Zgjedhjet ne Universitetin e Tiranes

Zbardhet lista zyrtare, ja emrat që garojnë për Universitetin e Tiranës

 

Panorama, 06.04.2016

http://www.panorama.com.al/zbardhet-lista-zyrtare-keta-jane-emrat-qe-garojne-per-universitetin-e-tiranes/

Kur kanë mbetur vetëm dy javë larg zgjedhjeve për krerët e rinj të universiteteve, gazeta zbardh listën zyrtare me emrat që garojnë për të zënë një post drejtues në universitetin më të madh në vend, atë të Tiranës.

Rektorati i UT-së vë përballë dy profesorë të shquar, aktualisht dekanë: Klodeta Dibra te Gjuhët e Huaja dhe Mynyr Koni nga Shkencat e Natyrës, të cilët ditët e fundit kanë intensifikuar fushatën elektorale të nisur që në mesin e muajit mars.

Për dekanatet e gjashtë fakulteteve të Universitetit të Tiranës luftojnë dekanë që dëshirojnë një mandat të dytë, zëvendësdekanë apo shefa departamentesh që dëshirojnë të ndërmarrin më tepër përgjegjësi e të rriten në karrierë.

---

---

Përballja më e ashpër pritet të jetë në Fakultetin e Histori- Filologjisë, ku dy pedagoge kandidojnë për ta drejtuar atë. Dhurata Shehri, shefe e departamentit të Letërsisë, në rast se rezulton fituese, do të ndërrojë postet me dekanin aktual Shezai Rrokaj, i cili zbret në bazë për të drejtuar departamentin, në pamundësi për të kandiduar për të tretën herë. Por Shehri duket se nuk do ta ketë të lehtë të fitojë betejën, pasi ka përballë profesoreshën e Historisë Valentina Duka, që është nr.2 në dekanat.

Një tjetër përballje e fortë do të ndodhë edhe te Fakulteti i Drejtësisë. Dekani aktual Altin Shegani që tenton drejt një mandati të ri rivalizohet nga pedagogu i hershëm i këtij fakulteti Artan Hoxha, pjesë e grupit të ekspertëve që po asistojnë për Reformën në Drejtësi.

Shkencat Sociale gjithashtu vënë përballë dy profesorë të asociuar, zëvendësrektorin Edmond Rapti dhe përgjegjësin e departamentit të Punëve Sociale, Edmond Dragotin. Dekani Theodhori Karaj zyrtarisht ka nisur garën për shef departamenti.

Po ashtu, edhe Aleksandër Koçani, i cili momentin e fundit hoqi dorë nga kandidimi për dekan, shpall kandidaturën për të drejtuar departamentin e Shkencave Politike. Dy shefa departamentesh, Esmeralda Kromidha dhe Artur Sula, janë në garë për postin që mban aktualisht kandidatja për rektore, Dibra.

Dhori Kule, rektori i UT-së (edhe për pak ditë), i penalizuar nga rregullorja e re e universiteteve, e cila nuk lejon një rektor të qëndrojë për më shumë se dy mandate, ka menduar të marrë postin që e ka mbajtur dikur për gati një dekadë, atë të dekanit të Fakultetit Ekonomik. Ndërsa Sulo Haderi, dekani aktual, pasi hoqi dorë nga synimet për rektoratin, synon të drejtojë departamentin e Ekonomiksit.

SHKENCAT SOCIALE
Për dekan
Prof.asc. Edmond Dragoti, pedagog shef i departamentit të Punëve Sociale.
Prof.asc. Edmond Rapti, shef i departamentit Psikologji-Pedagogji.

1.Departamenti i Punës dhe Politikës Sociale
Prof.asc. Rudina Rama.

2.Departamenti i Filozofisë
Phd. Alment Muho.

3.Departamenti i Shkencave Politike
Prof.dr. Aleksandër Kocani.
Prof.asc. Merita Xhumari.

4.Departamenti i Psikologji-Pedagogjisë
Prof.dr. Theodhori Karaj.
Phd. Blerta Bodinaku.
Prof.asc. Zenel Orhani.

HISTORI-FILOLOGJI
Për dekan:
Prof.dr. Dhurata Shehri.
Prof.dr. Valentina Duka.

1.Departamenti i Gjuhës
Prof.dr. Shezai Rrokaj

2.Departamenti i Letërsisë
Prof.Dr Adem Jakllari.
Prof.as.Dr Lili Sula.
Prof.as.Dr Vjollca Osja.

3.Departamenti i Historisë
Prof.as.dr. Eva Tafili.
Prof.dr. Petrit Nathanaili.

4.Departamenti i Gazetarisë dhe Komunikimit
Prof.as.dr. Mark Marku.

5.Departamenti i Gjeografisë
Prof.as.dr. Romeo Hanxhari.

6.Departamenti i Arkeologjisë dhe Trashëgimisë Kulturore
Prof.as.dr. Lorenc Bejko.

GJUHET E HUAJA
Për dekanë
Prof.dr Esmeralda Kromidha.
Prof.dr. Artur Sula.

1.Departamenti i Gjuhës Angleze
Prof.as.dr. Leonard Danglli.
Prof.dr. Shpresa Delija.
Prof.as.dr. Ukë Buçpapaj.
Prof.dr. Viktor Ristani.

2.Departamenti i Gjuhës Frënge
Prof.dr. Eldina Nasufi.
Prof.dr. Saverina Pasho.

3.Departamenti i Gjuhës Italiane
Prof.as.dr. Diana Kastrati.

4.Departamenti i Gjuhës Gjermane
Dr.Sonila Sadikaj.

5.Departamenti i Gjuhës Spanjolle
Prof.as.dr. Anasatasi Prodani.
Dr.Erida Ajazi.

6.Departamenti i Gjuhës Sllave e Ballkanike
Prof.as.dr. Sofia Delijorgji

EKONOMIKU
Për dekan
Prof.dr. Dhori Kule.

Prof.dr. Areti Stringa.

1.Departamenti i Ekonomiksit
Prof.dr. Sulo Haderi.
Prof.dr. Tonin Kola.

2.Departamenti Marketing-Turizmit
Prof.dr. Vjollca Panajoti.
Prof.dr. Vjollca Bakiu.

3.Departamenti i Menaxhimit
Prof.Dr Shyqyri Llaci

4.Departamenti i Financës
Prof.as.dr. Edlira Luçi.

5.Departamenti i Kontabilitetit
Prof.dr. Ingrita Shuli.

