryetari i parë i kësaj organizate.

Në vitin 1946 caktohet Ministër i Arsimit dhe Kulturës në qeverinë e Enver Hoxhës. Po këtë vit botohet edhe vëllimi i tij poetik vjersha me pseudonimin letrar Lame Kodra.

Në 1946 çel Institutin Pedagogjik dy-vjeçar me tre fakultete dhe 70 studentë.

Në shërbim të institutit u vendosën persona që hodhën themelet e arsimit universitar shqiptar. Drejtor i parë i Institutit Pedagogjik Dyvjeçar u caktua prof. Dh. Shuteriqi, i cili mbulonte të gjitha lëndët e letërsisë shqipe e të huaj. Titullarët kryesorë të lëndëve ishin: Prof. S. Malëshova, filozofi, pedagogji e psikologji, Prof. Dh.Xhuvani, gjuhësi, Prof. A. Buda dhe Prof. Sh. Musaraj histori, Prof. P. Geço, gjeografi, Prof. A. Tashko matematikë, Prof. K. Popa, kimi e shkenca të natyrës, Prof. H. Sulçebej, higjenë dhe Prof. L. Shala edukatë fizike. Praktikat mësimore udhëhiqeshin nga pedagogët e lëndës. (Duro, 2012, fq. 28).

Në vitin 1946 për divergjenca të shumta që kishte me Enver Hoxhën në fushat e ekonomisë, kulturës dhe drejtimit të Partisë, përjashtohet nga ajo dhe shkarkohet nga të gjitha funksionet.

Internohet në Fier, ku jeton për 24 vjet, duke punuar si magazinier në ndërmarrjen e grumbullimit. Pas një jetë të vetmuar në 9 qershor 1971, Sejfulla Maleshova u nda nga jeta dhe u varros në varrezat e vjetra të qytetit.

Në vitin 1993 një grup intelektualesh u kujdesen për rivarrimin dhe ceremoninë e munguar për përkthyesin e Internacionales, Getes dhe Nekrasovit, apo poetin rebel siç i pëlqente ta quante veten. 

Burime:

1. Wikipedia (http://sq.wikipedia.org/wiki/Sejfulla_Mal%C3%ABshova)

2. Duro, Çlirim (2012) Historia e Arsimit të Lartë në Shqipëri 1946-1968. Disertacion në Kuadër të Doktoraturës. Marrë nga Baza e të Dhënave në Universitetin e Tiranës (16 Gusht, 2013).

Read More

1997-2002_Ethem_Ruka

 

        

Et’hem Ruka

Lindur më 08.12.1947, Tepelenë

Diplomuar në Universitetin e Tiranës, Fakulteti i Shkencave të Natyrës, Dega Biologji-Kimi

Studime pasuniversitare në Laboratorin e Fiziologjisë dhe Endikronologjisë të Universitetit "Pierre dhe Marie Curie"-Paris (Francë)

Kandidat i Shkencave; Docent; Doktor i Shkencave; Profesor Dok

Dekan i Fakultetit të Fiziologjisë dhe Bio-kimisë.

Autor i kurrikulës së biologjisë, librave shkollor për arsimin parauniversitar dhe teksteve universitare (10 libra).

Ka botuar mbi 20 artikuj shkencorë në revistat shkencore akademike dhe shkencore.

Deputet i Partisë Socialiste që prej 1992.

Read More

2002-2005_Luan_Memushi

Ministri më kontrovers në historinë e arsimit shqiptar (akuzuar për korrupsion, keqmenaxhim, politizimin e skajshëm etj.)

