Rrjeti i Pavarur i Rektorëve: Të shqetësuar për vonesat e kuadrit ligjor
Mblidhet Forumi i dytë i Rrjetit të Pavarur të Rektorëve të IAL-ve private në vend. Deklarata e përbashkët i kërkon Ministrisë së Arsimit që të “të përmirësohen treguesit e konkurrueshmërisë së vlerave, të kapaciteteve e të standardeve mes dy sektorëve të arsimit të lartë”
Rektorët e universiteteve private në vend mblodhën të shtunën në Durrës forumin e dytë ku diskutuan për ecurinë e reformës në Arsimin e Lartë.
Ata shprehën shqetësim për vonesat në plotësimin e kuadrit ligjor të kësaj reforme dhe me anë të një deklarate të përbashkët i kërkojnë Ministrisë së Arsimit dhe Sporteve që të zbatojë parimi një kut një masë në vlerësimin e dy sektorëve, atij shtetëror dhe privat.
“Vërejmë se zbatimi i kësaj reforme tejet të rëndësishme për shëndetin e shoqërisë sonë dhe për të ardhmen europiane të saj, më shumë se një vit pas miratimit të ligjit të ri po vonohet dhe pengohet nga mungesa e kuadrit të plotë ligjor, si dhe nga mungesa e një stafi më të kualifikuar, më reagues e më të përgjegjshëm në Drejtorinë e Arsimit të Lartë dhe Shkencës pranë Ministrisë së Arsimit dhe Sportit. Deri më sot, asnjë prej vendimeve të Këshillit të Ministrave që, sipas përcaktimeve të Ligjit, duhej të ishin miratuar kohë më parë, nuk është marrë, çka ka krijuar paqartësi serioze, vonesa të theksuara në kalendarin e zbatimit të kësaj reforme dhe kosto e deformime të panevojshme në procesin fillestar të realizimit të reformës, sidomos në periudhën e regjistrimeve. Për këto arsye, kërkojmë plotësimin sa më parë të kuadrit ligjor dhe institucional të parashikuar në ligj”, thuhet në këtë Deklaratë.
Rektorët e universiteteve private shprehin shqetësimin se këto vonesa kanë sjellë dhe problkemet me regjistrimet në këtë vit akademik dhe shprehen se kjo ka dëmtuar sektorin privat.
“Vonesat në plotësimin e kuadrit ligjor dhe procedurat burokratike të aplikuara për regjistrimin e studentëve të vitit të parë e kanë dëmtuar dhe përkeqësuar padrejtësisht pozitën e sektorit privat në arsimin e lartë, siç dëshmohet edhe nga numri më i vogël se një vit më parë i regjistrimeve të reja. Për këtë arsye, kërkojmë që, në të gjitha aktet nënligjore që do të përgatiten e propozohen nga Ministria e Arsimit dhe Sporteve për miratim në Këshillin e Ministrave, të qartësohen dallimet mes institucioneve publike të arsimit të lartë dhe atyre private, sidomos lidhur me procedurat e përzgjedhjes të studentëve, brenda standerteve që përcakton Ligji dhe në frymën e parimit universal të autonomisë institucionale të institucionve të arsimit të lartë”, theksohet në Deklaratë.
Ata kërkojnë që të thjeshtëzohen procedurat e pranimeve për IAL-të private, ndërsa vënë në dukje se “asnjë prej elementeve të reformës, që do të përmirësonte treguesit e konkurrueshmërisë së vlerave, të kapaciteteve e të standardeve mes dy sektorëve të arsimit të lartë, siç janë, ndër të tjera, Letra e Prioriteteve dhe ngritja e Agjecisë së Financimit, nuk ka funksionuar”.
Deklaratën e kanë firmosur rektorët e IAL-ve private të pranishëm në këtë forum si më poshtë:
Arben Malaj – Universiteti “Luarasi”
Mariglen Spiro – Universiteti “Marin Baleti”
Fatos Tarifa – Universiteti i New York-ut, Tiranë
Tonin Gjuraj – Universiteti Europian i Tiranës
Agron Meta – Shkolla e Lartë “Aldent”
Endri Papajorgji – Tirana Business University
Ferdinand Gjana – Shkolla e Lartë “Beder”
Gungan Turan – Universiteti “Epoka”
Ilir Hebovija – Shkolla e Lartë Private “Mesdhetar”
Kristaq Pata – Qiriazi
Lush Përpalaj – Shkolla e Lartë Jo Publike “Wisdom”
Sin Hoxha – Shkolla Private e Arsimit të Lartë “Pavarësia”
Vera Ostreni – Albania University
Luan Karcanaj – Kolegji Profesional
http://www.mapo.al/2016/11/rrjeti-i-pavarur-i-rektoreve-te-shqetesuar-per-vonesat-e-kuadrit-ligjor/1
0 comments:
Post a Comment