DREJTESIA

Për dekan
Prof.dr. Altin Shegani.
Prof.dr. Artan Hoxha.

1.Departamenti i së Drejtës Penale
Prof.dr. Skënder Kaçupi.

2.Departamenti i së Drejtës Civile
Prof.dr. Zhaklina Peto.

3.Departamenti i së Drejtës Publike
Prof.asc.dr. Kristinka Jançe.
Prof.asc.dr Mirela Bogdani.

SHKENCAT E NATYRES
Për dekan:
Prof. Spiro Drushku.
Prof. Anila Paparisto.

1. Departamenti i Biologjisë
Prof. Lulëzim Shuka.
Prof. Mirela Lika.

2. Departamenti i Bioteknologjisë
Prof.Klementina Puto.

3. Departamenti i Fizikës
Prof. Artan Boriçi.
Prof. Polikron Dhoqina.

4. Departamenti i Kimisë
Prof. Majlinda Vasjari.
Prof. Elda Marku.

5. Departamenti i Kimisë industriale
Prof. Ilirjan Malollari.
Prof. Rozana Troja.

6. Departamenti i Informatikës
Prof.as.dr. Endrit Xhina.
Prof.as.dr. Alda Kika.

7. Departamenti i Matematikës
Prof. Artur Baxhaku.

8. Departamenti i Matematikës së aplikuar
Prof.Fatmir Hoxha.

9. Departamenti i QKKF
Prof.Alfred Mullai.

SENATI AKADEMIK I UT
Lista e studentëve
Rea Kotani
Kristian Kina
Dejana Kallogjeroviç
Klevi Pojana
Aldo Hoxha
Emiljano Dervishi
Ardit Krashi
Krisitian Nikleaj
Klement Vatoci
Ersion Meçuli
Lorena Cadri
Armand Myftari

Read More

Dyshime të arsyeshme për akreditimin e universiteteve - B. Musai

BARDHYL MUSAI 

Panorama, 25.03.2016 

(http://www.panorama.com.al/dyshime-te-arsyeshme-per-akreditimin-e-universiteteve/)

Dy vjet më parë, publiku u njoftua përmes medies se do të kryhej akreditimi i të gjitha institucioneve të arsimit të lartë (IAL) nga një kompani private britanike (QAA) dhe do të vendoste se cilat IAL dhe programe do të vazhdonin veprimtarinë, cilat do të pezulloheshin e cilat do të mbylleshin.

Por përgjatë më shumë se dy viteve, nga titullarë të këtij institucioni janë bërë deklarime aspak koherente, në kohë dhe në përmbajtje, të cilat ngrenë dyshime të arsyeshme dhe të besojmë se akreditimi i institucioneve të arsimit të lartë nga agjencia britanike nuk do të ndodhë. Ja si paraqitet kronologjia e deklaratave dhe njoftimeve.

---

---

Shkurt 2014: Sipas “Shqiptarja.com”, datë 7, ministrja deklaron se “…zyrtarisht në tetor do të bëhet shpallja dhe renditja e cilësisë së tyre. Agjencia britanike që ka marrë përsipër akreditimin dhe vlerësimin e shkollave të larta, do të bëjë publik renditjen e universiteteve dhe pikët e tyre”. Gusht 2014: Pas vendimit për mbylljen e 18 IAL-ve dhe filialeve të universiteteve publike, u deklarua se do të fillonte një fazë e dytë, ajo e akreditimit nga agjencia britanike.

Dhjetor 2014: U nënshkrua marrëveshja me QAA. Janar 2015: Agjencia britanike, e përzgjedhur për të bërë akreditimin e universiteteve në vendin tonë, do të nisë zyrtarisht punën në fund të këtij muaji(Gazeta “Shqip”, 23 janar 2015). Raporti i parë i akreditimit të universiteteve do të bëhej publik në muajin korrik, që sipas ministres, do t’u shërbente studentëve për t’u orientuar drejt fakulteteve dhe programeve të studimit të akredituara.

Maj 2015: Takim me ekspertët britanikë të akreditimit mbi metodologjinë e vlerësimit të IAL-ve. Në këtë takim, midis të tjerash, ministrja shprehet: “Pasi kemi nënshkruar në muajin dhjetor 2014 marrëveshjen me agjencinë britanike, ekspertët e kësaj agjencie dhe të agjencisë sonë kanë bashkëpunuar për përcaktimin e metodologjisë që do të përdoret, për të filluar më pas procesin e shumëpritur që lidhet me akreditimin dhe vlerësimin e kritereve të cilësisë për të gjitha Institucionet e Arsimit të Lartë, publike dhe private” (arsimi.gov.al).

Shkurt 2016: Nënshkruhet kontrata me QAA për vlerësimin dhe certifikimin e cilësisë së IAL-ve, e cila sipas MAS-it, shënon fazën e dytë të reformimit rrënjësor të arsimit të lartë. Sipas drejtorit të agjencisë britanike, puna e kësaj agjencie me eksperiencë në procesin e akreditimit, nuk do të fokusohet vetëm në akreditimin e institucioneve, por dhe në ngritjen e kapaciteteve të agjencisë kombëtare të akreditimit (www.aaal.edu.al).

Duke analizuar deklaratat dhe njoftimet zyrtare në rendin kronologjik, dyshimet tona kanë në themel disa arsye: Së pari, mungesa e koherencës në deklarata dhe mospërputhjet me dokumentet zyrtare. Arsyeja e dytë ka të bëjë me paqartësinë e termave dhe koncepteve, kompleksitetin e procesit të akreditimit në tërësinë e vet. Një arsye tjetër është mungesa e kapaciteteve njerëzore dhe burimeve financiare për të realizuar procesin në një kohë të shkurtër.

Nëse u referohemi dy marrëveshjeve zyrtare dhe i krahasojmë me deklaratat publike, se agjencia britanike do të bëjë akreditimin (janar 2015), vërejmë paqëndrueshmëri dhe mospërputhje. Marrëveshja e 18 dhjetorit 2014 dhe njoftimi në faqen zyrtare të agjencisë britanike QAA (www.qaa.ac.uk) nuk përmend asnjë nga termat akreditim, vlerësim, rankim apo pikëzim, të cilat janë fjalë kyç të përdorura nga titullarë të MAS-it, por përmenden bashkëpunim, komunikim, shkëmbim përvoje, ekspertizë dhe ngritje të kapaciteteve.