        

DITËLINDJA: 11 Nëntor 1951, TEPELENË

ARSIMI DHE EKSPERIENCA

1969 Përfundoi studimet në shkollën e mesme të përgjithshme ‘A. Shehu’, Tepelenë.

1969-1974 U diplomua në Universitetin e Tiranës në degën e Bio-Kimisë

1974-1982 Mësues në Shkollën e Mesme të Përgjithshme-Tepelenë

1982-1987 Pedagog në Institutin e Lartë Bujqësor-Tiranë

1987-1992 Drejtor në Drejtorinë e Programeve e Teksteve Shkollor ne Ministrinë e Arsimit si dhe Pedagog i jashtëm në Institutin e Lartë Bujqësor

1992-1997 Pedagog në Fakultetin e Shkencave Natyrore të Universitetit të Tiranës:

Pedagog i Biologjisë ne Fakultetin e Mjekësisë

Pedagog i Antropologjisë në Degën e Biologjisë dhe Psikologjisë

Pedagog i Biologjisë humane ne Fakultetin e Shkencave Sociale

1997-2001 Deputet i Kuvendit të Shqipërisë si dhe pedagog i jashtëm në Universitetin e Tiranes.

2001-e në vazhdim Deputet i Kuvendit të Shqipërisë dhe pedagog i jashtëm në

Universitetin e Tiranës

22 Shkurt 2002 – 2005 Ministër i Arsimit dhe Shkencës

2009- Rektor/Administrator i Shkollës së Lartë Private “Planetar” - Tiranë

KUALIFIKIME DHE AKTIVITETE SHKENCORE

1986 Fiton gradë shkencor ‘Kandidat i Shkencave’

1990 Fiton titullin shkencor ‘Docent’

1993 Fiton graden shkencore ‘Doktor i shkencave’

1994 Fiton Titullin Shkencor ‘Profesor i Asociuar’

1999 Fiton Titullin ‘Profesor’

1989 Vizitë Studimore në Greqi, Njohja me Sistemin Arsimor

1990 Vizitë Studimore në Gjermani ‘Njohja me Sistemin Arsimor Gjerman’

1987 Pjesëmarrës dhe referues në Konferencën Kombëtare ‘100 Vjetori i Shkollës së parë Shqipe’-Tiranë, 7 Mars 1987

1988 Pjesëmarrës dhe Referues në Simpoziumin Kombëtar ‘Për një të mësuar aktiv dhe krijues’-Tiranë, Maj 1988.

1991 Pjesëmarrës dhe Referues në Seminarin Ndërkombëtar ‘Lidershipi Ndërkombëtar në Arsim’-Oslo 28-30 Nëntor 1991 Norvegji

1992 Pjesëmarrës dhe Referues në seminarin Ndërkombëtar ‘Mjedisi, 93’ Cita di Castello. Tetor, 1992, Itali.

1994 Pjesëmarrës dhe Bashkëreferues në Konferencën Shkencore Kombëtare ‘Mjedisi ‘94’-Tiranë 20 Qershor, 1994.

1995 Specializim afat shkurtër Laboratori i Antropo-Gjenetikës-Bruksel, Belgjikë.

1996 Pjesëmarrës dhe Bashkëreferues në Kongresin e 10-te të Shoqatës Europiane të Antropologjisë, Bruksel, 19-22 Gusht, 1996. Belgjike.

1998 Pjesëmarrës dhe Bashkëreferues në Konferencën e Parë Shqiptare të Antropologjisë. ‘Antropologjia e Shqiptarëve’ Tiranë, 24-26 Tetor 1998.

2000 Pjesëmarrës dhe referues në Konferencën Shkencore Ndërkombëtare

‘Dialog Ndërmjet Qytetërimeve’ Tiranë, 20-21 Prill 2000.

2000 Pjesëmarrës dhe referues në Simpoziumin Kombëtar ‘Karakteri i qytetarit botëror’ Durrës, Dhjetor 2000.

1975-1982 Drejtues i kualifikimit të mësuesve të Biologjisë në rrethin e Tepelenës

1984-2002 Bashkëautor i Programeve dhe teksteve shkollor të Biologjisë për shkollat e mesme

1987-2002 Anëtar i grupit Kombetar për Përmirësimin e teksteve të Biologjisë

1988-1992 Anëtar i Bordit Kombëtar Special për dhënien e titujve dhe gradave shkencore në fushën e Biologjisë