Këtu e ka burimin dyshimi i parë. Koncepti, përmbajtja dhe procedura për akreditimin, të cilat janë komplekse, përbëjnë dyshimin e dytë. Bazuar në ligjin e arsimit të lartë (neni 15), vendimi për akreditimin merret nga bordi i akreditimit. Pra, në çdo rast, akreditimi nuk mund të certifikohet nga agjencia britanike, e cila në bazë të ligjit bën vlerësimin e jashtëm, por mandati i saj nuk është ky, referuar marrëveshjeve zyrtare.

Krahas termit akreditim nga titullarë të MAS-it është përdorur edhe termi rankim (më saktë në shqip duhet renditje ose klasifikim). Ky term përcakton renditjen e IAL-ve dhe të programeve të studimit, duke u bazuar në disa tregues, të cilin po e ilustrojmë më poshtë.

Në korrik 2011, kompania gjermane CHE (Qendra për Arsimin e Lartë) paraqiti rezultatet e një projekti pilot për renditjen e katër programeve të studimit dhe u përqendrua kryesisht në nëntë tregues me karakter informativ dhe cilësor. Treguesit i renditën në tri grupe: më të mirët, mesatarët dhe më të dobëtit.

Më pas, bazuar në vlerësimin e çdo treguesi, bëhet edhe kategorizimi që kalon në dy faza; atë të vlerësimit të brendshëm dhe të vlerësimit të jashtëm, i cili përbën edhe bazën për akreditimin, institucional dhe të programeve.

Pra, bëhet renditja (rankimi), më pas vlerësimi i cilësisë dhe më pas akreditimi, që përcakton shkallën e besueshmërisë së institucionit dhe programeve të studimit, dhe jo e kundërta, sikurse shprehen titullarë të MAS-it. Vetëm për këtë ushtrim që kishte qëllim të ndihmonte edhe në ngritjen e kapaciteteve vlerësuese të Agjencisë së Akreditimit, u shpenzuan më shumë se 150 mijë euro nga buxheti i Ministrisë.

Por çfarë ndodhi më pas? Asgjë, nuk pati vazhdimësi, por si rëndom procese të tilla lihen në mes të rrugës. Akreditimi ka të bëjë me besueshmërinë, nisur edhe nga etimologjia e termit. Kjo besueshmëri certifikohet sipas ligjit bazuar në vlerësimin e të gjithë treguesve të çdo IAL dhe programi. Prandaj edhe agjencitë që merren me procesin nuk emërtohen agjenci akreditimi, por të vlerësimit dhe garantimit të cilësisë, ato promovojnë cilësinë duke i dëshmuar, profesionalisht dhe ligjërisht IAL-ve, se ku janë dhe se çfarë duhet të bëjnë që të përmirësojnë treguesit me referencë standardet.

Akreditimi nuk është dhe nuk duhet të jetë mjet për ndëshkim, sikurse po veprohet. Në çdo vend demokratik shteti nuk mbyll institucionet për shkak të cilësisë, por ka për detyrë t’i sigurojë publikut informacion të besueshëm dhe transparent, e më pas të rinjtë vendosin vetë se ku do të ndjekin studimet. Nëse ata refuzojnë të studiojnë te IAL-të që nuk ofrojnë cilësi, atëherë ato vetëmbyllen. Mbyllja nga shteti mund të ndodhë në raste flagrante, kur p.sh., ndryshon misioni i IAL-së apo kemi veprimtari të paligjshme.

Cilësia prodhohet në institucione dhe më mirë se organizmat e jashtme, janë njësitë e vlerësimit të brendshëm, të cilat ushtrojnë veprimtarinë për sigurimin dhe garantimin e cilësisë së çdo institucioni dhe të programeve të studimit. Procesi për akreditimin varet nga njësitë e vlerësimit të brendshëm, që pothuaj nuk ekzistojnë në IAL-të publike dhe në shumicën e atyre private.

Përveç mungesës së njësive të vlerësimit të brendshëm, dalin edhe disa probleme, si kapacitetet, buxheti, koha në dispozicion, dokumentacioni në gjuhën angleze etj. Vlerësimi i jashtëm mbështetet në raportet e vlerë- simit të brendshëm. Arsyeja e tretë për dyshime në proces ka të bëjë me kufizimet kohore, mungesën e kapaciteteve dhe burimet financiare.

Procesi i vlerësimit të jashtëm, sipas sekretarit të Përgjithshëm të MAS-it, do të përfshijë tri faza: përgatitja e kornizës së punës, trajnimin e ekspertëve dhe kontrollet në terren për 35 IAL-të publike dhe private e do të zgjatë 12-14 muaj. Më tej, në njoftimin e majit 2015 (arsimi.gov.al) thuhet se procesi i akreditimit të IAL-ve do të ketë dy faza.

Faza e parë është ajo e akreditimit të institucionit, që ka të bëjë me mënyrën si funksionon ai, kurse faza e dytë është ajo e akreditimit të programeve të studimit që ka të bëjë me mënyrën se si zhvillohet një lëndë në një degë të caktuar. Së fundmi bëhet një deklaratë tjetër, procesi do të ketë dy faza, në fillim vlerësimin e katër IAL-ve publike dhe dy private dhe në fazën e dytë pjesën tjetër të IAL-ve.

Cilës deklaratë t’i besojmë? Por nëse ende nuk qenka hartuar korniza e punës, çfarë është bërë deri tani me marrëveshjen e dhjetorit 2014 dhe a nuk u përcaktua metodologjia në maj 2015, sipas njoftimit zyrtar? Cila është fatura financiare e kompanisë britanike sipas marrëveshjes së mësipërme? Asgjë nuk deklarohet. Për kontratën e nënshkruar në shkurt flitet për një shumë 700 mijë euro.

Mund të besojmë se britanikët kanë punuar falas deri tani? Çfarë do të thotë trajnim i ekspertëve? Ekspertët nuk kanë nevojë për trajnim, por zbatojnë termat e referencës sipas kontratës dhe verifikojnë përmbushjen e standardeve shtetërore. Të marra së bashku këto thellojnë dyshimet se gjithçka bëhet për zgjatje në kohë të procesit, pasi premtimet e bëra në fillim të mandatit qeverisës nuk po mbahen.

Kemi më shumë se dy vjet që dëgjojmë dhe lexojmë deklarata, por asnjë veprim. Nëse i marrim së bashku të gjitha IALtë, të cilat do t’i nënshtrohen procesit sipas të dhënave të Agjencisë së Akreditimit (www.aaal.edu.al), të kuotave dhe programeve të miratuara nga Këshilli i Ministrave për IAL-të publike për vitin 2015, kemi: 35 IAL, 95 fakultete dhe 1149 programe të ciklit të parë dhe të dytë, përjashtuar ato të ciklit të tretë.

Shifra është edhe më e madhe, por të mbetemi këtu. Le ta fillojmë me llogaritjet e kryera me rezerva në favor të MAS-it, duke pasur parasysh se në kontrollin e ligjshmërisë në fazën e parë, verë 2014, u angazhuan rreth 300 specialistë dhe u shpenzuan 5000 orë pune, sipas raportit të këtij dikasteri.

Ky proces vlerësimi të jashtëm ka natyrë tjetër dhe është më i ndërlikuar se ai i pari, prandaj në një vlerësim institucional duhen jo më pak se 5 ekspertë të huaj, sipas standardit të QAA, pasi ata kanë ekspertizë eksplicite për aspekte të tilla si infrastruktura dhe burimet, organizimi institucional, personeli akademik, programet e studimit, studentët, punësueshmëria, bashkëpunimi ndërkombëtar, hulumtimi etj. dhe 2 ekspertë për vlerësim të çdo programi, 2- 3 ditë së paku në çdo IAL, 3-5 ditë së paku për të shkruar një raport, honorar, akomodim, bileta udhëtimi, përkthim profesional.

Nga një përllogaritje të thjeshtë, bazuar në premtimin ministror se “cilësia do të matet me standardet europiane”, atëherë duhet një numër shumë i madh ekspertësh, rreth 750, dhe i gjithë procesi ka një kosto në total prej rreth 6 milionë eurosh. Duke u nisur nga përllogaritjet e mësipërme, është e pamundur të gjendet një numër kaq i madh ekspertësh nga Britania. Aspektet logjistike janë një çështje tjetër që e bëjnë procesin të pamenaxhueshëm. Atëherë, nëse gjendet një rrugë tjetër, të zgjatet procesi duke angazhuar më pak ekspertë, kjo përsëri është e pamundur, pasi kohëzgjatja e procesit kërkon të paktën dhjetë vjet që të kryhet.

Vetëm për Universitetin e Tiranës, që të kryhet i plotë procesi, duhet një vit kohë. Pavarësisht si veprohet, në një vit apo përgjatë dhjetë vjetëve, ekspertë kaq të shumtë në numër nuk gjenden dhe financat janë të papërballueshme. E fundit, dhe që është shumë e rëndë- sishme, mbetet dokumentacioni të cilin IAL-të e kanë në gjuhën shqipe dhe jo në atë angleze. Sipas procedurave të agjencive serioze, sikurse është edhe QAA, raporti i vlerësimit duhet të dërgohet të paktën dy muaj përpara se të kryhet vizita në institucion.

Po të kemi parasysh se në IAL-të publike ka filluar fushata zgjedhore dhe më pas vjen sesioni i provimeve e pastaj pushimet, duke shtuar këtu edhe mungesën e strukturave të vlerësimit të brendshëm, atëherë këto raporte nuk do të përgatiten në kohë.

Nëse është menduar që ky proces të kryhet, sikurse ai që u bë para disa viteve në Kosovë nga tre britanikë vetëm me një listë kontrolli në dorë në 30 IAL private, atëherë procesi nuk mund të quhet vlerësim për akreditimin. Agjencia Britanike e Akreditimit (BAC) kreu inspektimin në terren për 18 ditë dhe në çdo IAL kanë qenë 1 deri në 3 vlerësues. Druaj se kjo situatë do të ndodhë edhe te ne dhe QAA mund të përdoret vetëm si mburojë për të fshehur të vërtetën, ngjashëm si çantat prodhim kinez prej igeliti që shiten nëpër rrugë, por që kanë etiketa firmato. Si përfundim, bazuar në shpjegimet e mësipërme, procesi për akreditimin nuk është profesional, por as edhe ligjor.

Ai kryhet në kundërshtim me ligjin, pasi institucionet dhe programet e akredituara i nënshtrohen procesit çdo gjashtë vjet, dhe ato që nuk e kanë mbushur afatin, nuk ka pse t’i nënshtrohen procesit. Atëherë i vetmi argument i pakonsumuar është ai se procesi iniciohet për qëllime dhe propagandë politike dhe si i tillë nuk do të sjellë ndonjë ndryshim në situatën e arsimit të lartë për verifikimin dhe sigurimin e cilësisë, por disa syresh do të mbyllen, duke u etiketuar “si pjesa e kalbur”, dhe do të vazhdojnë rrugëtimin një pjesë tjetër, disa prej tyre të merituar, pjesa që mbetet do të jetë ajo klienteliste apo e favorizuar politikisht.

Një raport dosido edhe mund të përgatitet, për të justifikuar premtimet e bujshme dhe paratë e shpenzuara, por nuk ka për t’u publikuar për çdo IAL, pasi edhe raportet e verifikimit të ligjshmërisë në verë 2014 nuk u bënë publike.

Monologu ministror, se arsimin e lartë e vendosëm mbi shina, krahasuar me gjendjen kaotike ku e gjetëm, se fabrikat e diplomave i mbyllëm, se cilësia tashmë është e niveleve europiane do të vijojë, bazuar në sloganin gëbelsian: “Sa më e madhe gënjeshtra, aq më shumë besohet ajo!”.

Read More

Mbi rregulloren e re te zgjedhjeve te rektoratit

Rregullorja që çrregullon

Mar 6, 2016,   LUÇIANO BOÇI - Panorama 

http://www.panorama.com.al/rregullorja-qe-crregullon/

Kryeministria dhe Minis tria e Arsimit dhe e Sporteve kanë anuncuar jo pa pompozitet këto ditë dy lajme, në përpjekjet e tyre për të na bindur që reforma  në arsimin e lartë po vazhdon me “sukses” të plotë dhe jo që realisht po e fut atë në kaos të plotë. I pari ishte nënshkrimi i marrëveshjes me agjencinë britanike “Quality Assurance Agency for Higher Education”.

E përfolur prej një viti e gjysmë, marrëveshja duket se ka marrë një firmë finale, pas shumë “fintesh” deklarative, për gjoja fillime, për punë të nisur, por ende të pabitisur, për revoltën e shprehur ndaj situatës “për të vënë duart në kokë”, siç shprehej Rama, të universiteteve. Pa shtuar këtu barsaletat që Kryeministri sajonte në seancat e Parlamentit.