1991-2001 Anëtar i Komisionit Kombëtar të Biologjisë Shkollore

1982-2001 Udheheqës Shkencor i dy dizertacioneve dhe 15 diplomave për studentë

1985-2001 Bashkëudhëheqës i kualifikimit psikologjik-shkencor për mësuesit e

Biologjisë në shkalle Kombëtare

1982-2002 Autor i mbi 30 studimeve, oponencave dhe recensave studimore, per dizertacione dhe monografive

BOTIMET

1974-2002 Autor dhe Bashkëautor:

-Në 50 artikuj problemor në shtypin e përditshëm

-Në 15 artikuj shkencorë popullarizues në botimet periodike

-Në 17 artikuj dhe referenca shkencore si brenda dhe jashtë vendit

-Në 4 monografi

-Në 4 tekste ndihmës për arsimin e mesëm dhe të lartë

-Në 15 tekste shkollor për shkollat e mesme, si:

Biologjia 9, 10, 11, 12.

Biologjia 1, 2, 3A, 3B, 4A, 4B.

-Autor i 5 teksteve të shkollës së lartë si:

Botanika (Për Fakultetin e Veterinarisë-1985)

Biologjia Humane (Për Fakultetin e Shkencave Shoqërore-1997)

Antropologjia (Për Fakultetin e Shkencave Shoqërore dhe Natyrore-2000)

Angazhime politike

1993-1999     Anëtar i Komisionit të përhershëm të Arsimit, Shkencës dhe Kulturës në Partinë Socialiste

1999-Shkurt 2002    Kryetar i Komisionit të Përhershëm për Shëndetin dhe Mjedisin në Partinë Socialiste

1999-vazhdim       Anëtar i Komitetit të Përgjithshëm Drejtues të Partisë Socialiste

1997-Shkurt 2002       Kryetar i grupit Parlamentar për Miqësine Shqipëri-Gjermani

1997-Shkurt 2002  Anëtar i Komisionit të Arsimit, Kultures, Shkencës, dhe Sporteve në        Parlamentin Shqiptar

Shkurt 2002-vazhdim Ministër i Arsimit dhe Shkencës në dy Qeveri ( Qeveria Majko 2002 dhe Qeveria Nano 2002).

 

Gjetje në Bibliotekën Kombëtare mbi akuzat për korrupsion ndaj Luan Memushit

---

1

Titulli
Ja abuzimet e bëra me tenderin e librit shkollor" : Letër e hapur e ministrit
" të Arsimit Luan Memushi mbi shkeljet e bëra

Autorët
Hilmi Braçe

Botuar
2002

Shënime
IX; XXI

Në
Gazeta shqiptare. - Nr. 2273, 6 shtator, 2002, f. 15

---

2

Titulli
Letër tjetër z. Ministër të Arsimit! : [Debat për tekstet shkollore - historia]

Autorët
Ardian Klosi

Botuar
2003

Shënime
IV,3

Në
Shekulli. - Nr. 9, 12 janar, 2003, f. 1,15

---

3

Titulli
Petovë, 10 milionë lekë të humbur në shkollën 8 - vjeçare

Autorët
Elda Spaho

Botuar
2004

Shënime
IX

Në
Shekulli. - Nr. 150, 3 qershor, 2004, f. 7.

---

4

Titulli
Memushi, 67 milion lekë dëm buxhetit të shtetit : si është abuzuar në
Ministrinë e Arsimit

Botuar
2004

Shënime
VI,1; IX; X,1,b

Në
Tema. - Nr. 1215, 29 maj, 2004, f. 8 - 9.

---

5

Titulli
Alkiministri Memushi dhe ari i shtetit : [korrupsion në Ministrinë e Arsimit]

Autorët
Edmond Tupja

Botuar
2004

Shënime
VI,1; XXI

Në
Shekulli. - Nr. 709, 19 shtator, 2004, f. 9.

---

6

Titulli
Ministria e Arsimit traumatizon nxënësit : letër e hapur Luan Memushit

Autorët
Ali Eltari

Botuar
2004

Shënime
X,1,b

Në
Sot. - 21 tetor, 2004, f. 12 - 13.