Të gjitha të bëra përgjatë muajve pararendës nga krerët më të lartë të shtetit. Në to përziheshin si pa të keq vetëlavdërimi, mashtrimi, vetëkënaqësia absurde, ndërkohë që e vërteta na doli se nuk kishte kurrfarë kontrate me agjencinë e supozuar deri ditë më parë. I dyti është shpërndarja tek universitetet, e draftit të Rregullores së zgjedhjeve në IALtë publike, jo pa “buzëqeshje” “suksesi” nga ministrja e Arsimit.

E vërteta në fakt është “shtrëngimi” “i suksesshëm”, sepse data 8 Mars shënon fundin e mandateve ekzistuese të autoriteteve drejtuese dhe neni 131, i ligjit të ri, në pikën 2 shprehet në mënyrë taksative për këtë detyrim.

Ky draft vjen si gjithmonë me një “cen” të vogël. Na qenkesh “final”, megjithëse formalisht, me shpejtësi drite, u kërkohet senateve të japin gjoja mendimet e tyre, sikur të bëhej fjalë për zgjedhjen e hashtagut dhe jo për rregulloren e zgjedhjeve më të rëndësishme, që siç shprehet edhe vetë drafti, “janë të parat pas miratimit të ligjit të ri”.

Shpresoj që kjo fjala “final” të mos jetë ajo porta e mbyllur, siç ka ndodhur dhe me ligjin, për të gjitha ato reagime që ka ngjallur kjo rregullore, e cila ende pa u diskutuar brenda senateve është cilësuar me të drejtë si antikushtetuese dhe si antiligjore në shumë pika të saj.

Pavarësisht këtij nxitimi, Ministria duket se e ka marrë me nge këtë punë dhe e ka përpunuar mirë politikisht për të kapur politikisht universitetet. Që në nenin 3 ajo tejkalon ligjin e AL. Përcakton si subjekt të saj vetëm IAL-të publike, duke i veçuar nga ato “të pavarurat” (publike të pavarura). Bën sikur harron se dhe këto janë publike, sipas përcaktimeve të vetë ligjit të ri, nenit 17, pika 4 dhe nenit 118 pika 1. Këto i vendos në të njëjtin rend me ato jopublike dhe për të dy rregullorja shprehet se “i referohen kësaj rregulloreje në rast zhvillimi të proceseve zgjedhore” (neni 3).

Ndërkohë vetë ligji i AL në nenin 36 përcakton se në IAL-të jopublike “autoritetet drejtuese akademike… emërohen dhe shkarkohen…”. Së paku, sipas ligjit, i cili detyron që “IAL-të jopublike riorganizohen brenda të njëjtit afat”, rregullorja duhej të shprehej qartë dhe pa ekuivok për riorganizim. Këtu ajo është tërësisht e çalë dhe favorizuese, duke bërë rolin e “së paditurës”.

Po këto duken se janë çrregullimet më të “vogla”, në raport me të tjerat. Më e rënda dhe që shkel njëkohësisht Kushtetutën është kushti që kjo rregullore imponon për komandim të autoriteteve drejtuese deri në konstituimin e të rejave, në nenin 4, pika 5. Ligji i AL nuk ka në asnjë element të tij termin apo nocionin “komandim”, pavarësisht se rregullorja i referohet atij. Ndërkohë Kushtetuta nuk njeh komandim për organe të zgjedhura, por i njeh të drejtën të ushtrojnë autoritetin e tyre deri në konstituimin e të rejave. Kështu veprohet me gjykatat, me anëtarët e Këshillit të Ministrave, apo me mandate të tjera.

Logjika e formula e zbatuar në këtë rast është e thjeshtë: komandim i kamikazëve politikë për të siguruar rezultat zgjedhor politik. Më tej, rregullorja në kundërshtim me nenin 40 të ligjit, për Asamblenë e personelit, përjashton nga trupa zgjedhore anëtarët e personelit akademik me kohë të plotë të cilët kanë nënshkruar kontrata pune rishtas, pas vitit akademik 2014-2015 (neni 11, pika 1).

Kjo është dhe qesharake, edhe skandaloze, pasi ligji në nenin 39, jo vetëm i njeh të drejtën e konkurrimit për Rektor ose Dekan edhe personave që nuk janë as anëtarë të personelit: “mund të vijë nga radhët e personelit akademik të institucionit të arsimit të lartë ose dhe jashtë tij”.

Me logjikën e kësaj rregulloreje, i bie që një profesor i ardhur rishtas ka të drejtë të kandidojë edhe për rektor e për çdo gjë, por nuk ka të drejtë të votojë!!! Ndërkohë pengimi i atyre që janë në proces hetimi, duket qartë që bie ndesh me parimin kushtetues të prezumimit të pafajësisë.

Ndërsa masa administrative, si penguese për persona të veçantë brenda kësaj rregulloreje, bëhet një mjet efikas për të “kill”, çdo rival potencial, duke i sajuar atij një gjë të tillë, për motive politike ose personale. Nga ana tjetër, rregullorja nuk pengon persona në prag të pensionit për të kandiduar, që nuk kapin afatin 4-vjeçar, siç e diktojnë dhe zgjedhje të autoriteteve të ngjashme në institucionet e tjera. Kjo ndoshta për të favorizuar “të dashmit” e partisë. Ajo çrregullon madje edhe studentët.

Sipas nenit 24, për to vendos me përcaktim sipas parimit absurd “një kandidat për Fakultet” nga Këshilli Studentor. Bëhet sikur harrohet që zgjedhjet për këshillat studentorë kanë katër vite që nuk janë bërë dhe ato nuk ekzistojnë fare. Përpos kësaj, nuk është rregullorja ajo që përcakton numrin e përfaqë- sisë studentore, apo të kandidatëve, por është Senati akademik në bazë të shumë treguesve.

Brenda saj parashikohet dhe zgjedhja e anëtarëve të komisioneve të përhershme të njësive kryesore, e cila i vë vulën një çrregullimi kohor të kësaj rregulloreje. E them këtë për shkak se komisionet e përhershme të njësive kryesore (fakultetet) në të gjitha universitetet tona nuk janë krijuar. Pavarë- sisht se dispozitat kalimtare të ligjit kushtëzojnë përputhjen e strukturës me ligjin e ri.