---

7

Titulli
Memushi - ministri që po heq anglishten nga shkollat : [intervistë me kryetarin
e "Komisionit per Arsimin Kulturën, Shkencën dhe Sportin" në Kuvend]

Autorët
Bardhyl Londo
Fejzi Braushi (bised.)

Botuar
2004

Shënime
X,1,b

Në
Albania. - Nr. 257, 3 nëntor, 2004, f. 5.

Emrat e personave
Memushi, Luan

---

8

Titulli
Luani kundër Memushit : [protesta e pedagogëve]

Autorët
Edmond Tupja

Botuar
2004

Shënime
X,1,b

Në
Panorama. - Nr. 774, 21 nëntor, 2004, f. 1, 9.

---

9

Titulli
Shkronjë pas shkronje" korrupsioni i Memushit

Autorët
Bahri Beci

Botuar
2005

Në
Arsimi sot dhe nesër. - Nr. 21, , shtator, 2005, f. 30.

---

10

Titulli
Pedagogjia amerikane dhe reforma dritëshkurtër arsimore e Luan Memushit

Autorët
Bexhet Arbana

Botuar
2003

Shënime
X,1,b; XXI,3

Në
Arsimi sot dhe nesër. - Nr. 5, , nëntor, 2003, f. 6 - 8.

---

11

Titulli
Gabimet e pajustifikueshme profesionale të zotit Luan Memushi : [Luan Memushi,
"Reformimi i shkollës, proçes dhe strategji"]

Autorët
Bexhet Arbana

Botuar
2003

Shënime
X,1,b

Në
Arsimi sot dhe nesër. - Nr. 4, , shtator - tetor, 2003, f. 7 - 8.

---

12

Titulli
Një ministër gabim : [ministri i Arsimit dhe Shkencës Luan Memushi]

Autorët
Fabian Morava

Botuar
2005

Shënime
V; X,1,b

Në
Klan. - Nr. 394, 5 shkurt, 2005, f. 12 - 15.

Read More

2005-2008_Genc_Pollo

                         

Genc Pollo ka lindur në Tiranë në vitin 1963. Pasi u diplomua për studime historike në Universitetin e Tiranës në vitin 1986, ai punoi si studiues në Akademinë e Shkencave të Shqipërisë  deri në vitin 1988 dhe më pas u largua në Austri për të ndjekur studimet pasuniversitare në Universitetin e Vjenës, në sajë të një burse të dhënë nga qeveria austriake.

Z. Pollo, është një nga themeluesit e Partisë Demokratike të Shqipërisë, e para parti pro-perëndimore shqiptare, e cila fitoi zgjedhjet e para të lira dhe të ndershme, pas një sundimi të gjatë të komunistëve në vend. Nga viti 1992 deri ne vitin 1996, ai shërbeu si këshilltar pranë Presidentit të Shqipërisë z. Sali Berisha.

Në vitin 1996 u zgjodh për herë të parë deputet i Parlamentit të Shqipërisë. Nga viti 1996 deri në vitin 2001, Z. Pollo ka qenë anëtar i Asamblesë Parlamentare të Këshillit të Evropës.Genc Pollo është aktualisht deputet i Partisë Demokratike në Kuvendin e Shqipërisë. Në zgjedhjet  legjislative të vitit 2009, të cilat rikonfirmuan Partinë Demokratike dhe koalicionin qeveritar, Genc Pollo u rizgjodh deputet i Kuvendit të Shqipërisë.  Në qeverinë e re që doli nga këto zgjedhje u emërua Ministër për Inovacionin dhe Teknologjinë e Informacionit e të Komunikimit.

Në mandatin e Qeverisë Demokratike, të legjislaturës 2005-2009, z. Pollo ka mbajtur fillimisht postin e Ministrit të Arsimit dhe Shkencës (2005-2008) dhe më pas atë të Zëvendës-kryeministrit (2008-2009).