Kjo ka ardhur sepse sot rolin kryesor në to e luan Këshilli i Fakultetit, i cili pushon së ekzistuari pas vendimit të Senatit të ri. Vetë ligji këtu është kaotik si dëshmi e dobësisë së tij të denoncuar. Në nenin 38, pika i, të drejtën e krijimit të komisioneve ia atashon Senatit, ndërsa në nenin 41, pika ç, të drejtën ia jep Asamblesë së personelit akademik!!!???

Madje, në qoftë se në këtë pikë e shtyjmë logjikën tonë më tej, nonsensi i kësaj rregulloreje bëhet më i madh për shkak dhe të ligjit të mbrapshtë. Sot janë pa statute të reja, pa rregullore të re, pa strukturë, sepse pikërisht ligji mbetet kontrovers. Për më tepër sot IAL-të publike janë ende të paakredituara, për shkak të vonesës së argumentuar në hyrje dhe aq më tepër që pengesë ka qenë jo vetëm mosfunksionimi i APAAL për tri vite, por edhe mosmiratimi ende i Kodit të Cilësisë së Arsimit të Lartë. Ky fakt vë në dyshim dhe mënyrën e operimit të agjencisë britanike të akreditimit.

Për këtë shkak, sot që bëhen këto zgjedhje ende nuk dihet cili institucion do të jetë Universitet dhe cili Kolegj! Cilët fakultete do të qëndrojnë të tilla dhe cilat do të shkrihen?!! Cilat programe studime do akreditohen dhe cilat jo?!!! Më e keqja: Çfarë do të ndodhë me këto autoritete pas 2017-2018, kur Strategjia e AL dhe ligji i detyrojnë IAL publike të shndërrohen në IAL publike të pavarura?!!

Apo si gjithmonë “me të parë e me të bërë” politikisht! Rregullorja që çrregullon ka edhe shumë probleme që lidhen me shkelje të tjera ligjore, të cilat synojnë të kontrollojnë numrat përfaqësues të senateve, si dhe ato që lidhen me çështjet e ankimeve e të apelimeve të vendimeve, duke futur si gjithmonë “hundët” ministria në punët e akademizmit.

Synimi mbetet kontrolli i procesit e kushtë- zimi i rezultatit. Si çdo produkt i këtyre kohërave dhe kjo rregullore duket qartë që bëhet jo për të rregulluar universitetet për studentët, por politikën e radhës në universitete.

http://www.panorama.com.al/rregullorja-qe-crregullon/

Read More

Prof. Dr. Artan Fuga mbi procesin e zgjedhjeve ne UT

Prof. Dr. Artan Fuga, shef departamenti ne Universitetin e Tiranes, ka kritikuar rregulloren e Ministrise se Arsimit per periudhen e zgjedhjes se rektoreve. Kritika e tij nuk eshte e qarte, pasi nuk tregon se per cfare flitet konkretisht. Ka disa pretendime mbi provokime dhe nderhyrje te MAS ne procesin e zgjedhjeve, por shkrimi nuk permban ndonje argument. 

Sidoqofte me poshte artikulli i Prof. Dr. Fuges.. 

 http://www.hashtagalbania.com/index.php/2016/03/03/ministria-e-arsimit-po-vendos-diktature-ne-universitete/

Ministria e Arsimit po vendos diktaturë në universitete

Nga Artan Fuga (Facebook, 03 Mars 2016)

Jo, universitarët nuk e gëlltisin këtë rregullore që na provokon me rastin e zgjedhjeve të drejtuesve të universiteteve publike. Ne duam zgjedhje të lira dhe të ndershme të drejtuesve të rinj ! Punët kanë shkuar shumë larg. Na kërkohet të pranojmë dhe të bëhemi palë në shkeljen e ligjit dhe të Kushtetutës.

Po provokohemi duke na kërkuar të pajtohemi që për një periudhë të papërcaktuar kalendarike të pranojmë vendosjen e juntave me persona të komanduar nga politika në të gjithë hierarkinë universitare. Ata mund të bëjmë pastaj çfarë të duan me universitetet, me pedagogët dhe studentët.

Na duhet të mbrojmë ligjin gjysëm-demokratik në fuqi nga sulmet dhe atentatet që i bëhen nga vetë autorët e tij. Vetëm në diktaturën moniste ka ndodhur që shteti të shkeli me takat e këpucëve ligjet që ka nxjerrë vetë. Kjo nuk është sjellje demokratike, as diktatoriale, kjo është sjellje tiranike sepse nuk njeh asnjë normë a ligj, të mirë a të keq, me të cilën pushtetari duhet t’i lidhi duart vetes së vet.

Ligja trajtohet si një shuk letre i qullur që i hidhet universitarëve në fytyrë.

“Dashkeni edhe të zbatohet ligji ju intelektualë! Në satër!”

Kemi arritur larg. Një ministër guxon që me anë të një projekt-rregulloreje të shkelë me të dy këmbët ligjin dhe Kushtetutën. A ka më llogaridhënie në këtë shtet apo jo ? A ka më përgjegjshmëri qytetare apo jo?

Vetëm një injorant mund t’a hajë gënjeshtrën se diktatura dhe tirania, komandat ushtarake, janë mënyra më e mirë për të bërë zgjedhje demokratike në universitete apo në shkallë vendit. Me diktaturë nuk ndërtohet dot as demokraci, dhe as progres.

Kush ka frikë nga zgjedhjet e lira në universitete dhe kërkon t’i manipulojë ato me çdo kusht? Larg kësaj kulture që do të na kushtojë shumë shtrenjtë po kaloi në universitete!

Na kërkohet që drejtësia, pra ankimimi, të bëhen me gjykata ad hoc, antikushtetuese, si në kohë lufte, me juristë të zgjedhur a të komanduar nga Ministria, a thua nuk e përcakton kushtetuta e Shqipërisë se cili sistem ka të drejtë të bëjë drejtësi në vendin tonë!  Jo, universitetet nuk mund të drejtohen me komanda ushtarake, me junta të komanduara pa asnjë legjitimitet ligjor dhe moral, nuk mund t’u jepen komisarëve politikë pushtete të pakufizuara as për periudha të caktuara!

“Diktatura e përkohshme” në Shqipëri është një koncept i dalë boje. Që nga Roma e Lashtë dhe më parë në Greqinë Antike, diktatorët e përkohshëm ishin tiranë.

Universitarët po provokohen rëndë duke i ndëshkuar të pranojnë të drejtohen me të komanduar si në kazermat ushtarake me komandantë, që për turp, mund të caktohen pa asnjë kriter, mund të kenë qenë edhe të dënuar, trafikantë, pa asnjë gradë shkencore, me formim nga kurse dhe shkolla me provime të marra pa ardhur në provim, me diploma fallco, madje edhe ndoshta analfabetë. Asnjë pengesë për të gjithë këta!

Ne duam të zbatohet ligja dhe të zgjedhim lirisht e të rinovojmë drejtuesit tanë!

Jo, juntave ushtarake në universitete! 
Jo, puçit institucional në universitete!
Jo, “diktaturës të përkohshme” pa afat!
Jo manipulimit të zgjedhjeve të lira në Universitete me infrastruktura të komanduara dhe nën presionin e juntave ushtarake !

Jo teksteve zyrtare me gabime daktilografike, pa kulturë juridike, me gabime gjuhësore dhe logjike!

http://www.hashtagalbania.com/index.php/2016/03/03/ministria-e-arsimit-po-vendos-diktature-ne-universitete/

Read More

Kritika mbi procesin e ri te akreditimit nga ish-ministri i arsimit Prof. M. Tafaj

Myqerem Tafaj

1 Mars 2016, Facebook

Qeveria deklaroi dje se akreditimi i universiteteve bëhet në shtator 2017! 

 
Qeveria kishte premtuar se akreditimi do të bëhet brenda vitit të parë të mandatit, pra në vitin 2014. U bë një shoë për një marrëveshje me një agjenci britanike në dhjetor 2014. Por, dje na doli që agjencia britanike qenka tërhequr. Dje u rikthye agjencia në fjalë dhe do të nisë punën. Por interesant është afati I vendosur për akreditimin: shtator 2017! Duket qartë se është afat politik. Po premtimi c’u bë?! 
Në dhjetor të vitit 2014 kam botuar në gazetën Panorama një shkrim për akreditimin me titull: Akreditimi në arsimin e lartë nuk mund të jetë vetëm ndëshkim !

Kanë kaluar gati dy vjet, nga 2014, dhe asgjë nuk ka ndryshuar në mbështetjen e universiteteve publike për të rritur cilësinë. Përkundrazi, buxheti I arsimit pësoi ulje dhe jo rritje. Buxheti 2016 parashikon 450 USD per student, kur mesatarja e vendeve te OECD eshtë 11800 USD per student. Ligji i ri i arsimit të lartë nuk premton asnjë reformë të vërtetë për rritjen e cilësisë së arsimit të lartë dhe orientimin e tij kah nevojave të ekonomisë dhe tregut të punës. Ai realizon vetëm një gjë: shteti braktis universitetet publike dhe koston e shkollimit të lartë e transferon tek studentët dhe familjet e tyre. U premtuan bursa për degët prioritare, por buxheti I vitit 2016 nuk ka parashikuar asnjë qindarkë. Me këtë ligj fakultetet shuhen dhe universitetet do të qeverisen përmes komandës direkte që do tu japin administratorët (të emëruar nga qeveria) dhe rektorët përgjegjësve të departamenteve, gjoja të zgjedhur, por që do të jenë thjesht ushtarë. Pagat e pedagogëve do të përcaktohen nga bordet e komanduara nga qeveria, cka do të bëj që të goditen shumë pedagogë dhe profesorë, për shkaqe poltike ose sepse nuk kanë votuar drejtuesit e universitetit, fakultetit apo departamentit. Hierakia e re e organizimit të universitetit, që parashikon ligji I ri, e asgjëson de facto autonominë dhe lirinë akademike, përjashton de facto profesoratin nga pjesëmarrja reale në vetqeverisjen e universitetit dhe krijon një linjë të qartë komande, në krye të së cilës do të jenë admininstratorët e dërguar nga qeveria. Ligji I ri nuk krijon asnjë hapësirë reale për konkurrim me meritë, jo vetëm për postet drejtuese, por edhe për vendin e punës si pedagog. Modeli i votës do të shërbej thjesht si një maskë, se gjoja pedagogët dhe studentët po zgjedhin autoritetet drejtuese në universitete. Në fakt, në krye të universiteteve, do të jenë komisarët politikë, të quajtur ndryshe administratorë. Pas quasi- zgjedhjeve të reja në universitete pedagogët dhe studentët do të përballen me pasojat tejet negative të këtij ligji, jo vetëm për universitetet dhe fakultetet, por edhe për cdo pedagog dhe student në arsimin e lartë publik.
 

Read More

Disa raste korrupsioni në arsimin e lartë për mjekësi

Nuk mjafton qe mjeket e infermieret largohen dita-dites, nje situate per te cilen qeveria mburret, por edhe gjate shkollimi te tyre studentet e mjekesise humane perballen me korrupsionin. 

http://www.sociale.gov.al/al/newsroom/lajme/350-infermiere-punesohen-ne-gjermani-klosi-deshmi-se-formimi-profesional-eshte-zgjedhja-e-duhur

350 infermierë të parë kanë fituar sot të drejtën për t’u punësuar në Gjermani. Kompania DEKRA ka mundur të përfundojë kurset e trajnimit profesional dhe të gjuhës gjermane për rreth 350 infermierë, të cilët kanë mundur ta marrin dëshminë e kualifikimit dhe të negociojnë tashmë kontratën për një vend pune të sigurt në Gjermani. Në ceremoninë e certifikimit të tyre ishin të pranishëm përfaqësues të kompanisë DEKRA, e cila mori përsipër dhe trajnimin e tyre, ambasadori gjerman, Helmut Hoffman, infermierët që ndoqën kursin, si dhe ministri i Mirëqenies Sociale dhe Rinisë, Blendi Klosi. (Ministria, 24 shkurt 2016)

Me poshte jane disa raste te publikuara nga faqja e qeverise per denoncimin e korrupsionit: www.stopkorrupsionit.al.