Në angazhimet e tij brenda dhe jashtë vendit, Z. Pollo ka treguar një performancë të lartë në fushën e arsimit, në punët e jashtme dhe në integrimin evropian të Shqipërisë. Në qeverinë e dalë prej këtyre zgjedhjeve, z. Pollo mori portofolin e Ministrit të Arsimit dhe Shkencës, duke shpallur arsimin si prioritet kryesor të shumicës së re qeverisëse dhe duke dyfishuar shpenzimet për arsimin. Në mandatin e tij si Ministër i Arsimit, z. Pollo realizoi reforma të thella në arsim, të cilat synuan rifitimin e besimit të humbur të publikut në sistemin e arsimit, duke rritur transparencën dhe korrektësinë në administratën arsimore dhe, në veçanti, modernizimin e programit mësimor, nga ulja e ngarkesës së të mësuarit automatik në mësimin e integruar me metoda bashkëkohore për të inkurajuar të menduarin kritik. Ministria e Arsimit dhe Shkencës, nën udhëheqjen e z. Pollo ka iniciuar reforma mjaft të rëndësishme, duke përfshirë zbatimin e suksesshëm të provimit kombëtar të shkollave të mesme (Matura Shtetërore – bazë për pranimin në universitet); në vitin 2006 u arrit të liberalizohej tregu i teksteve shkollore, si dhe u lançua një politikë e re në pagat e arsimtarëve bazuar në nevojat e tregut dhe të meritës së gjithsecilit. Të një rëndësie të veçantë kanë qënë dhe reformat e thella të ndërmarra në reformimin e arsimit të lartë.

Nën nismën e Shqipërisë Digjitale, Ministria për Inovacionin dhe e Teknologjisë së Informacionit e të Komunikimit, nën drejtimin e Ministrit Pollo, ka pajisur të gjitha shkollat me laboratorë kompjuterikë, të lidhur në internet në të gjithë vendin. 550 zyra postare në Shqipëri ofrojnë aktualisht internet falas, kjo nismë do të vijojë gjatë vitit 2013 me hapjen dhe administrimin e 1250 zyrave të tjera në komuna, bashki, shkolla e universitete me internet falas.  Këto arritje e bëjnë Shqipërinë një nga të paktat vende në botë, që ofron internet falas, në mbarë territorin e vendit.

Read More

2008-09_Fatos_Beja

2008-09  Fatos Beja

Edukimi:

Universiteti i Tiranës, dega Filologji - 1970; kurse specializimi për diplomaci, Gjenevë - 1992 dhe Uashington - 1993; për minoritetet, Budapest -1991 dhe Vjenë - 1995; për të Drejtën Humanitare Ndërkombëtare, Pragë - 1991; për mediat televizive, Paris – 1996.

Eksperienca profesionale:

1971-1982: përkthyes e redaktor në Agjencinë Telegrafike Shqiptare.
1982-1985: redaktor i revistës arkeologjike "Iliria"
1985-1992: bashkëpunëtor shkencor në Institutin e Gjuhësisë dhe Letërsisë, Akademia e Shkencave.
1978-1991: pedagog i jashtëm në UT.

Veprimtaria politike:

1992-1997: këshilltar diplomatik i Presidentit të Republikës.
1996-1997: deputet i PD
1997-2005: anëtar i Kryesisë së PD
1997-1999: sekretar për organizimin e PD.
1999-2001: sekretar për Zgjedhjet dhe Burimet Njerëzore i PD
2001-2005, deputet, nënkryetar i Komisionit Parlamentar të Ligjeve
Shtator 2005 - prill 2006: anëtar i Komisionit për Çështjet Ligjore, Administratën Publike dhe të Drejtat e Njeriut.
Shtator 2005 - 25.07.2008: nënkryetar i Kuvendit të Shqipërisë.
2006-2008: kryetar i Komisionit për Çështjet Ligjore, Administratën Publike dhe të Drejtat e Njeriut.
25.07.2008 –Shtator 2009: ministër i Arsimit dhe Shkencës.
Deputet në legjislaturat XIV,XVI, XVII