1. UAMD - Universiteti i Durrësit

Denoncimi: Në këtë rast denoncohet një pedagoge e Universitetit ''Aleksandër Moisiu'' në filialin Peshkopi, e cila kushtëzon studentët përmes mitmarrjes në kalimin e lëndës së saj, përmes vlerës së 100 mijë lekëve.
Verifikimi: Në datë 18.02.2015, grupi i punës zhvilloi takim me Rektorin e Universitetit Aleksandër Moisiu Durrës, drejtoreshën e burimeve njerëzore dhe zyrën e studentëve (sekretarinë) në këtë institucion. Pedagogia V.F, është pedagoge e jashtme pranë UAMD, filiali Peshkopi. Grupi i punës verifikoi fletët e provimeve të shoqëruar me procesverbalet përkatëse nga ku rezultoi se në kursin Infermieri Psikiatrike, në katër prej fletëve të provimit, pikët e hedhura në procesverbal janë ndryshe. Ndërsa në një prej tyre, mbledhja e pikëve është bërë gabim. Në të katër rastet janë llogaritur më pak pikë. Në kursin Obstetrikë Infermierike, në 6 raste nuk janë hedhur në procesverbal pikët e duhura, dy studentëve u janë dhënë më shumë pikë se sa testi, kurse 4 prej tyre ju janë ulur. Nga ndryshimet e hedhjes së pikëve në procesverbal ndodh që studentët të marrin nota të ndryshme nga çfarë meritojnë. Përqindja e kalueshmërisë së studentëve është 95%. Znj. M.F, duke hedhur pikë të ndryshme në procesverbal, nga ato që çdo student ka në fletën e provimit, ka ndryshuar rezultatet përfundimtare të provimit për disa studentë.
Masat e marra: Rektori i UAMD, të kalojë në rikontrollim dhe rivlerësim të provimeve të Obstetrikë infermierike dhe Infermieri Psikiatrike. Rektori i UAMD të marrë masë, në batim të kuadrit ligjor, ndaj pedagoges V. F, për ndryshim të rezultateve të provimeve të studentëve në lëndët Obstetrikë infermieriken dhe Infermieri Psikiatrike. Gjithashtu është proceduar me referim të rastit në Prokurori datë 05.03.2015 nr.prot 1765 ndaj shtetases V. F.

2. Universiteti i Mjekësisë i Tiranës

Denoncimi: Në këtë denoncim kemi të bëjmë me mitmarrjen nga një pedagoge e jashtme e Fakultetit të Shkencave Mjeksore Teknike, e cila është pedagoge dhe tek Fakulteti i Shkencave të Natyrës. Denoncuesi jep dhe hollësi mbi ''pazaret'' për të kaluar në lëndën e saj.

Masat e marra: Dërgimi me shkresën nr.1220 datë 13.02.2015 Prokurorisë së Rrethit Gjyëqsor Tiranë të Kallëzimit Penal për shtetasin A.E. 

3. Universiteti i Mjekësisë së Tiranës

Denoncimi: Katedra e Anatomisë në universitetin e Mjekësisë merr shuma të konsiderueshme të lekëve në këmbim të marrjes së lëndës. Shefja e mëparshme S.Q nuk  jep provimin nëse nuk bën pagesën tek sekretarja e saj E. që shërben dhe si seksere. Qytetarit i janë kërkuar 15000 për notën 5. Kjo pagesë u është kërkuar dhe shumë studentëve të tjerë.
Masat e marra: Dërgimin me shkresën nr.1224 datë 13.02.2015 Prokurorisë së Rrethit Gjyqësor Tiranë të Kallëzimit Penal për shtetaset S. Q dhe E. K

Read More

Prokuroria nis hetimet për studentët që hodhën vezë kundër Edi Ramës

Birn, 23 Shkurt, 2016

Prokuroria e Tiranës ka nisur hetimet kundër dy studenteve që gjuajtën me vezë kryeministrin Edi Rama gjatë një vizite në Fakultetin e Shkencave Sociale.

http://www.reporter.al/prokuroria-nis-hetimet-per-studentet-qe-hodhen-veze-kunder-edi-rames/

Nëpërmjet një njoftimi të martën Lëvizja Për Universitetin njoftoi që Prokuroria e Tiranës ka regjistruar një procedim penal kundër dy aktivisteve të saj Anita Lushi dhe Bora Mema, të cilat me 2 nëntor hodhën disa vezë në drejtim të kryeministrit në formë proteste për politikat e qeverisë për arsimin e lartë.

“Sot Prokuroria e Tiranës, me kërkesë të Policisë së Shtetit, ka nisur veprimet proceduese penale ndaj studenteve dhe aktivisteve të Lëvizjes Për Universitetin Anita Lushi dhe Bora Mema, duke i akuzuar për goditjen me vezë të kryeministrit,” tha Lëvizja për Universitetin nëprmjet një njoftimi në rrejtin social Facebook.

“Në vend që të hetojë kryeministrin dhe ministren e Arsimit për hartimin klientelist të ligjit të arsimit të lartë dhe të ngrejë akuza për badigardët dhe policët që dhunuan studentët në oborrin e fakultetit dhe në mjediset e komisariatit nr. 2, Prokuroria e Tiranës gjen kohën të ndjekë pas interesat e atyre që dhunuan studentët dhe po privatizojnë jetën universitare,” shtoi ajo.

Pas protestës së 2 nëntorit, 8 aktivistë të Lëvizjes Për Universitetin u shoqëruan në polici dhe u lanë të lirë pas pak orësh.

Ky grupim studentor ka organizuar për një vit e gjysmë protesta kundër Ligjit të Arsimit të Lartë, një ligj polemik që synon të ndajë fondet publike me universitetet private, i kundërshtuar edhe nga disa profesorë dhe specialistë të fushës së arsimit.

Prokuroria e Përgjithshme konfirmoi që ndaj studentëve është regjistruar një procedim penal, por saktësoi së ato nuk akuzohen për tentativën për të goditur kryeministrin me vezë.

“Prokuroria e Tiranës ka nisur një hetim për kundërshtim dhe goditje të forcave të rendit, pas referimit të bërë nga policia e shtetit,” tha për BIRN Albi Serani, zëdhënës i Prokurorisë së Përgjithshme.

Lëvizja për Universitetin e cilësoi hetimin e Prokurorisë si një gjyq politik të frymëzuar nga kryeministri, duke paralajmëruar protesta të reja.

“Në një vend ku pushteti gjyqësor i shërben qeverisë, gjyqi i pritshëm ndaj studenteve do të jetë politik. Akuzuesi dhe gjykatësi i vërtetë është ai që e konsideroi aksionin e aktivistëve kakarisje në demokraci: Edi Rama,” tha Lëvizja për Universitetin.

“Atij që po tenton të na bëjë gjyq politik do t’i bëjmë gjyqin qytetar në sallë, në fakultete dhe sheshe. Ne nuk kemi frikë. Ne do të jemi frika e pushtetarëve të korruptuar deri në palcë. Studentë dhe qytetarë, bashkohuni për universitetin, për shoqërinë,” përfundoi ajo.

http://www.reporter.al/prokuroria-nis-hetimet-per-studentet-qe-hodhen-veze-kunder-edi-rames/

Read More