Read More

2009-2013_Myqerem_Tafaj

	CURRICULUM VITAE Prof. Dr. Myqerem Tafaj Datëlindja: 1957
Grada/tituj
1997 1996 1988 1982	Fituar titullin ‘Profesor' Dr. sc., Universiteti i Stuttgartit-Hohenheim/Gjermani. Kandidat i shkencave Përfunduar studimet universitare në Universitetin Bujqësor të Tiranës, Fakulteti Veterinarisë
Kualifikime pasuniversitare jashtë vendit
1990 – 1991	Kurs pasuniversitar 1-vjecar për politikat e zhvillimit, Fondacioni Gjerman i Zhvillimit Internacional, (DSE).
1992 – 1995	Studime të doktoratës , Universiteti i Stuttgart- Hohenheim.
1999- Gusht 2001	Profesor i ftuar në Universitetin e Stuttgart-Hohenheim, mbështetur nga Fondacioni ‘Alexander von Humboldt‘.
Karriera profesionale
1 Dhjetor 1982	Emëruar Pedagog në UBT
Korrik 1996 – Shkurt 1997	Drejtori i Përgjithshëm i Shkencës, Ministria e Arsimit të Lartë
Mars 1997 – Korrik 1997	Ministër i Arsimit të Lartë & Shkencës
Shtator 1999 - Gusht 2005	Pedagog në Universitetin e Stuttgart-Hohenheim.
Shtator 2005 - Gusht 2009	Këshilltar për arsimin dhe shkencën pranë Kryeministrit dhe Sekretar i Përgjithshëm i Këshillit të Ministrave (2006-2007)
Angazhime sociale e profesionale
	• Përzgjedhur si ekspert për politikat e arsimit në Ballkan, në  kuadrin e Paktit të Stabilitetit dhe programit PHARE, BE. • Anëtar i “Lidhjes se Humboldtianeve Shqiptar”. • Anëtar i Këshillit të Arsimit të Lartë & Shkencës. • Anëtar i Komisionit të Kualifikimit Shkencor. • Kryetar i Grupit të Ekspertëve për Reformën e Shkencës
Veprimtaria Politike
2009-	Deputet i Kuvendit të Shqiperisë (Qarku Tiranë)
2005	Anëtar i Këshillit Kombëtar të Partisë Demokratike Anëtar i Komitetit të Orientimit të Politikave Kandidat për Deputet, Zona Elektorale Nr. 26
1997	Ministër i Arsimit të Lartë dhe Shkencës
1991-1997	Anëtar i Partisë Demokratike
Arritje në arsimin e lartë
	- Planifikimi dhe Zbatimi i reformës në sistemin e Kërkimit Shkencor në Shqipëri (2005-07)
	- Hartimi dhe miratimi i Ligjit të Arsimit të Lartë - 2007
	- Planifikimi i reformës në arsimin e lartë (2008-2013)
	-Rregullimi i profesionit të mësuesisë
	- Rritja e numrit të studentëve të regjistruar në arsimin e lartë 2009-2012 me 30%
	- Themelimi i dy institucioneve të arsimit të lartë (Universiteti Mjekësor dhe Akademia e Arteve Shkodër)
	Zbatimi i provimit të shtetit

Read More

2013_Lindita_Nikolla

         

Znj. Lindita Nikolla lindi në Tiranë, më 22 Tetor 1965. 

Znj. Nikolla, në Korrik 2010, ka kryer studimet Mas­ter në Administrim Publik, drejtimi Pushtet Ekzeku­tiv pranë Albanian University dhe në vitin 1989 ka përfunduar studimet universitare pranë Fakultetit të Shkencave të Natyrës, dega Matematikë, Universiteti i Tiranës.

Ajo ka hyrë në politikë në vitin 2003. Gjatë viteve 2003 - 2006 është zgjedhur si Këshilltare e Këshillit të Njësisë Bashkiake Nr.1, Tiranë. Është zgjedhur për dy mandate në periudhën 2007- 2011 dhe 2011-2013, Kryetare e Njësisë Bashkiake Nr.1 Tiranë. Në zgjed­hjet e 23 Qershorit 2013, zgjidhet deputete e qarkut të Tiranës. Nga shtatori i vitit 2007 znj. Nikolla është anëtare e Kryesisë së Partisë Socialiste.

Në vitin 2006 ka përfunduar Akademinë për Udhëheqë­si dhe Reformë pranë Institutit për Demokraci dhe Ndërmjetësim (NDI) në Tiranë dhe në Qershor të vi­tit 2008 ka kryer Akademinë mbi Policimin Komunitar dhe Qeverisjen Vendore në Universitetin e Pitsburgut, SHBA. Znj. Nikolla ka kryer gjithashtu një sërë kualifi­kimesh në menaxhimin e shkollës dhe mësimdhënien e matematikës, si dhe për fuqizimin e gruas në ven­dimmarrje.

Znj. Nikolla zotëron gjuhën angleze dhe njeh gjuhën frënge e atë italiane.

Read More

1955-58_Ramiz_Alia

Ramiz Alia lindi më 18 tetor 1925 në Shkodër dhe vdiq më 7 tetor 2011 në Tiranë.
- 1949-1955 Sekretar i Parë i KQBRPSH
- 1954 u diplomua në shkollën e Partisë në Moskë.
- 1955-1958 Ministër i Arsimit dhe Kulturës
- 1961-1985 anëtar i Byrosë Politike dhe Sekretar i KQ PPSH-së për ideologjinë
- 1982-1990 deputet, Kryetar i Presidiumit të Kuvendit Popullor
- 1985-1991 Sekretar i Parë i KQ të PPSH-së
- 1991 kryetar i Këshillit Presidencial
- 1992 President
 

Arritjet

1. Themelimi i Universitetit Shtetëror të Tiranës (USHT) 10 qershor 1957.
- Misioni i USHT sipas Ramiz Alisë është: “Së pari, ai do të përgatitë kuadrot e larta të nevojshme…Së dyti, do t’i japë një zhvillim më të madh punës shkencore dhe mendimit shkencor në Shqipëri në të gjitha fushat. Së treti, do të luajë një rol vendimtar për rritjen e kuadrove ekzistuese.” (Cambo, 2004, fq. 165, cituar sipas Duro, 2012, fq. 85).
- Objektivat e USHT sipas statusit: “Të përgatisë për degët e rëndësishme të ekonomisë popullore, të shkencës, kulturës, teknikës dhe shëndetësisë, specialistë me profil të gjerë dhe kualifikim të lartë, të aftë për të përvetësuar në mënyrë të plotë realizimet e reja të shkencës {…}përparimtare të të gjithë botës, për të lidhur teorinë me praktikën e ndërtimit të shoqërisë socialiste dhe të gatshëm, për të mbrojtur me besnikëri atdheun socialist.” (Duro, 2012, fq. 86).
2. Themelimi i Institutit të Lartë Pedagogjik të Shkodrës (prej 1991 - Universiteti i Shkodrës).
- Institut i Lartë Pedagogjik me afat studimi 2 – vjeçar (1957 – 1970).  Kishte  dy degë : Gjuhë shqipe - Letërsi - Histori dhe Matematikë - Fizikë.  Në vitin akademik 1962 - 1963 u hap edhe dega Biologji – Gjeografi. Ishte i vetmi institucion që përgatiste kuadrin mësues për arsimin 8 - vjeçar për të gjithë Shqipërinë. Gjatë kësaj periudhe u diplomuan 4 505 mësues në të dy sistemet (me dhe pa shkëputje nga puna).
Burimet:
Wikipedia: http://sq.wikipedia.org/wiki/Ramiz_Alia
Duro, Çlirim (2012) Historia e Arsimit të Lartë në Shqipëri 1946-1968. Disertacion në Kuadër të Doktoraturës. Marrë nga Baza e të Dhënave në Universitetin e Tiranës (16 Gusht, 2013).
Historiku i Universitetit të Shkodrës, http://www.unishk.edu.al/sq/node/35

Read More